[Lona]

Sulm vdekjeprurës pranë aeroportit të Kabulit

Kabul, 18 shtator - Një makinë bombë ka shpërthyer në afërsi të aeroportit ndërkombëtar të Kabulit.

Policia afgane ka thënë se sulmuesi ka shpërthyer eksplozivin pranë një furgoni, që bartte punonjës të huaj të aviacionit.

Raportet e fundit flasin për tetë shtetas të huaj të vrarë dhe një afgan. Grupi afgan, Hezb-e-Islami, ka pranuar përgjegjësinë për sulmin.

Ai ka thënë se sulmi ka qenë përgjigje ndaj filmit që fyen Islamin.

“Pafajësia e Myslimanëve”, film i prodhuar në SHBA, ka nxitur protesta në gjithë botën myslimane.

Ai paraqet Profetin Muhamed si “gjysmë budalla dhe të dhënë pas grave”


Arabia Saudite bojkoton bisedimet për Sirinë

Fuqitë rajonale janë takuar për të diskutuar krizën në Siri. I ashtuquajturi “grup i kontaktit” sjell së bashku Turqinë, Arabinë Saudite, Egjiptin dhe Iranin.

Për arsye të panjohura, ministri i Jashtëm saudit, princi Saud al-Faisal, nuk ka ndjekur bisedimet në Kajro dhe nuk është dërguar askush për ta zëvendësuar.

Ministri i Jashtëm i Egjiptit, Muhamed Kamel Amer, ka thënë se grupi i kontaktit ka vendosur të takohet sërish në Nju Jork, në margjinat e Asamblesë së Përgjithshme të Kombeve të Bashkuara.

Ministri i Jashtëm i Iranit, Ali Akbar Salehi, ka thënë se katër shtetet kanë një “rol të madh” për të luajtur në Siri.

Përfaqësuesi i Turqisë, ministri i Jashtëm, Ahmet Davutogllu, ka folur për nevojën e “pronësisë rajonale të çështjeve të rajonit”.

Turqia, Arabia Saudite dhe Egjipti kërkojnë largimin nga pushteti të presidentit sirian, Bashar al-Asad, por Irani e mbështet atë.

Fuqitë botërore nuk kanë ardhur ende te një pajtim për largimin e Asadit – regjimi i të cilit përballet me revoltën popullore qysh në mars të vitit të kaluar.


Siria i bashkon shtetet më të fuqishme islame

Kajro, 18 shtator - Forcat e Lindjes së Afërt, pas takimit të parë të nivelit të lartë në Kajro, në suaza të katërshes rajonale të sapoformuar për ndërprerje të luftës qytetare në Siri, paralajmëruan se zgjidhja nuk do të vijë me lehtësi.

Në takimin e mbrëmshëm morën pjesë ministrat e Punëve të Jashtme nga e ashtuquajtura Lagjja islamike për dialog - Turqia, Arabia Saudite, Egjipti dhe Irani. Lagjja është formuar në inciativë të presidentin egjiptian Mohamed Morsi.

"Askush nuk mund të presë nga një takim të dalë plan për aksion", deklaroi shefi i diplomacisë turke Ahmet Davutogllu, duke shtuar se është e rëndësishme përpjekja rajonale për gjetje të zgjidhjes së krizës.

Ministri egjiptian i Punëve të Jashtme Kamel Amr tha se takimi nuk ka sjellë plan konkret, por se diskutimi vazhdon.