[Zero Cool]

Në seancën komemorative të Kuvendit të Kosovës u vlerësua lartë kontributi i deputetes së ndjerë Nekibe Kelmendi, e cila u tha se ka krijuar një trashëgimi politike e humane që mbetet vlerë për vendin dhe qytetarët.
Në seancën komemorative, kryeparlamentari Jakup Krasniqi tha se Kuvendi i Kosovës e ka humbur deputeten veterane të këtij institucioni dhe personin që është angazhuar shumë për të drejtat e njeriut dhe në proceset më të rëndësishme që ka kaluar vendi.

“Jetën e saj e përmbylli denjësisht si përfaqësuese e zgjedhur e popullit dhe me guximin e qëndrimin e hekurt të saj”, u shpreh Krasniqi.

Ndërsa, anëtari i Kryesisë së Kuvendit nga radhët e LDK-së, Sabri Hamiti tha se deputetja Kelmendi, themeluese dhe drejtuese e lartë e LDK-së, si dhe deputete në të gjitha legjislaturat e Kuvendit të Republikës së Kosovës, i ka përmasat e personalitetit politik rugovian. Kjo, sipas tij, nënkupton filozofinë nacionale, politike dhe humane.

“Nekibe Kelmendi punoi për pajtimet shqiptare, si kusht themelor për veprimin politik.
Nekibe Kelmendi filozofinë e të drejtave të njeriut, si filozofi universale, punoi për ta bërë vepër në botën shqiptare te Kosovës. Nekibe Kelmendi punoi për të ndërtuar institucione demokratike si domosdo e mbrojtjes institucionale të barazisë së njerëzve.
Nekibe Kelmendi u bë avokate (mbrojtëse) e të drejtave njerëzore e nacionale të shqiptarëve. Nekibe Kelmendi u zgjodh me vota të drejtpërdrejta të qytetarëve si përfaqësuese në të gjitha legjislaturat”, u shpreh Hamiti.

Ai më tej u shpreh se një çift i jashtëzakonshëm, bashkë me burrin e vet, Bajram Kelmendin, denoncoi para vendit e para botës gjenocidin serb mbi Kosovën dhe hartoi akuzën kundër Serbisë e Milloshevicit në Hagë.

“Ky ishte veprim që parashihte hakmarrjen e egër të kundërshtarit, duke parakuptuar flijimin familjar. Burri dhe djemtë e Nekibes u ekzekutuan dhe u flijuan për Kosovën. Kurse zonja Nekibe e Kosovës nuk ra, po qëndroi për të fituar lirinë e vendit të saj...”, vlerësoi Hamiti.

“Ne jemi edhe të privilegjuar, edhe krenarë që kemi pasur fatin e rastin të bashkëpunojmë me këtë grua e personalitet deri në frymën e saj të fundit, që e kishte dhe që e dha për Kosovën... Lavdi atyre që jetojnë përgjithmonë! Nekibe Kelmendi do të jetojë përherë në Kosovë e ndër shqiptarë”, u shpreh para deputetëve, Hamiti.