[Lona]

Vendet e Gjirit njohin opozitën siriane

Doha, 13 Nëntor - Gjashtë shtete të Gjirit Persik kanë njohur një koalicion të ri opozitar në Siri si “përfaqësuesit legjitimë të vendit”.

Koalicioni Kombëtar për Revolucionin Sirian dhe Forcat e Opozitës u shpall të dielën në Doha të Katarit, me qëllim unifikimin e fraksioneve që kërkojnë të rrëzojnë presidentin Bashar al Assad.

Kryetari i koalicionit do të jetë Moaz al Khatib, një ish imam i xhamisë Umajad në Damask, që u largua nga Siria më herët gjatë vitit. Vendet perëndimore dhe Turqia më herët gjatë ditës mirëpritën krijimin e koalicionit.

Ndërkohë, ushtria izraelite njoftoi se tanket e saj kanë kryer “të shtëna direkte” ndaj artilierisë siriane pasi goditje mortaje siriane u qëlluan dhe ranë pranë një pike ushtarake izraelite në Lartësitë e Golanit për të dytën ditë rresht.

Një ankesë është bërë pranë komandës së forcave të OKB-së që veprojnë në zonë, pas asaj që korrespondentët e cilësuan si incidentin më të rëndë mes dy vendeve që prej luftës arabo-izraelite në vitin 1973.

Ndërkohë, në zona të tjera, aviacioni i qeverisë siriane bombardoi qytetin e kontrolluar nga rebelët, Ras al Ain, në afërsi të kufirit me Turqinë. Dy avionë dhe disa helikopterë shënjestruan qytetin, duke spostuar civilët në arrati drejt kampit turk Sejlanpinar.

Për fat të mirë, nuk janë raportuar viktima. NATO ka deklaruar se do të bëjë gjithçka për të mbrojtur Turqinë, një nga vendet anëtare të saj.

Gjatë javës së kaluar, ka pasur zëra se Aleanca mund ta furnizojë Turqinë me raketa tokë-ajër të tipit “Patriot”, në mënyrë që të mbrojë kufirin e saj.


Meksika blen 40 aeroplanë të rinj A320

Keretaro, 13 nëntor - Aviokompania meksikane Interxhet bëri të ditur se do të blejë nga Erbasi, 40 aeoplanë udhëtarësh A320.

Biznesi është me vlerë prej 32 miliardë dollarëve.

"Kontrata ka të bëjë për model të ri të aeroplanit të Erbasit, të cilët kanë shpenzim të zvogëluar të karburantit", theksoi shefi i kompanisë, Migel Aleman Velasko në forumin e biznesit në qytetin Keretaro, në shtetin me emër të njëjtë në pjesën qendrore të Meksikës.


A janë shkundur marrëdhëniet speciale të Rusisë me Gjermaninë?

Ligjvënësit gjermanë, javën e kaluar, kanë miratuar një rezolutë jodetyruese, e cila i bën thirrje kancerlares Angela Merkel që të ngrejë çështjen e të drejtave të njeriut në Rusi, kur këtë javë të takohet me presidentin Vladimir Putin në Moskë.

Bundestagu ka miratuar raportin e komisionarit për marrëdhëniet gjermano-ruse, Andreas Schockenhoff, i cili ka konstatuar hapa prapa në zhvillimin demokratik të Rusisë, me kthimin e Putinit për mandatin e tretë presidencial.

Berlini ka qenë një nga miqtë më të mirë të Rusisë në Evropë gjatë viteve të kancelarit gjerman, Gerhard Schroeder, por marrëdhëniet e tyre kanë ndryshuar nën Merkelin.

Constanze Stelzenmueller është ndjekëse e çështjeve transatlantike në Fondin Marshall të Gjermaninë.

“Mendoj se është një marrëdhënie, të cilën diplomatët gjermanë pëlqejnë ta quajnë ‘strategjike’ – marrëdhënie në të cilën nuk ndajmë shumë vlera, porse kemi nevojë për gjëra të caktuara. Aleatët, miqtë janë njerëzit me të cilët vërtet ndani vlera. Rusët nuk kualifikohen si aleatë apo miq”, thotë Stelezenmueller.

Importet ruse llogaritet se përfshijnë afërsisht një të tretën e konsumit të gazit natyror të Gjermanisë.

Marrë parasysh këtë, Merkel ka larguar Gjermaninë nga varësia me energjinë ruse, duke ndërtuar centrale qymyri. Ajo po ashtu ka qenë njëra nga kritiket më të zëshme evropiane të presidentit të Bjellorusisë, Alyaksandr Lukashenka – një aleat i afërt i Moskës.

Merkel ka nënshkruar Programin për Partneritet Lindor të Bashkimit Evropian, me gjithë kundërshtimet e Moskës. Stelzenmueller thotë se një gjë e tillë ka forcuar pozicionet e anëtareve të BE-së, si Polonia dhe Suedia, të cilat kanë favorizuar zhvillimin e lidhjeve më të ngushta me ish-fqinjët sovjetikë të Rusisë.

“Diplomacia gjermane ka qenë mjaft e lumtur për të lëvizur në sinkronizim me Stokholmin dhe Varshavën në një politikë më pro-aktive në periferinë lindore. Shembull i kësaj është politika gjermano-polake ndaj Bjellorusisë”, thotë Stelzenmueller.

Kur është shfaqur raporti i Schockenhoffit muajin e kaluar, Ministria e Jashtme ruse ka reaguar me zemërim. Ajo ka akuzuar Schockenhoffin për diskreditim të Putinit dhe ka marrë hapa radikalë, duke thënë se nuk e njeh Schockenhoffin si përfaqësues të Qeverisë gjermane.

Zëdhënësi i Merkelit, Steffen Seibert, ka thënë se reagimi i Rusisë është “i çuditshëm” dhe i ka rikujtuar Kremlinit se “Berlini vendos vetë se kush përfaqëson Qeverinë gjermane”. Ai ka konfirmuar se Schockenhoff do të udhëtojë me Merkelin në Moskë për të marrë pjesë në seancën e Dialogut të Petersburgut.

Edwuard Lucas, njohës i Rusisë, thotë se vullneti për t’u konfrontuar publikisht me Moskën, është zhvillim i ri për pushtetin e Merkelit.

“Në zemër të partisë së Merkelit shohim pakënaqësi publike me Rusinë dhe gatishmëri, në emër të Gjermanisë, për t’u zënë publikisht me të”, thotë Lucas.

Një shenjë tjetër e këtij vullneti të ri, shton Lucas, është vendimi i Gjermanisë për të gjykuar një çift spiunësh, të cilët janë arrestuar në vitin 2011 dhe besohet se kanë spiunuar për Moskën qysh në fund të viteve 1980.

Të gjitha këto zhvillime e bëjnë ogurzi udhëtimin e Merkelit në Moskë, thotë Lucas.


Zgjerohet skandali me gjeneralin Petereus, përfshihet edhe komandanti Alen

Sharlot, 13 nëntor - Komandanti i armatës amerikane në Afganistan, Xhon Alen është i përfshirë në skandalin e ish shefit të CIA-s gjenerali Petereus.

Agjent të FBI-së mbrëmë ka hyrë në shtëpinë e gruas, lidhja e dashurisë e së cilës me Dejvid Petereus solli deri te dorëheqja e tij si drejtor i CIA-s.

Zëdhënësja e FBI-së Sheli Linç deklaroi se agjentët kanë hyrë në shtëpinë e Pola Broduel në Sharlot, Karolinën Veriore. Ajo refuzoi të japë më shumë hollësi për shkaqet e ndërhyrjes.


Koreja e Veriut teston raketa

Pamje të fundit satelitore të regjistruara nga një organizatë akademike amerikane tregojnë se Koreja e Veriut ka kryer së fundmi disa teste në një impiant raketash.

Instituti SHBA-Kore në Universitetin John Hopkins ka deklaruar se analizat e imazheve tregojnë se Koreja e Veriut vazhdon të zhvillojë raketa me rreze të gjatë veprimi.

Sipas burimit, është provuar se janë kryer të paktën dy teste të motorëve të raketave që pas dështimit në prill të lëshimit të një prej raketave, njoftoi instituti.

Peniani deklaroi se lëshimi i raketës në prill kishte si qëllim vendosjen e një sateliti në orbitë, operacion ky që u kritikua nga SHBA, Koreja e Jugut dhe Japonia.

“Që nga testi i dështuar, Veriu ka kryer të paktën 2, ndoshta edhe më shumë, eksperimente të motorëve të raketave në bazën Sohae Satellite Launching Station, më i fundit prej të cilëve daton në shtator 2012”, thotë një raport i institutit.

Prova duket se ka përfshirë “motorat me karburant të lëngshëm të fazës së parë”, si për mjetin e lëshimit të satelitit ashtu edhe për një raketë me rreze të gjatë, të parë për herë të parë në paradën ushtarake të këtij viti.

Gjithashtu, ka pasur të dhëna për ndërtimin e një impianti raketash për lëshimin e tyre në të ardhmen. Raporti sugjeron më tej se Koreja e Veriut mund të kryejë teste të tjera tani që zgjedhjet presidenciale në Shtetet e Bashkuara kanë përfunduar, ndërsa në Jug do të zhvillohen në dhjetor.

“Nëse testimi i motorëve të raketave ose ndërtimi i platformave të lëshimit janë në përgatitje për këto aktivitete mbetet e paqartë”, ka shtuar institucioni.


Rusia dhe Sllovenia nënshkruajnë marrëveshje për tubacionin

Moskë, 13 nëntor - Gjiganti rus i gazit, Gazprom dhe kompania sllovene, Plinovodi, kanë nënshruar një marrëveshje për investime në seksionin slloven të ndërtimit të tubacionit të gazit të Jugut.

Shefi i Gazpromit, Aleksei Miller dhe zyrtarë të Plinovodi u pajtuan sot rreth kësaj marrëveshje në Moskë.

Kryeministri rus, Dmitry Medvedev dhe homologu i tij slloven, Janez Jansa morën pjesë në ceremoninë e nënshkrimit.

Miller tha se marrëveshja përfundimtare e investimeve do të zbulohet nesër.

Marrëveshjet përfundimtare të investimeve duhet të kryhen me çdo shtet, përgjatë rrugës ku kalon tubacioni.

Tubacioni Jugor do të kalojë në gjithë pjesën e poshtme të Detit të Zi, nga porti rus i Dzhubgas e deri te Varna në Bullgari. Një degë do të kalojë përmes Serbisë, Hungarisë, Sllovenisë dhe Austrisë, ndërsa dega tjetër përmes Kroacisë dhe Greqisë.

Tubacioni pritet që t’i nisë operimet në vitin 2015.