[Kosova19]

BËHU ÇELËS PËR TË MIRËN

Nga Enes ibën Maliku, radijAllahu, transmetohet se ka pohuar që i Dërguari i Allahut sal-lAllahu alejhi ve sel-lem ka thënë: "Me të vërtetë ka njerëz që janë çelësa për të mirën dhe mbyllës për të keqen, por ka njerëz që janë çelësa për të keqen e mbyllës për të mirën. Lum ai në duart e të cilit Allahu bëri çelësat për të mirën dhe mjerë ai në duart e të cilit Allahu bëri çelësat për të keqen!" [1]

Kush ia do të mirën vetes, që të jetë ndër ata që janë çelësa për të mirë dhe mbyllës për të keqen, të cilët njëkohësisht janë edhe fatlumët, atëherë duhet të ketë parasysh çështjet[2] që vijojnë:

1. Të jetë i sinqertë në fjalë dhe në vepra sepse sinqeriteti është baza e çdo të mire dhe burimi i çdo mirësie.

2. Të lutet dhe t'i kërkojë Allahut sukses sepse lutja është çelës për çdo të mirë. Allahu nuk e refuzon lutjen dhe nuk e nënçmon besimtarin kur e thërret Atë.

3. Të kujdeset për kërkimin dhe marrjen e dijes sepse dituria tërheq mirësinë dhe begatinë dhe mbron nga të këqijat e të ligat.

4. Të përqendrohet në adhurimin e Allahut, posaçërisht te farzet si namazi, i cili ndalon nga veprat e liga dhe të këqija.

5. Të pajiset me edukatë të lartë dhe të largohet nga edukata e ulët.

6. Të shoqërohet me vepërmirët sepse qëndrimi me ta është shkak për t'u rrethuar nga melaike dhe e përfshin mëshira e Allahut. Të largohet nga shoqërimi me të këqijtë e të ligët sepse me ta ulen shejtanët.

7. Të këshillojë njerëzit për sa kohë gjendet mes tyre, duke i orientuar për tek e mira dhe duke i larguar nga e keqja.

8. Të kujtojë ringjalljen dhe qëndrimin para Allahut, Zotit të botëve, i Cili i shpërblen vepërmirët për të mirat dhe mëkatarët për mëkatet. Allahu i Lartësuar thotë: "E kush punon ndonjë të mirë sa grimca, atë do ta shohë. Dhe kush punon ndonjë të keqe sa grimca, atë do ta shohë."[3]

Shtytja për tërë këtë është dashuria e njeriut për të mirën dhe për dobinë e njerëzve, pasi kurdo që është prezente dëshira, qëllimi i paluhatshëm dhe kërkimi i ndihmës së Allahut për këtë, ky njeri do të jetë me lejen e Allahut nga çelësat e së mirës dhe mbyllës i së keqes. Allahu u jep sukses robërve të Tij dhe ia hap rrugën kujt të dojë, se Ai me të drejtë është dhënësi i suksesit.

[1] Transmeton ibën Maxheh (237), kurse Albani e cilësoi të mirë (hasen) në Sahih Sunen ibën Maxhe (194).

[2] Shejhu, Allahu e ruajtë, i përmendi çështjet shkurtimisht pa argumente, edhe pse argumentimi për to është më se i njohur për muslimanët dhe në veçanti për nxënësit e dijes (sh.p).

[3] Ez-Zelzele: 7-8.

” Fevaid El-Menthure” Dr. AbduRrazak ibën AbdulMuhsin el-Bedr

Përshtati: Namik VEHAPI
Gjakovë / Kosovë