[Alima]

...




MITROVICA THEN AKULLIN E RACIZM-it ISLAM LEJON SHKOLLIMIN ME SHAMI

E Enjte 23 Shkurt 2012 14:01

Kthehen në shkolla nxënëset e përjashtuara

Nxënëset e shkollës së mesme “Frang Bardhi” në Mitrovicë, të cilat bartin shami në kokë, do të mund ta vazhdojnë procesin mësimor pa ndonjë problem, vetëm se atyre u duhet të bëjnë një ankesë në Ministrinë e Arsimit të Kosovës.

Kjo u bë e ditur, të enjten, pas një takimi të jashtëzakonshëm të udhëheqjes komunale në Mitrovicë, ku kanë marrë pjesë edhe juristë të ndryshëm për të komentuar ligjin dhe udhëzimin administrativ rreth kodit të sjelljes së nxënësve nëpër shkollat publike, raporton “Kosovapress”.
“Ne duhet të respektojmë në përpikëri ligjin dhe udhëzimin administrativ për shkollat publike”, ka thënë numri një në Mitrovicë, Avni Kastrati.
Sipas tij, ligji mbi arsimin nuk e precizon qartë mënyrën e veshjes së nxënësve nëpër shkolla, ndërsa udhëzimi administrativ që është lëshuar, lejon mundësi që me një ankesë nxënësit e larguar nga procesi mësimor të kthehen në shkollë.
Ai ka cituar juristët të cilët në takim kanë interpretuar udhëzimin administrativ.
“Neni 8 i udhëzimit administrativ të kodit të mirësjelljes dhe masat disiplinore për nxënës të shkollave të mesme të larta, parasheh që nëse nxënësi pas përjashtimit nga shkolla - për shkak të mbajtjes së shamisë - ushtron ankesë në Ministrin e Arsimit të Kosovës në Prishtinë, mund të vazhdojë mësimin, derisa Ministria të bie një vendim të ri”, ka thënë Kastrati.
Nxënësit e ndërrimit të paradites të gjimnazit “Frang Bardhi” në Mitrovicë kanë protestuar edhe sot për një orë në shenjë solidarizimi me shoqet e tyre, të cilave u është ndaluar hyrja në shkollë për shkak të bartjes së shamisë. Ata më pas i janë kthyer mësimit.
Por kanë deklaruar se nuk do të ndalen deri në realizimin e kërkesave të tyre që shkolla është vend edukimi e hapur për të e gjithë, e jo të ketë diskriminim mbi baza fetare sepse ne jemi mbi 97% muslimanë ka thënë një protestues i shkollës ''Frang Bardhi'' sot në Mitrovicë.
(Reagimi i PD-së)

PD: Po shkelen rënd të drejtat e nxënëseve të mbuluara

Partia e Drejtësisë ka reaguar dhe dënuar urdhëresat e ekzekutivit të Komunës së Gjilanit dhe të Komunës së Mitrovicës për ndalimin e vijimit të mësimit në shkollat publike të nxënëseve të cilat bartin mbulesë në kokë.
Largimi i nxënëseve nga shkolla dhe ndërprerja e shkollimit të tyre obligativ ligjor, për shkak të mbulesës së kokës, sipas Partisë së Drejtësisë, paraqet shkelje të rëndë të lirive dhe të drejtave të njeriut dhe diskriminim të vrazhdë në baza fetare.
“Theksojmë dhe përkujtojmë të gjitha institucionet relevante të vendit se liritë dhe të drejtat e njeriut nuk mund të jenë subjekt i vullnetit politik të një ministri dhe rregullimit me akte nënligjore – urdhëresa administrative, dhe se vijimi i mësimit në shkollat publike për vajzat që mbajnë mbulesën e kokës, si shprehje publike të bindjeve të tyre fetare është i garantuar me Konventat ndërkombëtare dhe Kushtetutën e vendit dhe nuk është i ndaluar me asnjë ligj në fuqi”, thuhet në reagimin e Partisë së Drejtësisë, e cila kërkon që kjo praktikë të ndërpritet menjëherë.
Ky subjekt ka paralajmëruar iniciativën ligjore në Kuvendin e Kosovës për rregullimin e e kësaj çështje nëpërmjet ndryshimit dhe plotësimit të Ligjit kundër Diskriminimit mbështetur në Nenin 38 paragrafi 3 të Kushtetutës së vendit, që thotë se askush nuk mund të detyrohet ose të ndalohet, në kundërshtim me ndërgjegjen e vet, që të marrë pjesë në praktikimin e fesë si dhe të bëjë publike bindjet ose besimin.
(Reagimi i BIK-ut në Mitrovicë)
Bashkësia Islame e Republikës së Kosovës
Bashkësia Islame –Mitrovicë

Duke u nisur nga situate e krijuar pas vendimit të DKA – Mitrovicë Nr: 07 – 17/2011, 19.01.2012, për ndalimin e vajzave me veshje fetare (shamia) nga vijimi I procesit mësimor, si dhe aplikimi I këtij vendimi nga ana e disa drejtorëve, të shkollave të mesme në Mitrovicë, ne Imamët e KBI në Mitrovicë në takimin tonë të jashtëzakonshëm lëshojmë këtë:

DEKLARATË

- Një vendim i tillë i drejtorisë dhe veprimi i disa drejtorëve në qytetin tonë edhe ashtu të kapluar nga problemet e shumta, ka shkaktuar një indinjatë të thellë tek ne Imamët dhe te komuniteti i gjërë fetar në Mitrovicë.
- Veprimi i këtillë konsiderojmë se është shkelje e rëndë në dy të drejta fundamentale të njeriut:
1. të drejtën për shkollim
2. dhe të drejtën e shprehjes së lirë të orientimit fetar.
- Presim nga organet kompetente që të marrin masat e duhura për të parandaluar destabilizimin e mëtutjeshëm tee situates dhe shqetësimin e qytetarëve dhe të lejojnë vajzat në fjalë që të vijojnë procesin arsimor.
- Kërkojmë nga të gjithë faktorët relevant që të ndiohmojnë në tejkalimin e kësaj situate dhe të kontribuojmë të gjithë së bashku në përmirsimin e gjendjes në shoqërinë tonë.

Në Emër të Imamëve të Bashkësisë Islame në Mitrovicë

Rexhep Lushta
Kryeimam I KBI-së

E gjithë gjimnazi Solidarizohen për shami

Tër gjimnazi “Frang Bardhi” në Mitrovicë kanë bojkotuar të mërkurën mësimin në shenjë proteste kundër largimit nga shkolla të shoqeve të tyre që mbajnë shami në kokë. Por, Drejtori thotë se s’ka ndërmend ta ndryshojë vendimin e marrë.
Drejtori i gjimnazit Frang Bardhu në Mitrovicë ka mbledhur në zyrën e tij shtatë nxënëse të mbuluara me shami, duke iu kumtuar atyre se nuk mund të vazhdojnë mësimin nëse vazhdojnë të bartin shamitë.
“Ligji për shaminë për shkollat fillore dhe të mesme është aprovuar në Parlamentin e Kosovës dhe ai duhet të zbatohet”, ka thënë drejtori i gjimnazit “Frang Bardhi”, Ahmet Fazliu.
Ai tha se shkolla që ai drejton ka gjithsej 7 nxënëse me shami dhe se të martën i ka ftuar ato në zyrë dhe u ka kumtuar vendimin e Drejtorisë së Arsimit, sipas të cilit ato nuk do të kenë mundësinë të vazhdojnë procesin mësimor në të ardhmen, nëse vazhdojnë të vijnë me shami në kokë.
“Secilës nga nxënëseve ua kam dhënë vendimin e Drejtorisë së Arsimit, në mënyrë që sa më hollësisht të njoftojnë prindërit e tyre, ndërsa u kam premtuar se një javë para përfundimit të procesit mësimor do t’i ftojmë ato që t’i nënshtrohen provimeve të lëndëve për të marrë klasën dhe për t’ mos humbur vitin”, ka thënë Fazliu.
Sipas tij, ai me keqardhje është dashur ta zbatojë këtë vendim, por ky është ligji dhe ai është i obliguar ta zbatojë.
Ai kërkoi nga nxënëset t’i kthehen mësimit, sepse nëse për tre ditë mungojnë pa arsye, atëherë në bazë të ligjit nuk janë nxënëse të rregullta të kësaj shkolle dhe mund ta humbin vitin.
“Kam kërkuar nga nxënëset që të enjten të vijnë me prindërit e tyre në shkollë dhe të sqarojmë problemin”, ka thënë mes tjerash Fazliu.
Në anën tjetër, Behar Salihu, nxënës i klasës 12/17 të kësaj shkolle, tha se janë 7 klasë që kanë dalë për të protestuar kundër ndalimit të ardhjes në shkollë të shoqeve, të cilat janë të mbuluara.
Nxënëset me shami, Fatime Veliu 12/17 dhe Raza Zena 12/12, të dyja nxënëse të shkëlqyeshme, thanë se mbajtja e shamisë është e drejtë e tyre personale.
“Shamitë tona nuk duhet ta pengojnë askënd. Ne deri tani nuk kemi shkaktuar asnjë problem, por nuk kuptojmë pse të përjashtohemi tani kur kanë mbetur edhe pak muaj deri në përfundim të vitit”, thanë ato.
Edhe udhëheqësi i Lëvizjes “Koha”, Ferdi Kadriu, po ashtu nxënës i gjimnazit, theksoi se do të protestojnë në oborrin e shkollës derisa t’i lejojnë nxënëset me shami që ta vijojnë mësimin (Ksvp)



.