[Kosova19]

Lidhja farefisnore është obligim varësisht nga mundësitë
Fetaua Ibn Baz
[9/414]

Pyetje: Kam motra të martuara dhe nëna ime është e martuar për një burrë tjetër, meqë babai im vdiq. Unë punoj në ushtri dhe dëshiroj që t’i vizitoj ata, por pozita ime nuk ma lejon këtë dhe jam i martuar. Kur shkoj dhe largohem nga familja, më duhet të qëndroj aty së paku tri ditë dhe, gjatë kësaj kohe, nuk do të mund të kujdesem për gruan dhe fëmijët. Pra, a është kjo ndërprerje e lidhjes farefisnore, duke ditur që kam dhe dhjetë muaj që s’kam lidhje me ta?

Përgjigje: Lavdi Allahut. Mbajtja e lidhjes farefisnore është obligim, varësisht nga mundësitë që kanë të afërmit. Në këtë ka dobi të shumta dhe interes të madh. Ndërprerja e lidhjeve farefisnore është nga mëkatet e mëdha, për shkak të thënies së Allahut:

« Ndoshta, nëse ju japim pushtet, ju bëni çrregullime në tokë dhe i ndërpritni lidhjet farefisnore. Këta i ka mallkuar Allahu, kështu që as nuk dëgjojnë, as nuk shohin » [Muhamed, 22]

I dërguari i Allahut [salallahu alejhi ue selam] ka thënë:

"Nuk do të hyjë në xhenet ai që i ndërpret lidhjet farefisnore" [Muslim]

Dhe thënia e tij [salallahu alejhi ue selam] ndaj atij që e pyeti:
- O i dërguar i Allahut, kë ta nderoj?
- Nënën tënde, - iu përgjigj.
- Pastaj kë?
- Nënën tënde.
- Pastaj kë?
- Nënën tënde.
- Pastaj kë?, - pyeti për të katërtën herë.
- Babanë tënd, pastaj të afërmit tjerë. [Muslim]

Dhe është transmetuar besnikërisht nga ai [salallahu alejhi ue selam]:

"Kush do që t’i shtohet furnizimi dhe jetëgjatësia, le t’i mbajë lidhjet farefisnore"

Hadithet më këtë domethënie janë të shumta. Ty të takon t’i mbash lidhjet farefisnore aq sa ke mundësi, duke i vizituar kurdo që të lehtësohet kjo, nëpërmjet korrespondencës/shkrimit apo nëpërmjet telefonit. Po ashtu, duhet të mbash lidhjet nëpërmjet pasurisë, nëse i afërmi është i varfër. Allahu i lartësuar ka thënë:

« Kini frikë Allahu aq sa keni mundësi » [et-Taghebun, 16]

« Allahu nuk e ngarkon asnjë shpirt përtej mundësive të tij » [el-Bekare, 286]

Dhe pejgamberi [salallahu alejhi ue selam] ka thënë:

"Kur të urdhëroheni për ndonjë gjë, bëjeni atë aq sa keni mundësi". [Muteffekun alejhi]

www.mburoja.net