Hajra

Plani për aksionin II të policisë


Artan M. Haraqija | 09-09-2011 00:36 CET


(E plotësuar) Përfaqësuesit e institucioneve vendore dhe ata të misioneve ndërkombëtare të akredituar në Kosovë kanë diskutuar gjatë gjithë ditës së enjte mundësinë e dërgimit të policisë dhe doganierëve kosovarë në pjesën veriore të vendit, pas skadimit të marrëveshjes së KFOR-it më 16 shtator.
Akoma nuk është e qartë se çfarë roli dhe çfarë fuqie do kenë ata në veri, derisa plani për veriun është diskutuar ndërmjet ambasadorit amerikan, Christopher Dell, shefit të EULEX-it, Xavier bout de Marnhack, komandant i t në largim të KFOR- it , Erhard Buehler dhe kryeministrit të Kosovës, Hashim Thaçi.
Sipas burimeve të “Zërit”, këta zyrtarë janë ende duke shqyrtuar detajet finale të asaj që do të ndodhë një ditë pasi do të përfundojë marrëveshja 11- pikëshe që po implementohet nga KFOR-i.
“E vetmja gjë që nuk dihet sigurt është roli i saktë që do kenë doganierët vendorë në veri, nëse do të kenë rol ekzekutiv apo do të jetë rol KMM (këshillues, monitorues dhe mentorues)”, tha një zyrtar që të enjten ishte i pranishëm në disa prej takimeve, për të shtuar se “ende nuk është vendosur as vendi ku doganierët kosovarë do të dërgohen fizikisht më 16 shtator”.
Pjesë e diskutimit është nëse doganierët kosovarë të dërgohen fillimisht në njërën pikëkalimi kufitar apo në të dyjat, Portën 1 dhe Portën 31.
Do të mendohet mirë aksioni i ri
Ndryshe nga 25 korriku, kur shefi i qeverisë kosovare dërgoi njësitë speciale të policisë kosovare në veri, kësaj radhe po përgatitet një plan, i cili do të jetë shumë më mirë i menduar. Një zyrtar ndërkombëtar, që sot ka qenë i përfshirë në disa prej takimeve, me ironi thoshte: “Kësaj radhe nuk do të dërgohen policët dhe të tjerët pa ushqime në veri, siç bëri Qeveria e Kosovës”.
Një plus tjetër kësaj radhe është edhe përfshirja e Bashkimit Evropian, pasi zyrtarët e saj janë pjesë aktive e hartimit të planit për operacionin e 16 shtatorit për veriun.
Pardje, shefja e diplomacisë së BE-së, Catherine Ashton, pas takimit me presidenten e Kosovës, Atifete Jahjaga, sërish foli publikisht kundër aksionit të ROSU më 25 korrik, duke treguar që ai aksion nuk e kishte përkrahjen e BE-së. Sidoqoftë, kësaj radhe misioni i Unionit të 27 vendeve të Evropës për sundim të ligjit, EULEX është tërësisht i përfshirë në planet për 16 shtator.
Një zyrtar ndërkombëtar që merret me çështjet e sigurisë i ka thënë “Zëri-t” se më 16 shtator, në të dy pikat kufitare do të ketë përfaqësues të EULEX-it, Policisë së Kosovës dhe KFOR-it, pasi ky plan e ka mirëkuptimin e të gjitha palëve.
Zyrtarisht askush nuk ka dëshirë të flasë në detaje rreth këtij plani, derisa zyrat për informim të disa prej institucioneve të lartëpërmendura vetëm kanë pranuar të konfirmojnë mbajtjen e takimeve të enjten, pa pranuar të komentojnë më tutje.
Dell dirigjonte si maestro
Zyrtarë ndërkombëtarë dhe vendorë, gjithmonë duke folur në kushte anonimiteti, e kanë komentuar rolin e ambasadorit amerikan, Chris Dell, duke e quajtur si një “maestro” i cili i dirigjonte takimet ku merrte pjesë edhe ai.
Gjatë të enjtes ka pasur shumë takime, herë me pjesëmarrjen e të gjithë zyrtarëve të lartë e herë dy nga dy, ndërsa në disa prej tyre ka qenë i përfshirë edhe ministri i Brendshëm, Bajram Rexhepi.
“Në takimin e mëngjesit, ku ishin të gjithë, pas asaj që kishte për të thënë kryeministri, gjërat i mori nën kontroll Dell. Bile, me një lehtësi të madhe iu drejtohej edhe komandantit të KFOR-it dhe shefit të EULEX-it duke ua bërë me gisht: “Keni gjë për të thënë, jo…mirë vazhdojmë’”, tha për “Zëri-n” zyrtari perëndimor.
Disa nga zyrtarët qeveritarë vendorë kur janë pyetur nga “Zëri” për këtë, fillimisht vetëm kanë qeshur, për të pohuar më pas fuqinë e ambasadorit amerikan nëpër këto takime.
Jozyrtarisht merret vesh që ambasadori amerikan ishte pajtuar për aksionin e parë të Policisë së Kosovës në veri, mirëpo ajo që e ka kundërshtuar ambasadori amerikan ka qenë data e aksionit, 25 korrik.
Një zyrtar vendor i afërt me partinë tjetër në pushtet, Aleanca Kosova e Re, ka thënë se kjo edhe është arsyeja pse pas bujës së atij aksioni, Dell doli shumë pak në publik për ta përkrahur Thaçin.
2