[Zero Cool]

Deda: Vizitë e ngutshme e Stefanovicit


Ilir Deda, përfaqësues i presidentes Atifete Jahjaga në ekipin e dialogut teknik në mes të Kosovës dhe Serbisë, ka deklaruar se ardhja e Borko Stefanovicit në Kosovë është vizitë e ngutshme.
“Është e hershme vizita e zotit Stefanovic në Kosovë, me një nguti. Ky është një vendim, të cilin e ka marrë Qeveria dhe duhet të bisedoni më shumë me ata që e kanë marrë këtë vendim - pse e kanë marrë në këtë moment?!”, ka deklaruar Deda për Radion Evropa e Lirë.

“Ju e keni parë që edhe zonja Edita Tahiri nuk ka qenë shumë e entuziazmuar për këtë vizitë dhe unë vetëm mund të përfundoj se ka qenë shumë e hershme vizita e zotit Stefanoviq”, ka thënë Deda.

Ai ka thënë gjithashtu se ka qenë dhe është kundër hyrjes në këtë proces, duke thënë se koha e nisjes së këtij procesi të dialogimit, ka qenë moment që nuk i ka konvenuar Kosovës.

Deda ka thënë se qëndrimi i presidentes është shumë i qartë se do të bisedohet vetëm për çështje ndërmjet dy shteteve, e jo, siç thotë ai, “për çështje të brendshme”.

“Në të njëjtën kohë, nëse ne themi se jemi për zgjidhje evropiane, atëherë kemi një keqkuptim. Ekziston keqkuptimi ndërmjet neve dhe Beogradit se çka është zgjidhje evropiane”, ka deklaruar Deda. /Telegrafi/