[Neferta]

Kriminelet grek ne
truallin shqiptare
Vrasjet e ushtarëve shqiptarë nga MAVI dhe versioni zyrtar për ngjarjen

Në orën 02.30 të mëngjesit të datës 10 prill 1994, një komando greke e veshur me uniformën e ushtrisë së këtij shteti sulmoi në befasi Postën Kufitare të Peshkëpisë, në Rrethin e Gjirokastrës. Si pasojë e këtij sulmi, u vranë kapiteni i parë Fatmir Shehu dhe ushtari Arsen Gjini. Ngjarja e rëndë tronditi më tej marrëdhëniet midis dy shteteve, Shqipërisë e Greqisë. Krimi u mor përsipër më pas nga organizata terroriste greke MAVI (Fronti për Çlirimin e Vorio–Epirit). Ky grup botoi në gazetën e Athinës “Eleftherotipia”, të nesërmen e ngjarjes, më 11 prill, një deklaratë, ku, pasi merrnin përsipër aktin kriminal, kërkonin të rriteshin veprimet për “të çliruar Vorio–Epirin”. Si për të vazhduar në këtë linjë, dy ditë më vonë, më 13 prill, gazeta tjetër greke “Stohos”, e shquar për tonet e forta nacionaliste, botoi foton e guerilëve të MAVI-it shoqëruar me titullin e madh: “Frikë në Tiranë nga goditja e fortë”. Athina zyrtare mbajti deklarimet zyrtare. Sekretari i shtetit për Punët e Jashtme, Jorgos Papandreu, deklaroi: “Është e vërtetë se në Greqi ka elementë ekstremistë për çështjen e Epirit të Veriut dhe nuk mund të përjashtohet gjë, madje as përfshirja e ushtarakëve grekë në mënyrë individuale”. Ndërsa zëdhënësi i qeverisë greke, Venizellos, tha: “Pa zhvilluar hetime, nuk mund të përjashtohet ekzistenca e elementëve fanatikë.”
Gazeta “Stohos” , tri muaj më parë, më 1 dhjetor 1993 kishte shkruar:
“Me armët fitorja jonë. Mos harroni se Greqia është e gjitha toka që vaditëm me gjak. ‘Stohos’ përgatit beteja te reja. Qëndroni edhe ju afër tij, bashkëluftëtarë në marshimin e kombit. Me kokën lart, Bizanti bëhet”. E njëjta gazetë, pak ditë para ngjarjes, më 30 mars 1994 shkruante: “E keqja më e vogël që do t’i ndodhi një vorioepiroti që banon në Shqipëri, do të kundërpeshohet me ekzekutimin e 5 shqiptarëve”.
Pas ngjarjes, marrëdhëniet midis dy shteteve u acaruan së tepërmi. 10 prilli ishte një prej shenjave më të dallueshme në këtë acarim. Shteti shqiptar shpalli më 13 prill 1994 person të padëshiruar konsullin e përgjithshëm grek në Gjirokastër Kristos Jakovu, të cilin e urdhëroi të linte territorin shqiptar brenda 48 orëve. Si veprim reciprok, shteti grek bëri të njëjtën gjë me sekretarin e parë të ambasadës shqiptare në Athinë, Kastriot Robo. Më 14 prill qeveria shqiptare i kërkoi Këshillit të Sigurimit të OKB-së të dënonte ashpër qeverinë greke dhe ta rreshtonte atë në vendet që përkrahin terrorizmin. Po ashtu u arrestuan mjaft elementë të përzier në veprimtari antishqiptare. Më 16 prill zëdhënësi i Ministrisë të Punëve të Jashtme të Shqipërisë deklaroi se pala greke nuk ka kurrfarë vullneti për të kapur autorët e masakrës, ndërsa qeveria shqiptare deklaroi se më i dobishëm sesa një takim dypalësh do të ishte një komision i ngritur nga Bashkimi Europian dhe KSBE-ja.
Ende sot, pas kaq vitesh, nuk mund të flitet për vënie të drejtësisë së kësaj çështjeje, ndërsa MAVI shfaqet ndonjëherë me ndonjë kërcënim tjetër, madje edhe ndaj qytetarëve shqiptarë me origjinë greke.
Komunikata e Ministrisë së Rendit
Publik, nr.101, datë 11 prill 1994