Hajra

Qumeshti i gjirit dhe diabeti i tipit 2

9 August 2011 - Shendeti - 227 shikime
Diabeti i tipit 2 vazhdon të përhapet në Shtetet e Bashkuara dhe në botë. Por ndërsa dieta dhe ushtrimet fizike dihet se ndikojnë mbi këtë sëmundje, një studim i ri botuar në revistën “Neurologji” tregon se edhe ushqimi i foshnjave me qumësht gjiri ndikon në diabetin e tipit 2 tek nënat. Shumica e mjekëve pediatër rekomandojnë qumështin e gjirit si alternativën më të mirë ushqyese për foshnjën, ndërsa studimi i ri tregon se kjo mund të jetë më mirë edhe për nënën. Studimi i kryer nga shkencëtarë në Universitetin e Pittsburgut tregon se nënat që nuk i kanë ushqyer me qumësht gjiri fëmijët e tyre, kishin pothuajse dy herë më shumë gjasa për t’u prekur nga diabeti i tipit 2 më vonë në jetë, në krahasim me gratë që fëmijët e tyre i kishin ushqyer me qumësht gjiri. Në studim u përfshinë më shumë se 2 mijë e 200 gra mes moshës 40 dhe 78 vjeç. Të dhënat treguan se për një grua, lindja rrit rrezikun për prekjen nga diabetit më vonë në jetë, por kur kjo grua e ushqen foshnjën me qumësht gjiri, ky rrezik pakësohet deri në nivelin e grave që nuk kanë fëmijë. Një dietë e shëndetshme dhe ushtrimet fizike e zvogëlojnë rrezikun e zhvillimit të diabetit të tipit 2, por, siç thonë ekspertët, pak njerëz e kuptojnë që dhënia e gjirit ndihmon për të tretur dhjamin në barkun e nënës pas lindjes, gjë që gjithashtu ndihmon për të ulur këtë rrezik. Autorët e studimit thonë se këto rezultate përbëjnë një arsye të mirë për të inkurajuar gratë që t’i ushqejnë foshnjat e tyre me qumësht gjiri, të paktën gjatë muajit të parë.

Burimi: Gazeta Standard