[Neferta]

ÇËSHTJA ÇAME – NË ELBASAN NGRIHET MEMORIALI “KLITHMA”

• Në memorial shfaqet një grua me duart të ngritura nga qielli, pasi në prehrin e saj ndodhet një trup pa kokë, dhe sinjifikon vuajtjet e çamëve të Çamërisë gjatë dëbimit nga trojet e veta, si edhe kujton ditën e gjenocidit ndaj shqiptarëve të Çamërisë kundër shovinizmit grek.

Dy vjet më parë, me iniciativë të komunitetit çam në Elbasan, skulptori i njohur Vladimir Caridha, do të derdhte në bronz obeliskun kushtuar këtij komuniteti.
Kryetari i degës së Partisë për Drejtësi, Integrim dhe Unitet për Elbasanin, Ilirjan Sadiku, thotë për ATSH-në se, "ngritja e këtij memoriali, kushtuar gjenocidit grek ndaj shqiptarëve të Çamërisë, është një vlerësim dhe falënderim nga ana jonë për të gjithë qytetarët elbasanas, që në vitet ’40- të pritën dhe hapën dyert për të gjithë komunitetin tonë".
Ky memorial, ku shfaqet një grua me duart të ngritura nga qielli, pasi në prehrin e saj ndodhet një trup pa kokë, sinjifikon vuajtjet e çamëve të Çamërisë gjatë dëbimit nga trojet e veta, si edhe kujton ditën e gjenocidit ndaj shqiptarëve të Çamërisë kundër shovinizmit grek.
"Klithma" sinjifikon shkuljen, eliminimin e popullsisë, atë çka mban një popull, traditën, dhe më kryesorja atje ku ka histori, ka art", thotë skulptori Caridha.
Teksa e sheh këtë skulpturë Caridha sheh gjenocidin, zhdukjen e misterit që mbart kjo popullsi.
Për të moshuarit çamë skulptori ka derdhur në bronz origjinalitetin, vrasjet makabre, që u kryen në ato vite ndaj këtij komuniteti.
Shaban Hajrullai, përfaqësues i këtij komuniteti, sot në moshën 85 vjeçare, i mban mend mirë ato vite, kur ai dhe familja e tij u dëbuan nga trojet e tij.
"Sa herë që kaloj në këtë shesh dhe shoh obeliskun këmbët dhe duart më dridhen, lotët më dalin vetvetiu edhe pse nuk dua të lotoj, është një memorial i arritur dhe brenda kësaj pamje herë-herë mahnitëse dhe herë-herë rrënqethëse, fshihet një histori, një vuajtje e paparë, që është bërë ndaj nesh", thotë ai.
Monumenti është ngritur në qendër të qytetit, shumë pranë sheshit "1 Maji" në Elbasan dhe janë të shumtë turistët nga Franca e Gjermania, që e fotografojnë dhe çuditen me historinë e këtij komuniteti apo të çamëve që jo shumë njihen nga qytetarët e huaj.