Hajra

Veri, sulmohen automjetet e KFOR-it


Bekë Abazi | 31-10-2011 11:53 CET


Dy automjete të KFOR-it, janë sulmuar me gurë nga një grup i personave të paidentifikuar në pjesën veriore të Mitrovicës. Automjetet e KFOR-it kanë pësuar dëme materiale, thyerje të xhamave anësor dhe të një retrovizori, derisa ato ishin në lëvizje, kurse janë sulmuar me gurë nga një grup i së paku 5-6 personave, të moshës rreth 15-16 vjeçar.
Zyrtari për informim publik në policinë e Kosovës në Mitrovicë, toger Besim Hoti, tha se rasti është raportuar të dielën, rreth orës 18:00, në rrugën “Anke Spajiq”, në udhëkryq të rrugëve që shpijnë drejt Zveçanit të vogël, në veri të Mitrovicës, kurse, sipas tij, “patrulla policore e stacionit policor në veri të Mitrovicës ka kuptuar se bëhej fjalë për dëmtim të dy automjeteve zyrtare të MSU të KFOR-it Austriak”.
“Dy automjetet zyrtare të KFOR-it, kanë pësuar dëme materiale, thyerje të xhamave anësor dhe të një retrovizori, derisa të njëjtit ishin në qarkullim dhe ishin sulmuar me gurë nga një grup i së paku 5-6 personave, të moshës rreth 15-16 vjeçar”, ka thënë Hoti, sipas të cilit përveç dëmeve materiale nuk është raportuar për të lënduar.
Rasti i sulmit me gurë është regjistruar në stacionin policor në veri të Mitrovicës, kurse pas kontaktit me prokurorin publik të prokurorisë së qarkut në Mitrovicë, rasti është kualifikuar si vepër penale “rrezikim i personave në mbrojtje ndërkombëtare” të paraparë sipas nenit 141 të Kodit Penal të Kosovës.