[Neferta]

Në Korçë heton për dy raste të ndërrimit të kombësisë

Prokuroria e Korçës është duke hetuar një rast të dyshimtë të ndërrimit të kombësisë për dy shtetas, anëtarë të së njëjtës familje. Burime zyrtare të prokurorisë konfirmuan dje për gazetën “Shqip” se kanë nisur një procedim penal që lidhet me ndërrimin e kombësisë së dy personave nga shqiptare në greke, por nuk pranuan të jepnin detaje të tjera në lidhje me personat që po hetohen.
Ky procedim i Prokurorisë së Korçës përbën edhe të vetmin rast të hetimit të ndryshimit të kombësisë, një fenomen mjaft i përhapur ky në jug të Shqipërisë, kryesisht në Gjirokastër, Përmet, Korçë, Sarandë, Delvinë etj., që është ngritur si problem vazhdimisht nga nënkryetari i Këshillit të Lartë të Drejtësisë, Kreshnik Spahiu.
Në asnjë rreth tjetër të vendit nuk ka të regjistruar aktualisht ndonjë çështje që ka të bëjë me ndërrimin e kombësisë, edhe pse akuzat publike për raste të tilla kanë qenë të shumta.
Në Prokurorinë e Përmetit pohojnë se nuk ka asnjë dosje të kësaj natyre, ndërkohë që nga burime të prefekturës mësohet se në këtë rreth sapo ka përfunduar një kontroll i Drejtorisë së Përgjithshme të Gjendjes Civile dhe se konkluzionet e këtij kontrolli mund të shndërrohen në dosje për prokurorinë e rrethit, pasi paraprakisht janë konstatuar raste abuzive të ndërrimit të kombësisë.
Fenomeni i konvertimit të banorëve të Shqipërisë së jugut nga shqiptarë në grekë u ngrit si shqetësim në fillim të shkurtit nga nënkryetari i Këshillit të Lartë të Drejtësisë Kreshnik Spahiu, i cili gjatë një turi në gjykatat e jugut konstatoi raste skandaloze të ndërrimit të kombësisë. Spahiu dhe një numër gjyqtarësh arritën në konkluzionin se ky fenomen ishte nxitur nga ligji “Për gjendjen civile” i vitit 2009, nene të të cilit u atakuan në Gjykatën Kushtetuese nga kreu i Gjykatës së Sarandës, Alltun Çela. Krahas kësaj ankese që po shqyrtohet nga Gjykata Kushtetuese, “Aleanca Kuq e Zi” po mbledh firma për të rrëzuar ligjin në fjalë.
Kreshnik Spahiu, i cili ishte iniciator i një fushate kombëtare kundër ndërrimit të kombësisë, ka deklaruar se konvertimet e bëra me vendime gjykatash nuk janë asgjë përpara konvertimeve të bëra ilegalisht nga nëpunës të gjendjes civile.