[Zero Cool]

vijimi


Ristiq: Aksioni ka për qëllim shpërnguljen e serbëve

Kryetari paralel i komunës së Zubin Potokut, Sllavisha Ristiq, ka vlerësuar se aksioni i njësisë speciale të EULEX-it dhe pjesëtarëve të KFOR-it në fshatin Zupç ka qenë i vrazhdë si asnjëherë më parë.

“Ky aksion është në vazhdën e shumë aksioneve tjera që po realizohen në veri, e që kanë për qëllim frikësimin e popullatës serbe. Nuk po e vejmë në pyetje zhvillimin e hetimeve, por duhet ekzistuar një përgjegjësi ndaj atyre që urdhëruan njësitë speciale të policisë së Kosovës (ROSU) në fund të muajit korrik të shkojnë në veri të Kosovës”, ka thënë Ristiq.

Ai demantoi zëdhënësin e EULEX-it, Nikolas Hoton, se në lidhje me aksionin kanë qenë të njoftuara autoritetet lokale, duke shtuar se aksioni është realizuar në formën më brutale të mundshme.

Ai shtoi se do të protestojë tek organet përgjegjëse të KFOR-it dhe EULEX-it, si dhe tek të gjitha organet tjera ndërkombëtare rreth ngjarjeve të sotme në komunën e Zubin Potokut, ndërkohë që do të dërgojë porosinë Beogradit që të mbrojë serbët e këtushëm, sepse siç tha ai, ajo që po ndodhë këtu ka për qëllim t’i frikësojë serbët në mënyrë që ata të shpërngulen dhe këto hapësira të spastrohen etnikisht.

Sipas tij, shtabi i krizave do të vendosë së shpejti nëse duhet të rikthehen barrikadat në Zupç.

“Janë kohë të vështira dhe çdo hap i shtabit të krizave do të jetë i orientuar në drejtim të mbrojtjes së popullatës serbe. Nuk frikohem nga arrestimi, sepse nuk jam kriminel, dhe për diçka që s’kam bërë, nuk kam arsye të frikohem. Por, frikohem për popullatën serbe në përgjithësi, sepse para së gjithash kjo që po ndodhë për më shumë se një muaj në veri, është një aksion i koordinuar”, ka thënë mes tjerash Ristiq.

EULEX thotë se ka gjetur prova

Zyrtarë të EULEKS-it kanë konfirmuar se gjatë operacionit në veri të Kosovës, në lidhje me hetimet e vrasjes së një polici kosovar, janë konfiskuar prova siç janë edhe armët. Aktualisht ekzistojnë gjashtë kallëzime penale për personat që kanë lidhje me vrasjen.

“Janë kryer bastisje në katër shtëpi private dhe me këtë rast janë konfiskuar prova në lidhje me hetimet, përfshirë edhe armë. Ne mund të konfirmojmë se ekzistojnë gjashtë kallëzime për arrestimin e personave, që dyshohet se janë të përfshirë në vrasjen, ndërsa operacione si ky i sotmi, mund të priten edhe në të ardhmen”, tha për Radion Evropa e Lirë, zëdhënësja e EULEX-it, Irina Gudelevic.

Ajo tha se EULEX-i kërkon bashkëpunimin e komunitetit lokal për t’i sjellë para drejtësisë kryesit e krimeve të fundit në veri.

Në anën tjetër, zëdhënësi i Policisë për rajonin e Mitrovicës, Besim Hoti, njoftoi se operacioni është kryer, ndërkaq, situata është e qetë, dhe se rrugët janë të kalueshme.

Operacionin në Zupç afër Zubin Potokut në rrugën për në Bërnjak, e ka kryer njësia speciale e EULEX-it me mbështetjen e KFOR-it, ndërsa hetimet për vrasjen e policit kosovar po kryhen nga EULEX-i dhe policia e Kosovës.

Serbët bllokojnë magjistralen e Adriatikut

Serbët lokalë kanë bllokuar të mërkurën magjistralen e Adriatikut, përkatësisht rrugën midis Mitrovicës dhe Zubin Potokut, si dhe të gjitha rrugët alternative në këtë drejtim, në shenjë kundërshtimi ndaj aksionit të forcave të KFOR-it dhe EULEX-it që është zhvilluar të mërkurën në mëngjes në Zupç.

Bllokimin e rrugës e ka konfirmuar edhe zëdhënësi i policisë në Mitrovicë, Besim Hoti, i cili ka thënë se pas aksionit të sotëm të EULEX-it, serbët nga Zupçi janë tubuar në këtë fshat duke bllokuar rrugën Mitrovicë-Zubin Potok, si dhe rrugët tjera që çojnë në këtë drejtim.

Sipas tij, atyre u janë bashkëngjitur edhe serbët tjerë nga fshatrat përreth dhe komuna e Zubin Potokut.

Thaçi konfirmon aksionin policor në veri

Në seancën e sotme plenare të Kuvendit të Kosovës, kryeministri Hashim Thaçi ka njoftuar deputet për aksionin policor që forcat e ndjekjes kanë zhvilluar sot në veri....

Ai tha se janë konfiskuar evidenca te rëndësishme por edhe armë të ndryshme që janë përdorur në veprimet e strukturave kriminale. Organet e drejtësisë tha kryeministri Thaçi, kanë përgatitur edhe një numër të kallëzimeve penale kundër një numër personash që kanë cenuar sovranitetin e Kosovës tash e 12 vite.

Kryeministri, Hashim Thaçi, po ashtu ka akuzuar sot përsëri Beogradin zyrtar se qëndron prapa strukturave kriminale në veri të vendit. Ai tha se sipas të dhënave të institucioneve të rendit të Republikës së Kosovës, rezulton se këto strukturat kriminale po shndërrohen në struktura paramilitare.

Ditët e këtyre strukturave, tha kryeministri Thaci, janë të numëruara, ndërsa i bëri apel Beogradit të mos strehoje vrasësit e policit të Kosovës dhe të respektojë fletë arrestet ndërkombëtare. (RTK)

Përfundoi aksioni i EULEX'it - i pasuksesshëm?

Ka përfunduar aksioni i forcave të EULEX-it dhe KFOR-it për kapjen e autorëve i zhvilluar sot në mëngjes në fshatin Zupç në veri të vendit.

Burime të Kosovapress-it kanë bërë të ditur se nuk ka të arrestuar dhe as konfiskim të armëve, ndërkohë që janë bastisur tre shtëpi.

EULEX ia mësyn veriut

Nicholas Hawton ka thënë në mëngjes se EULEX është ndërmarrë një aksion në veri me qëllim të vendosjes së rendit dhe ligjit dhe për të vazhduar hetimet që po bëhen përkitazi me vrasjen e policit kosovar, i cili humbi jetën në detyrë më 26 korrik të sivjetmë.

“Në orët e hershme të mëngjezit , policia e EULEX-it bashkë me policë të Kosovës kanë filluar një aksion në Zupç të Zubin Potokut, aksion ky i cili po vazhdon ende dhe është ndërmarrë si pjesë e hetimeve kriminale që po bëhen për vrasjen e policit Enver Zymberi“, ka deklaruar për Info Globin udhëheqësi i zyrës për informim i EULEX-it, Nicholas Hawton.

Sipas tij aksioni është ndërmarrë me qëllim të vendosjes së rendit dhe ligjit dhe për të vazhduar hetimet që po bëhen përkitazi me vrasjen e policit kosovar, i cili humbi jetën në detyrë më 26 korrik të sivjetmë.

Për sigurinë e policisë po përkujdesen forcat e KFOR-it.

Jozyrtarisht mësohet se njerëzit kanë filluar të tubohen për të protestuar kundër këtij aksioni.

“Një numër i konsideruar i personave kanë bllokuar rrugën magjistrale Mitrovicë -Zubin Potok, si dhe rrugët anësore që lidhin këto dy vende”, ka konfirmuar për portalin Besim Hoti, zëdhënës i Policisë së Kosovës për rajonin e Mitrovicës.

Ndërkaq dje, është raportuar se ushtarët amerikanë të KFOR gjatë orëve të mbrëmjes nuk kanë lejuar hyrjen në Kosovë të autobusit me përfaqësuesit e komunave paralele të Leposaviqit, Zubin Potokut, Zveçanit dhe Mitrovicës, mirëpo si raportohet ata ia dolën të futen në Kosovë nëpërmjetë rrugëve anësore.

Fjala është për rreth 50 veta, të cilët gjatë ditës së djeshme kanë mbajtur mbledhjen në Beograd përkitazi me situatën e sigurisë. Të njejtit kanë refuzuar kërkesën e kancelares gjermane Angele Merkel për shuarjen e institucioneve paralele në veri të Kosovës, kërkesa këto që politikanët “komunalë” i konsiderojnë si ultimatum. (INFOGLOBI)