[roadrunner]

/plotësuar/ Detaje të reja zbardhin mediat amerikanë për incidentin e vrasjes së dy ushtarëve amerikanë. Rrjeti i fuqishëm mediatik ABC News raporton se vrasësi thirri “Allahu Akbar” para se të qëllonte mbi ushtarët në autobus që po ktheheshin nga një bazë amerikane përmes Aeroportit të Frankfurtit. ABC duke u thirrur në burimet e veta raporton se në autobus ndodheshin 13 ushtarë dhe shoferi, ndërsa vrasësi qëlloi nëntë herë duke lënë të vrarë 2 dhe plagosur 2 të tjerë.

Ushtarakët e vrarë janë pjesëtarë të Forcave të Sigurisë të njohur në RAF Lakenheath në Britani të Madhe. Associated Press citon ministrin e Punëve të Brendshme, Bajram Rexhepi i cili ka pranuar se vrasësi dyshohet të jetë kosovari Arif Uka nga Mitrovica.

__________________________________________________ ______________

Një shtetas kosovar ka vrarë me armë dy amerikanë në aeroportin e Frankfurtit në Gjermani. Policia gjermane ka deklaruar se dy persona kanë vdekur pasi një person i armatosur ka hapur zjarr në një autobus që barte ushtarë amerikanë në Aeroportin e Frankfurtit.

Drejtuesi i autobusit dhe një ushtar amerikan raportohen se janë vrarë, kurse dy të tjerë janë plagosur rëndë. Një 21 vjeçar që dyshohet se është nga Kosova është arrestuar nga policia, nën dyshimet se ai ka qëlluar mbi amerikanët.
Autobusi ndodhej përballë Terminalit 2 në Aeroportin e Frankfurtit.

Policia u ka deklaruar mediave gjermane se ende nuk është e qartë nëse kjo ka të bëjë me ndonjë akt terrorist. Zëdhënësi i Policisë Gjermane, Jurgen Linker i ka deklaruar gazetës "Die Welt" se dyshohet se incidenti ka ndodhur brenda autobusit.

Korrespondenti i BBC-së në Berlin, Stephen Evans ka njoftuar se aeroporti nuk është shumë larg nga baza ajrore Ramstein, ku ndodhet e vendosur selia kryesore e Forcave Ajrore Amerikane në Europë.