[Lona]

Vetëm kështu mund të ndalet Messi (Video)

Ylli argjentinas i futbollit, Leo Messi ka kaluar një aventurë të hidhur teksa ndodhej në Arabinë Saudite, ku kombëtarja argjentinase do të luajë një miqësore të mërkurën.

Me të zbarkuar në aeroportin ‘Mbreti Fahd’ të Riadit, lojtari është rrethuar menjëherë nga fansa dhe agjentët e sigurisë e kanë mbrojtur duke mbajtur armë në duar. Por një prej këtyre armëve është drejtuar në mënyrë të pavullnetshme në fytyrën e kampionit amerikano-jugor, që ka përjetuar momente tensioni. Gjithsesi, frika ka zgjatur pak dhe sulmuesi i Barcelonës është hipur nga agjentët në makinë për të arritur qendrën e qytetit.


Debati për “branitellat”, Xhaferi vë çakmakun mbi tavolinë

Shkup, 13 nëntor - Koordinatori i Grupit Parlamentar të BDI-së, Talat Xhaferi, ka vënë sot çakmakun përpara vetes, mbase jo për të ndezur duhan, por për të dhënë mesazhin e njëjtë figurativ me atë të një dite më parë të deputetit të PDSH-së, Ziadin Sela.
Simbolikën e çakmakut duket se e ka kuptuar drejtë kryesuesja e Komisionit për Punë dhe Politikë Sociale, deputetja e LSDM-së, Cvetanka Ivanova, e cila ka reaguar ndaj këtij gjesti dhe i ka kërkuar deputetit mënjanimin e mjetit ndezës.
Javën e kaluar, deputeti i PDSH-së, Ziadin Sela, kërcënoi me çakmakun në dorë se po qe se kalon Ligji i “branitellave”, do të djegë Parlamentin, gjest që Sela e arsyetoi më pas në një prononcim për “Nova Makedonija”.
“Atë që e thashë, e thashë figurativisht. Më habit fakti se mediat i japin më shumë rëndësi fjalëve të thëna simbolikisht, sesa faktit se po vritet demokracia në Parlament. Fjalët e mia ishin nxjerrë nga konteksti. Ajo qe thënë simbolikisht, nuk ishte për t’u djegur por për t’u ndërtuar një Parlament i vërtetë. Dhe ky i fundit, për ne është Parlamenti Dydhomësh”, ka deklaruar Sela.
Ndërkohë, sot ka filluar shqyrtimi i amendamentit të dytë të propozuar nga deputeti i RDK-së, Izet Zeqiri, me të cilin kërkohet ndryshimi i emërtimit të ligjit, gjegjësisht përfshirja e të dyja palëve konfliktuoze në titullin e tij.



Komunat gjermane kërkojnë kthimin e vizave për Maqedoninë

Berlin, 13 nëntor – Komunat gjermane kërkuan nga qeveria federale që të angazhohet për kthimin e vizave për qytetarët e Maqedonisë dhe Serbisë, ndërsa këtë e shpjegojnë me rritjen e numrit të azilkërkuesve dhe potencojnë se veç më kanë vështirësi të sigurojnë vendosjen e azilantëve në vendet e strehimit.

Sipas Gerd Landsberg, drejtor i përgjithshëm federal në komuna dhe bashkësi vendore, procedura për shqyrtimin e kërkesës së azilit do të duhej të përfundojë në afat prej tre javësh.

Vetëm në tetor të këtij viti 2.700 persona nga Serbia dhe 1.300 nga Maqedonia kërkuan azil në Gjermani. Janë parashtruar 9.950 kërkesa për azil që është pothuaj se 50 për qind më shumë se san ë shtator dhe rreth 140 për qind më shumë se në tetor të vitit 2011.


MASH-i injoron kërkesat e shkollave të Tetovës

Tetovë, 13 nëntor- Udhëheqësi i Sektorit për Veprimtari Publike pranë Komunës së Tetovës, Iljaz Halimi ka bërë të ditur të gjitha problemet me të cilat ballafaqohet ky sektor në sferën e arsimit, kulturës dhe sportit.

Ai ka theksuar se me kohë gjatë fillimit të procesit mësimor është njoftuar Ministria e Arsimit, por pavarësisht nga kjo të gjitha kërkesat që kanë bërë shkollat mbeten të paralizuara.

Sipas Halimit, ende ka nxënës që nuk i posedojnë të gjitha librat e nevojshëm, dhe për këtë shkak nxënësit dhe prindërit vazhdimisht ankohen.Ai ka bërë të ditur se disa tekste shkollore siç janë “Natyra” për klasën e katërt, “Historia” për klasën e gjashtë dhe të tetë , “Gjeografia” për klasën e gjashtë, “Arsimi muzikor” për klasën e pestë etj vazhdojnë të jenë nga autor maqedonas dhe me përmbajtje fyese për shqiptarët.“Edhe këtë vit shkollor në shumë shkolla mungon kuadri i nevojshëm teknik dhe ai profesional.

Në kërkesat e 11 shkollave fillore për punësimin edhe të 31 kuadrove për punë teknike dhe profesionale,përgjigja nga MASH është negative,që do të thotë se asnjë punësim i ri nuk është lejuar”, tha Halimi.

Sipas tij, Qeveria dhe MASH në mënyrë selektive ndan mjete për kulturën dhe nevojat tjera që kan shkollat dhe kjo shihet më së miri në buxhetin e projektuar për vitin 2013, ku me bllok dotacione nuk parashihet as edhe një denar për zhvillimin e kulturës në Komunën e Tetovës.Ministria e Arsimit edhe për vitin shkollor 2012/13 nuk ka siguruar mjete për meremetimin e shkollave.