[Guri i madh]

Koalicionin do ta zyrtarizoj një javë pas 9 janarit

Publikuar: Sot, më 25 dhjetor 2010





Prishtinë, 25 dhjetor – Hashim Thaçi po pret që në janar t’i hiqet epiteti që aktualisht e ka – kryeministër në largim. Beson se në gjysmën e parë të këtij muaji do ta zyrtarizojë koalicionin që do t’ia siguronte shumicën e ulëseve në Kuvend, me çka do të siguronte edhe udhëheqjen e ekzekutivit deri në vitin 2014. Nuk tregon se më kë do ta bëjë atë koalicion, por tregon se kush nuk mund të bashkëqeverisë me të. E në grupin e dytë, pos “Vetëvendosjes” e lë edhe Lidhjen Demokratike të Kosovës. Konsideron se qëndrimi i partisë 21-vjeçare në opozitë do ta pasuronte tërë skenën politike në vend.
Nuk ngurron të përzihet në punë të brendshme të kësaj partie dhe t’i tregojë kryetarit të saj, Isa Musafa, se për të është më mirë që të merret me reformimin dhe forcimin e LDK-së në katër vjetët e ardhshëm. I thotë që të mos shpresojë në krijimin e ndonjë qeverie teknike, e as të mos përpiqet që krizën e brendshme të partisë ta zgjerojë në krizë vendi.
Me bindjen se është politikani më i votuar në Kosovë, ai e ndien veten përgjegjës për ta gjetur një president të mirë. Nuk thotë nëse ai mund të jetë Behxhet Pacolli, Blerim Shala, Murat Jashari apo Adem Demaçi, por konfirmon se presidenti i ri do të ketë edhe adresë politike. “Vijat e kuqe” që i nxjerrin disa prej drejtuesve të AAK-së për të mos hyrë në koalicion me PDK-në, Thaçi nuk i merr shumë seriozisht, ashtu sikur nuk e mohon se po t’i jepej mundësia do ta vizitonte Ramush Haradinaj në Tribunalin e Hagës. Gjerësisht për këto në pjesën e dytë të intervistës që e sjellë Koha ditore në numrin e së shtunës.