[euro]

Delegacioni 3 anëtarësh i Federatës së Hendbollit të Kosovës dhe përfaqësuesja jonë në hendboll, të mërkurën është nisur për në landin Essen të Gjermanisë, nga i cili ka marrë ftesë për pjesëmarrje në një turne.

Delegacioni 3 anëtarësh i Federatës së Hendbollit të Kosovës dhe përfaqësuesja jonë në hendboll, të mërkurën është nisur për në landin Essen të Gjermanisë, nga i cili ka marrë ftesë për pjesëmarrje në një turne.

Gjatë qëndrimit katërditor atje, zyrtarët e Federatës së hendbollit të Kosovës, do të kenë një varg takimesh me udhëheqësit më të lartë të hendbollit gjerman.

Kjo është vizita e parë zyrtare në Gjermani dhe është vazhdim i përpjekjeve në krijimin e kontakteve të reja, pas takimeve paraprake të zhvilluara në Egjipt, Maqedoni dhe Turqi me federatat përkatëse të hendbollit, që kanë ndikim të madh në mekanizmat ndërkombëtarë të kësaj disipline sportive.

Nga përzgjedhësi Tefik Mikushnica janë ftuar 12 hendbollistët më të mirë kosovarë, të cilëve në Essen do t’u bashkangjiten edhe Agron Shabani që luan në Luksemburg, Taip Ramadani nga Norvegjia dhe Ali Salihu i cili luan në Gjermani.

Udhëtimin e kombëtares e ka mundësuar Departamenti i sportit, i cili i ka mbuluar të gjitha shpenzimet.

Ndeshjen e parë, hendbollistët kosovarë do ta zhvillojnë nesër në orën 20.

Së shpejti Federata e Hendbollit e Kosovës do të ketë vizita edhe në Itali e Suedi, të cilat do t’i paraprijnë kongresit të Federatës evropiane të Hendbollit, ku pritet të shqyrtohet edhe çështja e pranimit të FHK-së në familjen e hendbollit të kontinentit të vjetër.

Gjatë këtij muaji, në Kosovë do të vijë një delegacion 3 anëtarësh i Federatës Evropiane të hendbollit.