Hajra

Godet me sepate burrin, dyshonte per tradheti

10 August 2011 - Aktualitet - 370 shikime
Një grindje në familje për pak nuk është shndërruar në një tragjedi. Ngjarja e rëndë ndodhi mbrëmjen e të hënës në një banesë përdhese tek ish-kombinati “Josif Pashko”. Bashkëshorti i plagosur është dërguar në Spitalin Ushtarak dhe është në gjendje të rëndë shëndetësore.
Policia tha se gruaja xheloze nuk ka mundur të duronte më tradhtitë e pretenduara të burrit të saj, ndërsa kishte vendosur të debatonte me të për të fundit herë mbrëmjen e së hënës. Hyrie B., 31 vjeç, vendosi të ngrinte zërin teksa burri i saj, Qazimi 35-vjeçar, i cili punon si roje private, donte të nisej për të marrë detyrën si zakonisht në mbrëmje. Debatet me nuanca të forta xhelozie që bënte bashkëshortja e tij ia kanë ngritur nervat, por për arsye se ishte në limitet e kohës për të filluar punën, vendosi ta dëgjonte me qartësi gruan. Kur pa që ajo po lëshonte drejt tij akuza të pabaza dhe gjithë debati po zhvillohej në sy të katër fëmijëve, më i madhi 10 dhe më i vogli 3 vjeç, bashkëshorti i indinjuar duket se e ka shtyrë bashkëshorten për t’i thënë që të “mblidhte mendjen”. Kaq ka mjaftuar që gruaja të marrë sëpatën dhe të godasë me sa kishte fuqi babanë e katër fëmijëve të saj. Fati deshi që 35-vjeçari të merrte goditjen në sup, teksa kishte lëvizur kokën dhe mjeti prerës ka ndaluar në trup pa prekur organe jetësore.
Zyrtarisht, policia e klasifikon ngjarjen si krim në familje dhe po ashtu e evidenton atë si një tjetër rast ku bashkëshortët tentojnë të zgjidhin konfliktet me dhunë. “Pas një konflikti mes dy bashkëshortëve, 31-vjeçarja Hyrije B., ka goditur me sëpatë bashkëshortin e saj, Qazim B., duke e plagosur rëndë”, thuhet në komunikatën për mediat të policisë së kryeqytetit.
Grupi hetimor i policisë së Tiranës ka nisur hetimet duke marrë në pyetje në komisariat autoren e ngjarjes Hyrie B, e cila ka deklaruar se kishte dyshime për tradhti bashkëshortore, ndaj dhe vazhdimisht kohët e fundit ajo grindej shpesh me të shoqin. Po ashtu gruaja ka deklaruar se nuk kishte synuar ta vriste ndërsa donte vetëm ta trembte, por sëpata e ka kapur shkarazi në trup e më pas në këmbë.
Policia po heton për ngjarjen e ngritur në pistën e xhelozisë së njërit prej bashkëshortëve apo konflikte mes tyre për motive të dobëta, që degjeneruan deri në goditjen e njërit prej tyre.

Burimi: Gazeta Shqip