[Zero Cool]

Veriu i Kosovës ka nevojë për KFOR-in





Deputetë e Kuvendit, të cilët trajtojnë aspekte të sigurisë, besojnë se suksesi i vendosjes së një gjendje normale në veri të Kosovës varet nga bashkëpunimi i KFOR-it me Policinë e Kosovës dhe atë të EULEX-it. Vetëm një koordinim ndërmjet këtyre komponentëve, sipas tyre, do të siguronte një rend kushtetues ligjor në veri.
Ndonëse deputetë të opozitës dhe ata nga partia më e madhe në pushtet ndajnë mendime të ndryshme në lidhje me veprimet e Qeverisë së Kosovës në veri, si konstatim i përbashkët është se në këtë pjesë ka mungesë të sundimit të rendit kushtetues, për shkak të pranisë së strukturave të pushtetit paralel të Serbisë, raportoi Evropa e Lirë.

Anëtari i Komisionit për Siguri të Brendshme në Kuvendin e Kosovës, Fatmir Xhelili, deputet i PDK-së në pushtet, thotë se problemet në veri zgjidhen përmes një koordinimi ndërmjet vendorëve e ndërkombëtarëve, dhe jo përmes forcës.

“Qeveria e jonë asnjëherë nuk e ka pasur synim që me metoda policore dhe represive ta zgjidhë situatën në pjesën veriore, por besoj që zbatimi i ligjit dhe arrestimi i atyre që zhvillojnë aktivitet joligjor, të mos them edhe krim të organizuar, do të jetë një lehtësim i madh për organet e rendit dhe Ministrisë së Punëve të Brendshme”, thotë Xhelili.

Deputeti opozitar nga radhët e AAK-së, Burim Ramadani, thotë se stacionet policore në veri funksionojnë jashtë zinxhirit komandues të Policisë së Kosovës.Për një gjendje të tillë, Ramadani fajëson Qeverinë dhe Ministrinë e Brendshme. Ai e sheh Qeverinë e Kosovës të pavendosur që ta zbatojë ligjin në veri.

“Policia e Kosovës ka një zinxhir komandues dhe nuk guxon assesi të ketë hapësira për zinxhirë tjerë komandues. Kjo garniturë udhëheqëse e policisë dhe Ministrisë së Punëve të Brendshme nuk ka vendosmëri, nuk ka guxim dhe nuk ka kurajë që të veprojë sipas detyrave që i ka”, thekson Ramadani.

Një rol të theksuar në veri ka sidomos prania ndërkombëtare. Rifunksionalizimi i plotë i policisë, pastaj gjykatave dhe doganave në veri, viteve të fundit është kryesisht në duart e misionit evropian - EULEX.

Ndryshe, veriu i Kosovës, vazhdon me vjet të jetë një territor ku autoritetet kosovare kanë fare pak qasje, për shkak të funksionimit të strukturave të pushtetit paralel të Serbisë atje, që mbështeten nga serbët lokal. Së fundit, doli që edhe drejtuesit e stacioneve policore të Kosovës në këtë pjesë të jenë në shërbime të dyfishta. Kurse, përpjekjet e Qeverisë së Kosovës për largimin e tyre u pasuan me protesta e bllokada rrugësh nga ana e banorëve serbë të atjeshëm të mbështetur nga strukturat politike në veri, të cilat nuk njohin shtetin dhe organet shtetërore të Kosovës. /Telegrafi/