[Dilaver]

Sipas AKR: LDK fiton me 31 %, PDK 28, AAK 12, Vetëvendosje 12, AKR 9.5, LDD 2.2 dhe FER-i, 2.2

AKR-ja pak pas mesnate ka shpallur rezultatet e saj në bazë të numërimit të një të tretave të votave, sipas të cilave LDK prin me më shumë se 3 për qind ndaj PDK-së. Mimoza Kusari Lila, nënkryetarja e AKR-së, e cila i shpalli rezultatet sipas të dhënave të partisë tha se këto rezultate janë më ndryshe se ato të cilat janë prezantuar nga Demokracia në Veprim. “Sipas rezultateve tona 30 për qind e vendeve të votimeve, koalicioni për Kosovë të re është 9.5 për qind, Lidhja Demokratike e Kosovës 31 për qind, Partia Demokratike e Kosovës 28 për qind, Aleanca për Ardhmërinë e Kosovës 12 për qind, Vetëvendosja 12 për qind, Lidhja Demokratike e Dardanisë 2.2 për qind, Fryma e re 2.2 për qind”, tha ajo. Sipas Kusarit Aleanca Kosova e Re prin dukshëm në komunën e Gjakovës, është forca e dytë në Han të Elezit, gjithashtu është duke qëndruar mirë edhe në komunën e Prishtinës. Kusari u bëri apel të gjithë qytetarëve që të kufizohen pak në aspektin e festimit apo në aspektin e hyrjes në konflikte, sepse, siç tha ajo, ky është një proces demokratik dhe si i tillë duhet të zgjidhet me mjete demokratike. Ajo konsideron se çfarëdo festimi i ditës së sotme është një papjekuri sepse ka shumë pa qartësi në tërë procesin. Ajo gjithashtu shtoi se ka pasur rënie në komunën e Kamenicës nga situata në të cilën ka qenë Aleanca Kosova e Re. Sipas Kusarit situata sociale dhe ekonomike është tejet e rëndë sa që nuk lë hapësirë as për eufori dhe nuk lë hapësirë për asnjë parti politike të bëjë festë duke konsideruar se kanë fituar garanci në mbështetje nga qytetarët. “Kemi një buxhet aspak të qëndrueshëm dhe kushdo që të qeveris me Republikën e Kosovës qoftë edhe koalicioni për Kosovë të Re do ta ketë një vit ose 1 vit e gjysmë për të stabilizuar situatën e rëndë”, tha Kusari Lila. / BS