[tifozshqiptar]

Futbollisti 18-vjeçar Bajram Fetai, këto ditë ka nënshkruar një kontratë trevjeçare me skuadrën e njohur skoceze Gllasgou Rejnxhërs. Transferimi i Fetait konsiderohet punë e kryer për ekipin skocez, pasi, sipas tyre, në garë për shërbimet e Fetait kanë qenë edhe ekipe të tjera të njohura, si Inter, Ajaks, PSV Einthoven, Çarlton Atletik dhe Borusia e Dortmundit. Futbollisti shqiptar ka lindur në Maqedoni dhe është rritur në Danimarkë. Ai ka luajtur rregullisht në ndeshjet e fundit të ekipit përfaqësues danez, grup-mosha 19-vjeçare. Trajneri i Rejnxhërsit, Aleks MekLeish, dhe drejtori sportiv i këtij ekipi, Martin Bain, në orët e fundit të afatit të merkatos dimërore siguruan nënshkrimin e sulmuesit shqiptar, duke i paguar njëkohësisht një dëmshpërblim (sipas mediave britanike supozohet të jetë rreth 300.000 euro) klubit të tij danez, B93 të Kopenhagës.

Të kritikuar kohët e fundit për shkak të angazhimit të lojtarëve 30-vjeçarë dhe më të vjetër, zyrtarët e Rejnxhërsit kanë filluar të ndërtojnë një skuadër për të ardhmen. Në të, me sa duket, një rol të rëndësishëm do të ketë edhe sulmuesi i ri shqiptar.
Sipas faqes zyrtare të internetit të ekipit skocez, Fetai ka qenë më herët në ekip, ku ka kaluar një javë stërvitje. Ai e ka lënë të impresionuar stafin e trajnerëve. "Trajnerëve u pëlqeu çfarë panë te ky lojtar. Ai kishte qenë më herët këtu dhe për këtë u vumë në lëvizje për të nënshkruar kontratën. Ka pasur interes nga disa klube angleze për Bajramin, prandaj jemi të gëzuar që i siguruam shërbimet e tij,"- ka thënë për mediat skoceze drejtori sportiv i Rejnxhërsit, Bain.
Fetai nuk pritet të luajë në ekipin e parë menjëherë, por trajneri MekLeish beson se ai mund të jetë një yll i vërtetë i Rejnxhërsit në të ardhmen. "Edhe pse Bajrami ka lindur në Maqedoni, tani është shtetas danez. Madje, deri tani, ai ka luajtur 6 ndeshje për përfaqësuesen U-19 të këtij shteti. Ai është një lojtar që premton shumë. Madje unë mendoj se është shumë përpara lojtarëve të kësaj grup-moshe, që ne kemi në ekip,"- ka thënë trajneri MekLeish.
"Nuk do ta hedh menjëherë në ekipin e parë Fetain. Ai është njëri nga lojtarët e së ardhmes dhe jam i gëzuar për aftësitë që zotëron. Ky futbollist mund ta ndihmojë shumë ekipin tonë,"- ka gjykuar dhe vlerësuar në fund trajneri MekLeish.
"Kam mundur të zgjedh ndërmjet gjashtë a shtatë klubeve evropiane dhe ekipeve kryesore të Danimarkës, Brondbi dhe Kopenhagë. Gjithashtu, kam pasur ofertë nga Herenveni i Holandës dhe disa ekipe gjermane. Thjesht, vendosa për Rejnxhërsin, sepse, kur isha në prova atje, i vërejta kushtet dhe kuptova sesa klub i madh është,"- ka thënë Fetai për "The Daily Record".
Sulmuesi ka thënë se do t'i duhen disa kohë, derisa të adoptohet me jetën e re, por shton se është i gatshëm t'i tregojë aftësitë e tij në Ibroks. "Shpresoj të bëhem yll në Skoci. Megjithatë, qëllimi im i parë është të angazhohem me ekipin e parë. Futbolli skocez është i përqendruar te forca dhe loja e shpejtë. Kjo më pëlqen, sepse edhe unë e dëshiroj një gjë të tillë. Luaj shpejt dhe jam lojtar teknik. Shpresoj të përgatitem më tepër fizikisht dhe ta kombinoj këtë me teknikën time, që të bëhem lojtar i mirë,"- ka thënë Fetai në deklarimin e tij të parë për mediat skoceze, e cila nuk i ndahet. Edhe pse vetëm 18 vjeç, Fetai e ka "pushtuar" Gllasgoun... Në vitin e fundit të futbollit danez, Fetai ka shënuar 12 gola, nga 25 ndeshje që ka luajtur me B93 të Kopenhagës.