[Zero Cool]

Shkelet diaspora





Shkruan: Lumturie Blakaj



Mërgimtarët po vazhdojnë të mbesin peng i administratës së “lodhtë” të kuvendeve komunale. Për t’u pajisur me një dokument, ata presin me ditë, javë dhe muaj, ose në të kundërtën ata janë të detyruar të nxjerrin dokumentet personale me procedura të përshpejtuara, duke paguar shuma të dyfishta, për shkak të vonesave që po iu shkaktohen nga procedurat normale.

Edhe pas krijimit të Ministrisë së Diasporës, bashkatdhetarët kosovarë, të cilët po kalojnë pushimet veriore në Kosovë, ankohen se po vazhdojnë të maltretohen me nxjerrjen e dokumenteve personale për shkak të neglizhencës dhe mospunës së punonjësve të administratës.

“Kam paguar më shumë për të nxjerrë një pasaportë dhe nuk kuptojmë se si vetëm ne shqiptarët presim aty pranë sporteleve. Nuk di se si nuk arrijnë që të japin pasaporta me procedura normale, apo ndoshta qëllimi i tyre është që të mbushin arkën, kur e dinë se tani ne mërgimtarët jemi këtu për pushime dhe jemi të obliguar që të kemi dokumentet personale", thotë Brahimi, një mërgimtar nga Zvicra, i cili pret në njërin nga sportelet në Komunën e Prishtinës.

Ai madje kritikon administratën e Komunës, duke e quajtur atë si të paaftë dhe një administratë të “plakur”.

“As me kompjuter nuk dinë të punojnë, pasi që shumica prej tyre janë në moshë. Mendoj se ka ardhur koha që të ndodhë “rinimi” i kësaj administrate, nëse dëshirojnë të kenë shërbime cilësore dhe të shpejta. Në të kundërtën, ne mërgimtarët sidomos tash kur ka fluks më të madh do të vazhdojmë të maltretohemi me ditë dhe javë duke pritur radhë të gjata dhe humbur pushimin veror këtu pranë sporteleve të komunës”, thotë ky qytetar i mllefosur.

Nga ana e tij, ministri i Diasporës, Ibrahim Makolli, thotë se po angazhohet maksimalisht që të krijohen kushte të favorshme për mërgimtarët, në mënyrë që ata t’iu shmangen radhëve të gjata.

“Besoj se sikurse autoritetet e nivelit qendror edhe ato lokale do të jenë në gjendje që t’iu dalin në ndihmë në çdo moment mërgimtarëve tanë, në mënyrë që ata mos të humbasin kohë në pritje të gjata për nxjerrjen e dokumentacionit të nevojshëm”, ka thënë ministri Makolli.

Ai ka rikujtuar se ka marrë premtime nga ministri i Punëve të Brendshme, Bajram Rexhepi, dhe kryetarët e kuvendeve komunale se gjatë sezonit veror do të ketë shtim të kapaciteteve njerëzore, por edhe shtim të orarit të punës me qëllim që bashkatdhetarët kosovarë të pajisen me dokumentet e kërkuara.

Ndërkaq Jahja Lluka i Aleancës për Ardhmërinë e Kosovës (AAK) konsideron se në bazë të ritmit të aktual të punës së institucioneve qendrore edhe për një kohë të gjatë mërgimtarët kosovarë do të vazhdojnë të përballen me telashet e njëjta në nxjerrjen e dokumentacionit të nevojshëm.

“Ministria e Diasporës ende nuk ka mundur të funksionalizohet dhe, ashtu sikurse po shkojnë punët, do të shkojë edhe një kohë e gjatë që të mund ta kryejë detyrën e vet. Mërgimtarët tanë kanë nevojë për veprime konkrete, në mënyrë që t’iu lehtësohet jeta dhe ardhja në Kosovë dhe jo premtime deklarative”, ka thënë Lluka.

Sipas tij, Ministria e sapokrijuar e Diasporës duhet të konsolidohet sa më parë, sepse në të kundërtën nuk ka asnjë justifikim në vonesat që po shkaktohen në krijimin e mundësive për bashkatdhetarët tanë, të cilët në rrethanat më të vështira ndihmuan Kosovën.

Pavarësisht zotimeve të krerëve institucionalë për krijimin e kushteve më të mira për mërgimtarët kosovarë e sidomos gjatë pushimeve verore, megjithatë bashkatdhetarët po vazhdojnë të përballen me avazin e njëjtë të maltretimit, duke pritur me ditë dhe javë për nxjerrjen e dokumenteve.