[Zero Cool]

Konuzin zemërohet me serb, për Kosovën





Nga Express më 15 shtator 2011 në ora 17:10


Ambasadori i Rusisë në Serbi, Aleksandar Konuzin, ka kritikuar të enjten me një ton të pazakonshëm në Beograd pjesëmarrësit e forumit të parë të sigurisë nga Serbia, se nuk po i mbrojnë interesat e vendeve të tyre lidhur me Kosovën, dhe ka braktisur sallën ku po mbahet forumi.

“A thua në këtë sallë nuk ka serbë”, ka thënë disa herë Konuzin, duke folur me emocione dhe ton të ngritur në panelin, i cili i kushtohet ndryshimeve të sigurisë globale.

Ambasadori rus ka akuzuar KFOR-in dhe NATO-n se “po shkelin Rezolutën 1244 të Kombeve të Bashkuara, pasi që dëshirojnë që në kufirin me Serbinë të dërgohen doganierë dhe policë dhe këtë askush nga pjesëmarrësit e forumit nuk e ka përmendur.

Konuzin ka thënë se në mbledhjen e sontme të Këshillit të Sigurimit për Kosovën, interesat e Serbisë do t’i mbrojë Rusia dhe shefi i diplomacisë serbe Vuk Jeremiq, ndërsa “këtu në sallë nuk është askush që mbron interesat e Serbisë”.

Ambasadori rus pas fjalimit 15 minutash, ka braktisur me nervozizëm sallën, ku mbahej forumi, në të cilin marrin pjesë ministra të Jashtëm të shumë vendeve, ekspertë për siguri të jashtme dhe siguri, dhe gazetarë.