[Zero Cool]

Q7-shi “kalbet” në parkingun e Shpendit







Veturën zyrtare të markës “Audi Q7” e ish-kryetarit të Prishtinës, Isa Mustafa, ende nuk e ka nxjerrë në shitje kryetari i ri, Shpend Ahmeti, pavarësisht premtimeve se do ta bënte një gjë të tillë posa ta merrte “timonin” e kryeqytetit.

Për më shumë se 10 ditë pas betimit të Ahmetit, vetura të cilën e ka shfrytëzuar paraardhësi i tij në Komunë po qëndron në parkingun e këtij institucioni.

Pengesa në shitjen e kësaj veture Ahmeti do të ketë edhe nga partitë opozitare në asamblenë lokale të Prishtinës, ku lëvizja “Vetëvendosje” nuk e ka shumicën.

Nënkryetari i Komunës së Prishtinës, Dardan Sejdiu, ka deklaruar të mërkurën për “Zërin” se do ta mbajnë premtimin dhe se këtë premtim do ta realizojnë qysh në mbledhjen e parë të Kuvendit Komunal.

“Ne i qëndrojmë besnik premtimit që e kemi dhënë gjatë fushatës dhe në mbledhjen e parë do të kërkojmë që vetura të shitet. Këto para do të shfrytëzohen si të hyra vetjake të komunës”, ka deklaruar ai.