[MemphiSx]

Sot rreth orës 10,00 nga Klina në drejtim të Skënderajt shkuan dhjetëra policë serbë me 13 automjete. Policët e veshur me këmisha antiplumb po përcilleshin me entuziazëm nga qytetarët serbë.
Dega e LDK-së njofton se atmosfera në këtë komunë i përngjan atmosferës së luftës, ndërsa një dëshmitar tha se këto forca serbe parakaluan nëpër Komoran të Gllogocit duke kënduar këngë lufte.
Nga Mitrovica njoftohet se prej mëngjesit ka pasur lëvizje të mëdha të forcave serbe. Në orën 6,30 tre autobusë me policë arritën nga Serbia në Kosovë dhe u stacionuan në kazermën e ushtrisë serbe në Mitrovicë.
Në orën 7,45 nga Mitrovica në drejtim të Skënderajt shkuan 2 autobusë e 3 picgauerë dhe disa kamionë me dhjetëra policë.
Kryesia e Degës së LDK-së në Mitrovicë njofton edhe për lëvizjet e popullsisë serbe në këtë komunë. Në lagjen Shipol thuhet se disa familje serbe i kanë lëshuar shtëpitë e tyre.
Disa dëshmitarë nga Prishtina i thanë QIK-ut se gjatë natës së mbrëmshme janë vërejtur mobilizime edhe në Qendrën e Studentëve, ku janë vendosur vetëm studentë serbë e refugjatë serbë.
Delegacioni i LDK-së, me në krye mr. Fatmir Sejdiun ka arritur në Skënderaj. Në një bisedë telefonike, z. Sejdiu e përshkroi gjendjen në këtë komunë dhe përgjithësisht në rajonin e Drenicës si shumë të rrezikshme. Ai tha se vendbanimet e sulmuara dje dhe sot nga forcat serbe kanë nevojë urgjente për ndihma mjekësore, pasi ka shumë të plagosur e disa të vrarë.
Degët e partive dhe të asociacioneve në komunën e Gllogocit e të Skënderajt vazhdojnë t’u bëjnë thirrje faktorëve ndërkombëtarë që të bëjnë presion mbi Beogradin për të ndërprerë menjëherë këtë sulm të forcave serbe.

Ora:12,00.

(1 mars 1998, Ora 10:00)
Sulmi i forcave serbe u zgjerua sot edhe në fshatrat Polac, Prekaz e LLaushë

Prishtinë, 1 mars (QIK)
Burimet e LDK-së njoftojnë sot nga Skënderaj se forcat serbe vazhduan sot në orët e mëngjesit me sulmin masiv të filluar dje.
Në një bisedë telefonike me drejtuesit e Degës së LDK-së përmes telefonit dëgjoheshin të shtëna të shumta e të fuqishme në Skënderaj e në Llaushë. Dëshmitarët thonë se forcat serbe po shtinë me armë nga autoblindat.
Burimet në Skënderaj thanë se forcat serbe po zhvillojnë sot sulme në vetë qytetin e Skënderaj dhe se e kishin zgjeruar sulmin prej fshatit Polac nëpër Prekaz e deri në Llaushë dhe se krisma ishin dëgjuar edhe nga drejtimi i fshatrave Likoshan e Çirez, që ishin dje qendra të sulmeve serbe.
Një burim në fshatin Llaushë i tha QIK-ut se në orët e hershme të mëngjesit helikopterët e forcave serbe kishin fluturuar mbi lagjet Gecaj, Rrecaj e të tjerë dhe se pastaj kishin filluar të shtënat prej helikopterëve në drejtim të shtëpive. Rreth orës 9,00 më nuk dëgjoheshin krisma, mirëpo në këtë kohë në fshat arritën forca të mëdha serbe prej drejtimit të Mitrovicës. Një dëshmitar nga vendi i ngjarjes tha se pjesëtarët e forcave serbe që arritën me këta kamionë u nisën këmbë në drejtim të fshatit Prekaz. Ai shfaqi drojën se forcat serbe po synonin të vendosnin një gjendje të rrethimit në këtë fshat para sulmit.
Në orën dhjetë një burim i LDK-së tha se forcat serbe ishin tërhequr nga fshati Polac, në të cilën kishin qëndruar prej ditës së djeshme. Ai tha se forcat serbe kishin urdhëruar dje largimin e disa familjeve nga ky fshat.
Nga Drenica bëhet me dije se gjatë sulmit të djeshëm të forcave serbe është shtënë në dy familje të Prekazëve të Çirezit në fshatin Çirez dhe se me atë rast janë vrarë disa anëtarë të asaj familjeje, në mes tyre edhe gra. Siç dihet, policia serbe njoftoi dje se gjoja në forcat serbe në një shkëmbim zjarri kishin vrarë pesë "terroristë". Dyshohet se policia serbe i numron si terroristë anëtarët e këtyre dy familjeve që u vranë në shtëpitë e tyre prej të shtënave të forcave serbe.
Kryetari i Degës së LDK-së në Skënderaj Idriz Rreci u bëri sot në mëngjes një apel dramatik përmes QIK-ut institucioneve e partive politike shqiptare dhe faktorëve ndërkombëtarë që të ndërhyjnë për ta shpëtuar këtë rajon nga sulmi i paralajmëruar i forcave serbe dhe nga pasojat e sulmit të djeshëm. Burimet nga Skënderaj flasin për dhjetëra të vrarë e të plagosur gjatë sulmeve të djeshme. Mirëpo deri më tash nuk ka njoftime në mos institucionet e asociacionet shëndetësore të Kosovës dhe ato nbdërkombëtarë që kanë zyrat e veta në Kosovë të kenë ndërmarrë diçka për të ndërhyrë në mbrojtje të popullsisë së masakruar.
Sulmi i djeshëm dhe i sotëm i forcave serbe në Drenicë ka shkaktuar shqetësim të madh në mbarë Kosovën. Gjatë natës dhe sot në Qendrën për Informim të Kosovës janë paraqitur me telefon dhjetëra e dhjetëra qytetarë nga Kosova dhe mërgimtarë tanë në botë për t’u informuar me zhvillimet në komunët e Gllogovcit dhe të Skënderajt.
Me qëllim që të informimit më të mirë me situatën në Drenicë sot në mëngjes për këtë rajon u nis një delegacion i Kryesisë së LDK-së.
Nga Gllogoci deri më tash nuk ka njoftime për pasojat e sulmit të djeshëm as për vazhdimin e sulmit të sotëm. Siç dihet sulmi filloi dje në Likoshan dhe pastaj u përhap në venbanimet për rreth rrugës Glogoc - Likoshan - Polac - Skënderaj.
Ora:10,00.


Prishtinë, 31 mars (QIK)

Kryetari i Republikës së Kosovës, dr. Ibrahim Rugova priti sot një delegacion të Asamblesë Nacionale të Francës, të përbërë nga Pjer Brana, Fransua Lonkl dhe Rene Andre. Delegacioni po qëndron në Prishtinë për t’u njohur nga afër me gjendjen e përgjithshme në Kosovë.

Në një bisedë të gjatë e të përzemërtë, kryetari Rugova i bëri një prezentim të përgjithshëm gjendjes në Kosovë. Ai foli për mundësitë e zgjidhjes paqësore e me dialog të çështjes së Kosovës, mirëpo përveç dhunës disavjeçare sistematike, regjimi serb gjatë muajve të parë të këtij viti ndërmori një varg aksionesh të mëdha në disa fshatra të Drenicës e të Deçanit, duke masakruar fëmijë, gra e pleqë dhe duke djegë fshatra të tëra të këtij rajoni.

Kryetari Rugova bëri thirrje për një trysni të fuqishme e të vazhdueshme mbi Beogradin nga SHBA-të dhe nga Unioni Evropian që të tërheqë forcat speciale nga Kosova.

Duke folur për identitetin historik, politik dhe juridik të Kosovës, kryetari i Republikës përkujtoi se në ish-federatën jugosllave, Kosova ishte njëra nga tetë njësitë përbërëse të barabarta. Ai tha se pas rrethanave që u krijuan në fillim të viteve të ‘90-ta, populli i Kosovës shfrytëzoi të drejtën e deklarimit të vullnetit politik me referendum për pavarësinë e Kosovës.

Në bisedë me parlamentarët francezë, kryetari Rugova tha se Republika e Kosovës, shtet i pavarur e neutral, me garanca për serbët lokalë dhe për interesat e tyre, është zgjidhja më e mirë. Kjo zgjidhje do ta qetësonte Maqedoninë, Shqipërinë dhe vetë Serbinë, konstatoi kryetari Rugova. Ai theksoi se të gjitha partitë politike shqiptare kanë konsenzus për pavarësinë e Kosovës dhe për zgjidhjen paqësore e me dialog të çështjes së Kosovës.

Ai rikujtoi se udhëheqja e Kosovës vazhdimisht ka kërkuar dhe kërkon që çështja e Kosovës të zgjidhet me negociata me Beogradin me ndërmjetësimin ndërkombëtare. Prania e palës së tretë ndërkombëtare në relacionin SHBA-të dhe UE-ja nuk është parakusht, por një mjet i domosdoshëm për vendosjen e dialogut dhe për garantimin e implementimit të marrëveshjes eventuale, vuri në pah kryetari i Republikës së Kosovës.

Delegacioni i Asamblesë Nacionale të Francës u interesua për gjendjen në Kosovë dhe për mundësitë e zgjidhjes së kësaj çështjeje. Ata theksuan se Franca angazhohet për një zgjidhje të drejtë e me negociata.

Pasi e përgëzuan kryetarin Rugova për zgjedhjet parlamentare e presidenciale të 22 marsit, anëtarët e delegacionit të Asanblesë Nacionale të Francës ia dorëzuan kryetarit të Republikës së Kosovës ftesën e kryetarit të Komisionit për Politikë të Jashtme Zhak Lang për ta vizituar Francën.

Kryetari Rugova e pranoi ftesën me kënaqësi dhe falënderoi parlamentarët dhe qeverinë franceze për angazhimin e vazhdueshëm për çështjen e Kosovës.



Forcat serbe tentojnë t’i frikësojnë shqiptarët e komunës së Skënderaj



Prishtinë, 1 prill (QIK)

Dje forcat ushtarake serbe kanë lëvizur në fshatin Kopiliq i Ulët dhe kanë shtënë me armë nga autoblinda në drejtim të shtëpive të fshatit me ç’rast banorët janë detyruar të braktisin fshatin.

KI i degës së LDK-së në Skënderaj njofton se brenda pesë ditëve të fundit, frika që banorët e këtij lokaliteti e përjetojnë nga të shtënat ka shkaktuar tashmë vdekjen natyrore të disa personave të moshuar dhe kufomat e tyre janë varrosur jashtë vendlindjes së tyre.

Sofije Gashi-Veseli nga Kopiliqi i Ulët u varros në fshatin Likofc, Halil Hoti nga Broja u varros në fshatin Grapc, komuna e Klinës, Arife Hetemi nga Broja u varros në Turjan afër Vojnikut. Ali Rrahmanin nga Turiqefci të cilën policia serbe e ka vrarë, të afërmit e tij e nxorën pas 12 ditësh nga morgu i Pejës dhe e varrosën në fshatin Gjurgjevik të komunës së Klinës.

Gjithashtu ju informojmë, thuhet në njoftimin e këtij këshilli inmformativ se edhe dy të rinjë të cilët kanë qenë në listën e të humburve, Avni Gjinovci nga Makermali dhe Enver Keçolli nga fshati Tice janë gjetur dhe se janë në gjendje të mirë shëndetësore.

Po sot më 1 prill, në ora 15,15 një aeroplan ushtarak me fluturim të ulët ka lëvizur nëpër Gllogoc dhe ka shkuar në drejtim të Skëndrajt.



Jehona e Rezolutës së KS të OKB-së në shtypin suedez



Prishtinë, 1 prill (QIK)

Në shtypin dhe masmediat e tjera suedeze i parë dhe kryesor ishte rezoluta e Këshillit të Sigurimit të Kombeve të Bashkuara kundër Jugosllavisë. Varësisht prej redaksive që transmetonin këtë lajm të dorës së parë jepej shkurt dhe qartë informacioni se Këshilli i Sigurimit të KB ka aprovuar rezolutën me të cilën Jugosllavisë së mbetur, për shkak të Kosovës i

vehen sanksionet dhe embargoja për importim të armëve. Rezoluta u aprovua pa asnjë votë kundër. Në momentin e fundit "për" votoi edhe përfaqësuesi i

Rusisë pas trysnisë amerikano-angleze dhe pas vlerësimit shumë serioz se situata në Kosovë paraqet rrezik jo vetëm për rajonin e Ballkanit, por

edhe për Evropën dhe botën. Madje përfaqësuesi i Suedisë në Këshillin e Sigurimit me këtë rast deklaroi se paqja në Ballkan, në Evropë e më gjerë varet nga situata në Kosovë.

Kundër aprovimit të kësaj rezolute më së tepërmi u ekspozua përfaqësuesi i Kinës. Ai mbronte qëndrimin (përkundër të tjerëve) se "çështja e Kosovës është çështje e brendshme e Serbisë". Por, pikërisht për shkak se përfaqësuesit e tjerë në Këshillin e Sigurimit vlerësonin drejt seriozitetin e "bombës së kurdisur" të quajtur Kosovë, Kina nuk përdori veton, por abstenoi.



Asnjë votë kundër-Kina abstenoi



Prishtinë, 1 prill (QIK)

Agjencia e shtypit (BELGA) informon sot nga Nju Jorku për votimin e rezolutës së Këshillit të Sigurimit të OKB-së për embargo armësh kundër Beogradit.

Në tekstin e agjencisë thuhet se OKB-ja votoi Rezolutën për embargo në armë kundër Beogradit.

Këshilli i Sigurimit të OKB-së aprovoi të martën një Rezolutë për embargo të armëve kundër të Beogradit. Këto sanksione kanë për qëllim të detyrojnë Republikën Federale të Jugosllavisë (RFJ) që të fillojë pa kusht

dialogun me shqiptarët, "në mënyrë që t’i akordohet një autonomi e zgjeruar kësaj krahine të jugut të Serbisë ku shqiptarët janë shumicë".

Në njoftim thuhet se rezoluta 1160 u aprovua me 14 vota për, në mesin e tyre Rusia, dhe një abstenim, ai i Kinës.

Kjo embargo e OKB-së e cila aplikohet menjëherë, i shtohet sanksioneve të Unionit Evropian në mesin e të cilave është edhe embargoja mbi armët. Por rezoluta nuk parasheh sanksione të tjera nëse presidenti jugosllav, Sllobodan Millosheviq nuk lëshon pe ndaj urdhërave të OKB-së.

OKB-ja i pat hequr Beogradit në vitin 1996 të gjitha sanksionet gjatë katër viteve të luftës në ish-Jugosllavi, thuhet në raportin e sotëm të kësaj agjencie belge nga Nju Jorku.



A mund të minohet marrëveshja e arsimit



Prishtinë, 1 prill (QIK)

Ish-ministri i arsimit në qeverinë e Milan Paniqit, dr. Ivan Iviq, duke vlerësuar aneks-marrëveshjen e arsimit të grupit 3+3 i deklaroi gazetës "N. borba" se shikuar në mënyrë afatshkurtër kjo marrëveshje nuk mund të vehet në lojë, sepse është më konkrete se e mëparshmja. Iviqi megjithatë shpreh dyshimin se edhe kjo marrëveshje mund të minohet me konflikte spontane apo të provokuara. Kjo marrëveshje, sipas tij, për palën shqiptare do të thotë shumë, sepse "ata deri tash kanë punuar në kushte të mjerueshme", ndërsa sudentët serbë, sipas Iviqit "kanë të drejtë", sepse shqiptarët morën një mirënjohje të veçantë që u mundëson të rrumbullakësojnë sistemin e arsimit.

Duke "arsyetuar" pakënaqësinë e palës serbe, Iviq thotë se janë të rrezikuara interesat e studentëve dhe të grupeve udhëheqëse, siç është ajo e rektorit serb dhe e një numri të arsimtarëve të cilët në atë universitet të predimensionuar serb në Prishtinë kanë marrë tituj që kurrë nuk do të mund t’i merrnin në ndonjë universitet tjetër të Serbisë. Edhe nga aspekti ligjor, thotë Iviq, serbët nuk kanë të drejtë t’ua mohojnë shkollimin universitar shqiptarëve.



Raport i Grupit Britanik të Helsinkit mbi Konfliktin e Parlamentit Shqiptar me Gjykatën

Prishtinë, 1 prill (QIK)

Grupi britanik i Helsinkit për të drejtat e njeriut akuzoi qeverinë shqiptare për shkeljen a pavarësisë së gjyqësorit, njofton ATSH.

Organizata për mbrojtjen e të drejtave të njeriut nxori një raport në të cilin analizon marrëdhëniet midis parlamentit të Shqipërisë dhe Gjykatës Kushtetuese.

Ndërsa bota e ka përqendruar vemendjen në trazirat e javëve të fundit në Kosovë, thuhet në raport, Parlamenti shqiptar i mbizotëruar nga Socialistët e ka çuar konfliktin e tij të pareshtur me Gjykatën Kushtetuese në nivele kritike. Më 14 shkurt, parlamenti shkarkoi kryetarin e kësaj gjykate, zotin Rustem Gjata, duke e akuzuar se kishte bashkëpunuar vullnetarisht me Sigurimin e Shtetit. Dy ditë më vonë zyrtarë të policisë, me urdhër të minsitrit të Brendëshëm, Neritan Ceka e larguan me forcë zotin Gjata nga zyra.

Grupi britanik i Helsinkit për të drjtat e njeriut thekson se ky akt jo vetëm që është një sulm tjetër kundër pavarësisë së degës juridike të pushtetit, por njëkohësisht përbën shkelje të ligjit kushtetues. Grupi britanik i Helsinkit argumenton se veprimet e Parlamentit shqiptar lidhur me Gjykatën Kushtetuese përbëjnë shkelje të rënda procedurale, me motive politike.

Në Shqipëri ligji parashikon zgjedhjen e kryetarit të Gjykatës Kushtetuese nëpërmjet një procesi votimesh nga gjykatës së tjerë. Parlamenti ka në kompetencë emërimin e disa anëtarëve të Gjykatës Kushtetuese, por shkarkimi i tyre nuk është në kompetencën Parlamentit.

Grupi britanik i Helsinkit për të drejtat e njeriut është i mendimit se konflikti midis Parlamentit dhe Gjykatës Kushtetuese i ka rrënjët në vendimet e kësaj të fundit sipas së cilës dega ekzekutive nuk mund të bllokojë pasurinë e një firme private pa ndjekur procedurën ligjore, siç ishte në vitin e kaluar rasti i firmës VEFA. Po ashtu Gjykata Kushtetuese ka pasur konflikte serioze me Parlamentin lidhur me rotacionin e anëtarëve të saj. Po aq konfliktuoze, sipas raportit të grupit britanik të Helsinkit është edhe praktika e Komisionit për verifikimin e Figurave. Ndërsa ky komision akuzon kryetarin e Gjykatës Kushtetuese si ish- agjent të Sigurimit të Shtetit, shih ironinë, edhe kryetari i këtij komisioni, z. Nazif Bezhani është akuzuar si ish-agjent i Sigurimit.

Spastrimet e degës juridike nga parlamenti, thuhet në raport, janë kryer edhe në nivele më të ulta të saj.

Tubim i nëndegës së LDK-së në Zvicër



Prishtinë, 1 prill (QIK)

Kryesia e Nëndegës së LDK-së në Baden Wettingen mbajti sot një tubim informativ lidhur me situatën aktuale në Kosovë.

Tubimin e e kryesoi kryetari i nëndegës z.Nuhi Halili kurse në të moripjesë edhe z.Pjetër Arbnori, ish-kryetar i Parlamentit të Shqipërisë dhe znj. Suzana Arbnori. Ishin të ftuar edhe këshilltari i Qeverisë së Kosovës dhe anëtarët e Kryesisë së Degës së LDK-së në Zvicër.

Temë diskutimi ishte ndihmava për Drenicën dhe me këtë rast u tha se në këtë nëndegë u grumbulluan mbi 300 mijë franga zvicerane.

Në fund të këtij tubimi iu dërgua një telegram përshëndetës Dr. Ibrahim Rugovës për rizgjedhjen - President i Republikës së Kosovës.

"Nëndega e LDK-së Baden Wettingen në Zvicër me komisionin për "tre përqindësh" ka nderin që t’ju përgëzojë përzemërsisht për rizgjedhjen tuaj kryetar i Republikës së Kosovës.

Rizgjedhja juaj e vulosi plebishitin për pavarësi të Kosovës", thuhet veç tjerash në telegramin e nënshkruar nga Nuhi Halili, kryetar i Nëndegës LDK-së në Baden Wettingen.
Prishtinë, 1 prill (QIK)

Gjendja në Skënderaj dhe fshatrat përreth është edhe sot tepër e rëndë, njofton Komisioni për Informim i Degës së LDK-së. Forca të mëdha policore-ushtarake edhe më tej janë të fortifikuara në kondrinat që ndajnë Skënderajn me Llaushën. Në këtë hapësirë janë të vendosur armë të shumta artilerike, me të cilat kontrollohet Llausha dhe Skënderaj.

Burimet e LDK-së në fshatin Marinë, sot janë shtuar shumë forcat e armatosura, të cilat sot po hapin llogore të reja. Kërcënimi për shatin Marinë, Rezallë, Polac etj. është evident dhe janë shumë reale mundsitë e një sulmi të afërt.

Se sa janë të izoluara disa fshatra, flet shembulli i foshnjës së vdekur 14- muajshe, Marigonë Vojvoda, nga Llausha. Foshnja ishte bashkë me prindërit në një fshat të afërm,mirëpo prindërit nuk patën mundsi të varrosnin në Llaushë, prandaj e varrosën në Polac, edhepse këto dy fshatra janë fare pranë njëri-tjetrit.

Dje, përveç në Marinë e Llaushë, ku në orët e hershme të mëngjesit ka pasur të shtëna të shumta. Të shtëna ka pasur edhe në fshatin Brojë, ku si pasojë është plagosur Violeta Hoti, 18 vjeçe.

Sot është dita e dytë e rifillimit të mësimit në dhjetë shkolla fillore. Numri i nxënësve që ndoqi sot mësimin, në krahasim me dje, është solid.

Ndihmat nga Këshilli Qendror i Emergjencës dhe asociacione tjera humanitare kanë arritut edhe dje, mirëpo në sasi jo të mjaftueshme. Ato ndihma që kanë arritur janë shpërndarë në terren, thuhet në njoftimin ditor të Komisionit për Informim të Degës së LDK-së në Skënderaj.



Gjendje e rëndë në Deçan



Prishtinë, 1 prill (QIK)

Në mbledhjen e jashtëzakonshme të Kryesisë së LDK-së, Dega në Deçan, në të cilën mori pjesë edhe Nimon Alimusaj, anëtar i Kryesisë qendore të LDK-së, u shqyrtua situata politike dhe e sigurisë në komunën e Deçanit pas sulmit ushtarako-policor në Gllogjan të datës 24 mars, njofton Komisioni për Informim i Degës së LDK-së në Deçan.

Me këtë rast u potencua se situata në territorin e kësaj komune edhe përkundër të dhënës se tani nuk ka sulme policore, është tejet e nderë, veçmas në Gllogjan ku njerëzit kanë braktisur vatrat e tyre.

Z. Alimusaj tha se njerëzit që përhapin panikë në fshatrat e Deçanit dhe në trevat tjera të Kosovës, janë në shërbim të luftës psikolgojike që ushtron pushtuesi. Ai apeloi edhe për kthimin e njerëzve në vatrat e veta.



Të shtëna me armë nga shtëpia e një serbi në fshatin Dobresh



Prishtinë, 1 prill (QIK)

Siç u njoftuam nga Komisioni për Informim i LDK-së, nëndega e fshatit Drobesh në këtë lokalitet në orët e vona të mbrëmjes së 31 marsit e deri sot në çastet kur po lajmërojmë, ora 12, në familjen e Miladin Jovanoviqit, nga i njëjti fshat, nga disa pjesëtar të nacionalitetit serb dhe malazez, është shtënë kohë paskohe nga armë të lehta të kalibreve të ndryshme. Bëhet e ditur se kishte prezentë edhe pjesëtarë të policisë.

Preteksti i këtyre të shtënave nuk dihet. Ndër banorët shqiptarë e veçanërisht tek nxënësit, është përhapur njëndjenjë frike dhe pasigurie. Ky lokalitet është i banuar me shqiptarë dhe shtëpia në fjalë është në fqinjësi me familje shqiptare.

Me të marrë informatën e parë një pjesë e kryesisë së Degës së LDK-së në Viti vizitoi këtë lokalitet dhe për së afërmi u njoftua me gjendjen.

Kryetari Rugova priti një delegacion të Unionit Evropian



Prishtinë, 1 prill (QIK)

Kryetari i Republikës së Kosovës, dr.Ibrahim Rugova priti sot një delegacion të Komisionit të Unionit Evropian, i cili kryesohej nga ambasadori i Britanisë së Madhe në Beograd, Brajan Donelli.

Gjatë bisedës delegacioni i Komisionit të UE-së u interesua për situatën e përgjithshme në Kosovë, veçmas për gjendjen në shkollë dhe për mbarëvajtjen e zbatimit konkret të marrëveshjes për arsimin.

Duke folur për gjendjen në kosovë, kryetari Rugova theksoi se ajo vazhdon të jetë tepër e rëndë, si pasojë e ndërhyrjeve të forcave serbe në disa pjesë të Kosovës. Ai ritheksoi gatishmërinë e udhëheqjës së Kosovës për realizimin e vullnetit për pavarësi të popullit të Kosovës me negociata me Beogradin me ndërmjetësimin e palës ndërkombëtare.

I ngarkuari me punë në delegacionit të Komisionit të UE-së në beograd - Majkëll Greem, dhe shefi i Sektorit për Shqipërinë dhe shtetet e dala nga ish-Jugosllavia - dr.Hansjorg Kreçmer folën për gatishmërinë e këtij Komisioni për të ndihmuar paisjen e objekteve ekzistuese shkollore dhe për ndërtimin e objekteve të reja, të cilat do të shfrytëzoheshin nga të gjithë në Kosovë.

Kryetari Rugova falënderoi Unionin Evropian dhe Britaninë e Madhe si kryesuese për angazhimin dhe gatishmërinë për të ndihmuar sgmentet e ndryshme të jetës në Kosovë dhe zgjidhjen paqësore të çështjes së Kosovës.



Këshilli i Sigurimit të OKB-së miratoi një rezolutë për embargon e armëve ndaj "RFJ"



Prishtinë, 1 prill (QIK)

Këshilli i Sigurimit të OKB-së miratoi mbrëmë, më 31 mars 1998, një rezolutë për embargon e armëve ndaj "RFJ". Përveç Kinës, të gjitha anëtaret e Këshillit të Sigurimit votuan për këtë rezolutë. Më poshtë po japin tekstin integral të kësaj rezolute që mban numrin 1160.

Këshilli i Sigurimit:

Duke iu referuar me kënaqësi deklaratave të ministrave të jashtëm të Francës, Gjermanisë, Italisë, Rusisë, Britanisë së Madhe dhe Shteteve të Bashkuara të Amerikës (Grupi i Kontaktit) të 9 e 25 marsit të vitit 1998 në të cilat propozohet një embargo përmbajtësore e armëve ndaj Republikës Federative të Jugosllavisë, duke përfshirë edhe Kosovën, duke mirëpritur vendimin e sesionit special Këshillit të përhershëm të OSBE-së të 11 marsit 1998;

Duke dënuar përdorimin e forcës së tepruar nga policia serbe kundër civilëve dhe demonstruesve paqësorë në Kosovës, si dhe të gjitha aktet terroriste të Ushtrisë Çlirimtare të Kosovës apo të cilitdo grup a individ, si dhe duke dënuar përkrahjen nga jashtë të aktiviteteve terroriste në Kosovë, përfshirë financimin, dërgimin e armëve dhe ushtrimin e personave;

Duke theksuar se deklarata e 18 marsit 1998 e presidentit të Republikës së Serbisë mbi procesin politik në Kosovë;

Duke theksuar po ashtu zotimin e qartë të përfaqësuesve të lartë të popullit shqiptar të Kosovës për mosdhunë;

Duke theksuar se ka pasur pak përparim në zbatimin e veprimeve të përfshira në deklaratën e 9 marsit 1998 të Grupit të Kontaktit, por duke theksuar se kërkohet përparim i mëtejmë;

Duke konfirmuar vendosmërinë e shteteve anëtare për sovranitetin dhe integritetin territorial të Republikës Federale të Jugosllavisë;

Duke u mbështetur në Kreun VII të Kartës së OKB-së:

1. Kërkon nga Republika Federale e Jugosllavisë që menjëherë të ndërmarrë hapa të tjerë të nevojshëm për të arritur një zgjidhje politike të çështjes së Kosovës përmes dialogut dhe të zbatojë veprimet e theksuara në deklaratat e Grupit të Kontaktit të 9 dhe 25 marsit të vitit 1998;

2. Kërkon nga udhëheqja e shqiptarëve të Kosovës të dënojë të gjitha veprimet terroriste dhe thekson se të gjitha elementet e shoqërisë shqiptare në Kosovë duhet të kërkojnë realizimin e synimeve të tyre vetëm me mjete paqësore;

3. Thekson se mënyra për ta mposhtur dhunën dhe terrorizmin në Kosovë është që autoritetet në Beograd t’u ofrojnë shqiptarëve të Kosovës një proces të mirëfilltë politik;

4. Kërkon nga autoritetet në Beograd dhe nga udhëheqja e shqiptarëve të Kosovës që urgjentisht dhe pa parakushte të fillojnë një dialog kuptimplotë rreth statusit politik, dhe thekson gatishmërinë e Grupit të Kontaktit për ta ndihmuar një dialog të këtillë;

5. Pajtohet, pa paragjykuar rezultatin e atij dialogu, që sipas propozimit të Grupit të Kontaktit në deklaratat e 9 dhe 25 marsit, se parimet për një zgjidhje të problemit të Kosovës duhet të mbështeten në integritetin territorial të Republikës Federale të Jugosllavisë dhe duhet të jenë në pajtueshmëri me standardet e OSBE-së, përfshirë ato të parashtruara në aktin final të Helsinkit të KSBE-së të vitit 1975 dhe Kartës së OKB-së dhe se një zgjidhje e tillë duhet të ketë parasysh të drejtat e shqiptarëve të Kosovës dhe të gjithë të tjerëve që jetojnë në Kosovë. Shpreh përkrahjen për një status të lartë për Kosovën i cili do të përfshinte një shkallë substancialisht të lartë të autonomisë dhe vetadministrim kuptimplotë;

6. Përshëndet nënshkrimin e marrëveshjes së 23 marsit 1998 për implementimin e Marrëveshjes së arsimit të vitit 1996. Kërkon nga të gjitha palët të sigurojnë që implementimi i saj të kalojë pa pengesa dhe pa vonuar, sipas orarit të paraparë dhe shpreh gatishmërinë të marrë parasysh masa, në rast se cilado nga palët pengon zbatimin e saj;

7. Çmon përpjekjet e OSBE-së për të gjetur një zgjidhje paqësore të krizës në Kosovë përmes përfaqësuesit personal të kryetarit të radhës së OSBE-së për RFJ-në, i cili gjithashtu është përfaqësues special i Unionit Evropian. Përkrah kthimin e misionit afatgjatë të OSBE-së;

8. Vendos që për hir të paqes dhe stabilitetit në Kosovë, të gjitha shtetet, përmes qytetarëve të tyre apo nga territoret e tyre, apo duke përdorur anijet dhe aeroplanët me flamuj të vet, të pengojnë furnizimin e RFJ-së, përfshirë Kosovën, me armë dhe materiale të të gjitha llojeve që kanë të bëjnë me armatimin, siç janë municioni, automjetet ushtarake, pajisja dhe pjesët rezervë të tyre, si dhe të pengojnë armatimin dhe ushtrimin e aktiviteteve terroriste në territorin e shteteve të tyre;

9. Vendos që në pajtim me pikën 28 të Rregullores së vet, të krijojë një komitet të Këshillit të Sigurimit i përbërë nga të gjitha shtetet anëtare të Këshillit. Ky komitet duhet të kryejë detyrat e mëposhtme dhe t’i raportojë Këshillit si dhe t’i paraqesë vëzhgimet dhe rekomandimet e veta:

a) të kërkojë nga të gjitha shtetet informacione lidhur me veprimet e tyre rreth implementimit efektiv të ndalesave të aprovuara me këtë rezolutë;

b) të marrë parasysh çfarëdo informacioni nga cilido shtet lidhur me shkeljen e ndalesave të miratuara në këtë rezolutë dhe të rekomandojë masa adekuate kundër veprimeve të tilla;

c) që ky komitet të hartojë raporte periodike për Këshillin e Sigurimit lidhur me shkeljet e mundshme të ndalesave të miratuara në këtë rezolutë;

d) të përvijojë një plan për të ndihmuar implementimin e ndalesave të përfshira në këtë rezolutë;

e) të studiojë raportet e paraqitura në pajtim me paragrafin 12 të këtij teksti;

10. Kërkon nga të gjitha shtetet si dhe organizatat ndërkombëtare e rajonale të veprojnë me përpikëri dhe në pajtueshmëri me këtë rezolutë pa marrë parasysh të drejtat ose obligimet e dhëna sipas ndonjë marrëveshjeje ndërkombëtare apo ndonjë kontrate të bërë para hyrjes në fuqi të ndalesave të parashtruara në këtë rezolutë. Thekson rëndësinë e vazhdimit të implementimit të Marrëveshjes mbi Kontrollin Subrajonal të armëve të nënshkruar në Firencë më 14 qershor 1996;

11. Kërkon nga sekretari i përgjithshëm (OKB) t’i sigurojë Komitetit (shih paragrafin 9) gjithë ndihmën e nevojshme dhe të kryejë të gjitha aranzhmanet e nevojshme rreth këtij qëllimi në Sekretariat;

12. Kërkon nga shtetet që brenda 30 ditëve pas miratimit të kësaj rezolute t’i raportojnë Komitetit (paragrafi 9) për hapat që ato kanë ndërmarrë për përmbushjen e ndalesave të parashtruara në këtë rezolutë;

13. Fton OSBE-në që ta informojë vazhdimisht Sekretarin e Përgjithshëm (OKB) për situatën në Kosovë dhe për masat që kjo organizatë ka ndërmarrë atje;

14. Kërkon nga Sekretari i Përgjithshëm (OKB) ta informojë vazhdimisht Këshillin dhe t’i raportojë atij për situatën në Kosovë dhe për implementimin e kësaj rezolute jo më vonë se 30 ditë nga miratimi i saj. Ai për situatën në Kosovë duhet të raportojë në çdo 30 ditë;

15. Kërkon nga Sekretari i Përgjithshëm që pasi të jetë konsultuar me organizatat adekuate rajonale të përfshijë në raportin e tij të parë rekomandimet për krijimin e një regjimi të mirëfilltë për mbikëqyrjen e zbatimit të ndalesave të parashtruara në këtë rezolutë. Kërkon nga të gjitha shtetet, posaçërisht shtetet fqinje, të bashkëpunojnë plotësisht në këtë drejtim;

16. Vendos të vëzhgojë situatën duke u mbështetur në raportet e Sekretarit të Përgjithshëm si dhe vlerësimet e Grupit të Kontaktit, OSBE-së, Unionit Evropian etj. Vendos po ashtu të rishqyrtojë ndalesat e parashtruara në këtë rezolutë, përfshirë veprimet për ndërprerjen e tyre pas udhëzimeve dhe vlerësimeve të Sekretarit të Përgjithshëm se Qeveria e Republikës Federale të Jugosllavisë në bashkëpunim konstruktiv me Grupin e Kontaktit: a) ka filluar dialogun e mirëfilltë sipas paragrafit 4 të kësaj rezolute, përfshirë pjesëmarrjen e një përfaqësuesi ose përfaqësuesve të jashtëm në rast se një dialog i tillë nuk ka sukses për shkak të qëndrimit të autoriteteve të Republikës Federale të Jugosllavisë apo të Serbisë;

b) ka tërhequr njësitë e policisë speciale dhe ka ndërprerë veprimet e forcave të sigurisë kundër popullsisë civile;

c) ka lejuar hyrjen në Kosovë të organizatave humanitare si dhe të përfaqësuesve të Grupit të Kontaktit dhe të ambasadave të tjera;

d) ka pranuar misionin e përfaqësuesit personal të kryetarit të radhës së OSBE-së për RFJ-në, i cili do të marrë një mandat të ri dhe të posaçëm për problemet në Kosovë, si dhe ka pranuar kthimin e misionit afatgjatë të OSBE-së;

e) i ka ndihmuar komisionarin e lartë për të Drejtat e Njeriut të OKB-së në Kosovë;

17. Kërkon nga Zyra e Prokurorit të Gjyqit Ndërkombëtar (Hagë) i themeluar në bazë të rezolutës 827 (të 25 majit 1993) që të fillojë mbledhjen e informatave lidhur me dhunën në Kosovë të cilat mund të hyjnë në mandatin e kësaj zyre. Thekson se autoritetet e Republikës Federale të Jugosllavisë janë të obliguara të bashkëpunojnë me Tribunalin dhe me shtetet e Grupit të Kontaktit për t’i vënë në dispozicion këtij Tribunali informacionet relevante që këto autoritete i kanë;

18. Thekson se përparimi konkret në zgjidhjen e çështjeve serioze politike dhe të të drejtave të njeriut në Kosovë do të përmirësojnë pozitën ndërkombëtare të Republikës Federale të Jugosllavisë dhe mundësitë për normalizimin e marrëdhënieve të saja ndërkombëtare si dhe pjesëmarrje të plotë në institucionet ndërkmobëtare;

19. Thekson nëse nuk bëhet përparim konstruktiv drejt zgjidhjes paqësore të situatës në Kosovë do të shqyrtojë masa të tjera;

20. Këshilli vazhdon të jetë i angazhuar me këtë çështje.



Xh. Mustafa: Moment i rëndësishëm për ndërkombëtarizimin e çështjes së Kosovës



Prishtinë, 1 prill (QIK)

Xhemail Mustafa, këshilltar për informim i kryetarit të Republikës së Kosovës, dr.Ibrahim Rugova i deklaroi QIK-ut se rezoluta e Këshillit të Sigurimit të OKB-së për embargon e armëve kundër regjimit të Beogradit është një moment i rëndësishëm për afirmimin e mëtejshëm të çështjes së Kosovës dhe për krijimin e parakushteve për zgjidhjen e saj paqësore e me dialog.

Me këtë rezolutë çështja e Kosovës arrin shkallën më të lartë të ndërkombëtarizimit politik dhe kjo është meritë e vendeve të Grupit të Kontaktit, si dhe e vendeve anëtare të përhershme të Këshillit të Sigurimit të OKB-së. Kjo rezolutë është edhe një dëshmi se janë të kota dhe joserioze të gjitha pretendimet për çështjen e Kosovës si gjoja një çështje të brendshme e regjimit të Beogradit.

Efektet konkrete të kësaj rezolute të Këshillit të Sigurimit të OKB-së mbetet që të shihen në të ardhmën dhe që të përcillen me shumë kujdes. Siç dihet, regjimi i Beogradit ka mjaft armë dhe ato gjenden në duar të papërgjegjshme. Masakra në fshatrat e Drenicës, ku pësuan gra, fëmijë e pleq, paraqet dëshminë më të fuqishme se regjimi i Beogradit është një regjim kriminal.

Prandaj, presim që institucionet ndërkombëtare, në radhë të parë Këshilli i Sigurimit i OKB-së, të gjejë mënyrë se si t’ia bëjë të pamundshëm Beogradit që t’i përdorë armët që i ka, e të cilat, siç dihet, nuk janë të pakta dhe ato tashmë i ka koncentruar në gjithë Kosovën, veçmas në rajonin e Drenicës.

Ajo që nuk mund të pëlqehet në tekstin e rezolutës së Këshillit të Sigurimit të OKB-së është tendenca për barazimin e forcës dhe të fajit të dy palëve për dhunën në Kosovë. Kjo tendencë është e rrezikshme, sepse regjimi serb mund ta përdorë atë si pretekst për masakra të tjera në Kosovë.

Duket se nën ndikimin e Rusisë nga teksti përfundimtar i kësaj rezolute u hoqë vlerësimi se "gjendja në Kosovë kërcënon paqen dhe sigurinë ndërkombëtare", të cilin ambasadori i SHBA-ve në OKB e theksonte me të drejtë si shumë të rëndësishëm për presionin e mëtejshëm mbi regjimin e Beogradit.

Në të ardhmën regjimit të Beogradit në radhë të parë do të duhej që t’i pamundësohej përdorimi i areoplanëve dhe helikopterëve ushtarakë kundër popullsisë civile. Prandaj, varësisht nga zhvillimet e ardhshme, imponohet si një veprim i domosdoshëm shpallja e Kosovës zonë e ndaluar për fluturime, për çka tashmë u angazhuan edhe publikisht një grup kongresistësh e senatorësh amerikanë.

Vetëm masat e këtilla, sidomos sanksionet ekonomike e financiare, do ta detyronin Beogradin për të vendosur një dialog serioz me Prishtinën me ndërmjetësimin ndërkombëtar për çështjen e Kosovës, tha z. Mustafa.



PSHDK përshëndet Rezolutën e Këshillit të Sigurimit të OKB-së



Prishtinë, 1 prill (QIK)

Kryesia e Partisë Shqiptare Demokristiane e Kosovës në mbledhjen e sotme të rregullt që u mbajt nën drejtimin e Veli Bytyçit, përshëndeti lirimin e objektit të Institutit Albanologjik të Kosovës, të okupuar para disa vitesh nga pushteti serb. Ky është hap i parë dhe i rëndësishëm për fillimin e zgjidhjes së mëtutjeshme të çështjes së Kosovës.

Njëkohësisht kjo Kryesi përshëndet Rezolutën e Këshillit të Sigurimit të OKB-së për embargon e armëve për "RFJ" për shkak të dhunës në Kosovë.

Në vazhdim Kryesia e PSHDK-së ritheksoi edhe me këtë rast se zgjedhjet e dyta parlamentare e presidenciale të 22 marsit, ishin të suksesshme dhe konfirmuan përcaktimin e fuqishëm të popullit shqiptar për pavarësi. Njëkohësisht u vlerësua lart gatishmëria e popullit për pjesëmarrjen në zgjedhje, me çka u pa qartë synimi gjithëpopullor për vendosmërinë e tij për shtetformim të Kosovës dhe të sendërtimit të vullnetit të popullit për Kosovën e pavarur të shprehur në Referendumin e vitit 1991.

Theksohet se nga zgjedhjet e sivjetme PSHDK doli më e fuqishme se në zgjedhjet e para parlamentare dhe presidenciale ngase pos dy kandidatëve të drejtpërdrejtë arriti të fitojë deri tash 6.48 për qind të votave të përgjithshme pa llogaritur edhe zgjedhjet që do të përsëriten në Fushë-Kosovë, ku kandidati i PSHDK-së fitoi, si dhe ato që do të përsëriten në komunën e Dragashit.

PSHDK pret që pas përsëritjes së zgjedhjeve në Fushë-Kosovë dhe në Dragash, në një afat optimal të bëhet konstituimi i Parlamentit dhe të formohet Qeveria e cila duhet të veprojë në Kosovë, theksohet në fund të komunikatës nga mbledhja e sotme e PSHDK-së.



B. Riçardson: Gjendja në Kosovë kërcënon paqen dhe sigurinë ndërkombëtare



Prishtinë, 1 prill (QIK)

Ambasadori amerikan në Kombet e Bashkuara, Bill Riçardson, theksoi dje në Këshillin e Sigurimit se duhen evituar gabimet që janë bërë në të kaluarën në ish-Jugosllavi, "kur bashkësia ndërkombëtare u vonua tepër për të ndërmarrë veprime të vendosura".

Në fjalën e tij, ambasadori amerikan tha se SHBA-të përkrahin fuqishëm rezolutën e Këshillit të Sigurimit që vendos embargo armësh kundër ‘RFJ’-së (Serbisë e Malit të Zi). Këshilli i Sigurimit në këtë mënyrë dëshmon se është për paqe dhe siguri në Ballkan dhë i dërgon një mesazh të qartë se bashkësia ndërkombëtare "nuk do të tolerojë dhunë dhe spastrim etnik në rajonin e ish-Jugosllavisë".

"Ne e dimë fare mirë se siguria e rajonit prek drejtpërdrejt interesa më të gjerë ndërkombëtare, dhe se keqësimi i gjendjes në Kosovë përbën kërcënim për paqen dhe sigurinë ndërkombëtare", theksoi zoti Bill Riçardson.

Presidenti i ‘RFJ’-së Sllobodan Millosheviq duhet të fillojë një dialog të pakushtëzuar pëe çështje të statusit politik me udhëheqjen e shqiptarëve të Kosovës, tha ambasadori amerikan. "Shtetet e Bashkuara, sikurse edhe Këshillin (i Sigurimit) shprehin përpkrahje për një status të ngritur për Kosovën, duke përfshirë edhe autonomi më të madhe dhe vetëqeverim kuptimplotë".

Shtetet e Bashkuara mirëpresin qëndrimin e vendosur të Dr. Rugovës dhe përfaqësuesve të tjerë të lartë të shqiptarëve të Kosovës për mosdhunë dhe zgjidhje me negociata të krizës së Kosovës, theksoi Riçardson.

Ndër aspektet e rëndësishme të rezolutës së Këshillit të Sigurimit që u miratua mbrëmë, simbas ambasadorit amerikan në OKB, është kërkesa që Zyra e Prokurorit të Gjykatës së Hagës të mbledhë dëshmi për dhunën në Kosovë që mund të bjerë në jurisdiksionin e kësaj Gjykate.

"Me rëndësi kyçe është që ‘RFJ’ (Serbia dhe Mali i Zi) t’i japin fund dhunës dhe veprimeve të tjera provokative të policisë dhe forcave të saj paramilitare të sigurimit. Përkundër fjalëve të autoriteteve që e thonë të kundërtën, këto forca speciale të policisë janë ende në veprim në Kosovë. Ato duhet të tërhiqen menjëherë, ashtu siç kërkon kumtesa e Grupit të Kontaktit nga mbledhja e Londrës", deklaroi mbrëmë ambasadori Riçardson.

Civilë dhe anëtarë të bashkësisë ndërkombëtare, duke përfshirë edhe punonjës humanitarë nga bota, "janë keqtrajtuar, kërcënuar, burgosur dhe rrahur nga këto forca policore", theksoi ai.

Duke ritheksuar qëndrimin amerikan, zoti Bill Riçardson tha se vetëm presioni i vazhdueshëm ndërkombëtar do të mundësojnë përparim drejt një zgjidhjeje paqësore e me biseda në Kosovë. "Kjo rezolutë konfirmon se bashkësia ndërkombëtare do ta shtrëngojë presidentin Millosheviq fort që t’i përmbushë kërkesat e Grupit të Kontaktit nga Londra. Në të kundërtën, siç e ka thënë Grupi i Kontaktit në Bon, do të duhen masa plotësuese.", përfundoi ambasadori amerikan në OKB.



Ishinger vjen sot në Prishtinë



Prishtinë, 1 prill (QIK)

Drejtori Politik në Ministrinë e Jashtme gjermane, Volfgang Ishinger, arrin sot në Prishtinë. Gjatë qëndrimit të tij në kryeqytetin e Repubilkës së Kosovës është paraparë të takohet me kryetarin e Republikës së Kosovës, dr. Ibrahim Rugova. Ishinger është përfaqësues i ministrit të Jashtëm të Gjermanisë, Klaus Kinkel, dhe anëtar i Gruit të Kontaktit në nivel të drejtorëve politikë për Kosovën.

Ishinger do të mbajë sonte në orën 19:30 një konferencë me gazetarë.



Forca policore shkuan nga Gllogoci drejt Skënderajt



Prishtinë, 1 prill (QIK)

Në drejtim të Skënderajt si dhe anasjelltas, që nga fillimi i sulmit terroristik të forcave serbe, janë vërejtur forca të mëdha të policisë serbe.

Lëvizje të tilla janë vërejtur edhe sot. KI i Degës së LDK-së në Gllogoc njofton se sot rreth orës 9.20, 1 autoblindë, 3 pizgauerë me flamuj, 1 llandrover dhe dy vetura të policisë shkuan në drejtim të Skënderajt, duke ardhur nga Komorani dhe duke kaluar nëpër Skënderaj.

Po ky komision njofton se edhe sot nga drejtimi i Skënderajt u dëgjuan të shtëna armësh.

Njoftohet gjithashtu se më 30 mars, në postbllokun policor në Komoran u keqtrajtuan rëndë Kadri Plakiqi e Behxhet Plakiqi nga nekoci dhe Adem Nuha nga Kishnareka, punëtorë të "Kosovës" së Vushtrrisë, të cilët po prisnin autobusin për të shkuar në punë.



Nëndega e LDK-së në Llaushë kritikon Degën e LDK-së në Skënderaj



Prishtinë, 1 prill (QIK)

Nëndega e LDK-së në Llaushë u paraqit me një deklaratë, pas botimit në të përditshmen ‘Bujku" të një teksti që shprehte shqetësimin e Degës së LDK-së të Skënderajt për moskontaktimin e Kryesisë së porsaformuar qendror të LDK-së me atë të Degës së Skënderajt.

Kryesia e Nëndegës sonë e pranuan me shqetësim një reagim të tillë të Degës sonë, duke marrë parasysh se as Kryesia e Degës sonë që nga masakra në Prekaz të Poshtëm dhe në Llaushë, asnjëherë nuk e pa të arsyeshme të vijë njëherë ose, së paku, të flasë nëpërmjet telefonit vatrat e tanishme të krizës dhe bllokimit të plotë të Llaushës dhe tjera, kur po kanë mundësi të vijnë njerëzit e komunave të tjera dhe gjejnë forma komunikimi po ashtu edhe anëtarët e Kryesisë së tanishme qendrore, ish-anëtarët e Kryesisë qendrore, anëtarët e tanishëm të Këshillit qendror dhe qytetarët nga të gjitha rajonet e Kosovës dhe diaspora, ndërsa Kryesia e Degës sonë në distancë prej 500 metrash ajrore nuk e pa të rrugës të lajmërohet, të paktën, me telefon, kur dihet se pos bllokadës së plotë, kemi edhe 6 të vrarë.

Kryesia e LDK të Skënderajt është dashur të shqetësohet më tepër për fshatrat që gjenden në rrethim të hekurt serb, se sa për mosardhje të atyre nga Prishitna, thuhet, mes të tjerash, në kumtesën e Nëndegës së LDK-së në Llaushë.



Kryesia e LDK kërkon largimin e forcave policore dhe të forcave të tjera militare serbe nga Kosova



Prishtinë, 1 prill (QIK)

Kryesia e Lidhjes Demokratike të Kosovës nëpërmjet një komunikate të lëshuar sot për shtyp ripërsërit me forcë kërkesën për tërheqjen dhe largimin e forcave speciale policore dhe të forcave të tjera militare serbe nga Kosova. Këto forca po mbajnë në rrethim të hekurt zonën e Drenicës dhe po e terrorizojnë popullsinë e pambrojtur, theksohet më tutje dhe shtohet se dje forcat militare të Serbisë kanë shtënë me armë të rënda në drejtim të disa fshatrave, që mbahen në rrethim të egër tash një muaj. Mirëpo, për shkak se ato mbahen hermetikisht të izoluara, nuk dihet për viktimat eventuale dhe për dëmet e shkaktuara.

Kryesia e LDK thekson se kërkesa e Grupit të Kontaktit, e Bashkimit Evropian dhe e organizatave të tjera ndërkombtare për tërheqjen e forcave speciale policore të Serbisë nga Kosova, deri sot nuk janë marrë parasysh nga regjimi i Beogradit. Përkundrazi, në ditët e fundit ka informacione se numri i forcave të tilla është shtuar, sikundër që është i hapur deri më 30 prill 1998 konkursi për shtimin e pjesëtarëve të njësive speciale serbe. LDK deklaratat e disa zyrtarëve të Serbisë se gjoja forcat speciale janë tërhequr nga Kosova, i quan një gënjeshtër.

Kryesia e Lidhjes Demokratike të Kosovës fton Grupin e Kontaktit, Bashkimin Evropian dhe institucionet e tjera relevante ndërkombëtare që të tregojnë më shumë vendosmëri për të imponuar tërheqjen e forcave speciale dhe të forcave të tjera militare nga Kosova, sepse vetëm në këtë mënyrë, konsideron ajo, mund të punohet për zvogëlimin e rrezikut të konfliktit të përmasave të gjera në rajon dhe të krijohet njëri nga kushtet për dialog, thuhet në fund të kësaj komunikate.



Reagim i KQF të Kosovës ndaj pohimeve se mësuesit në Drenicë nuk i kanë marrë pagat



Prishtinë, 1 prill (QIK)

Këshilli Qendror për Financim i Kosovës ka dhënë dje një sqarim në lidhje me ndihmat dërguar Drenicës, respektivisht mësimdhënësve të komunës së Skënderajt. Në sqarim thuhet:

Solidariteti i popullit shqiptar me Drenicën nuk mungon as në ndihma materiale e as financiare. I vetmi problem është që ndihmat e dhëna nga populli, të koordinohen dhe të distribuohen sipas prioriteteve dhe nevojave emergjente. Janë ndihmuar të evakuuarit në komunat e Mitrovicës, Vushtrrisë, Obiliqit, Lipjanit, Klinës, Gllogocit, Malishevës etj., por edhe qytetarët në territorin e rrezikuar të Skënderajt.

Sa i përket deklaratës së këshilltarit të presidentit Zejnullah Rrahmani, dhënë QIK-ut dhe të plasuar në informatën e ditarit të TVSH dhe në "Bujkun" e 31.3.1998 se për "arsimin në Skënderaj nuk ka arritur asnjë metelik", e informojmë opinionin publik se kjo deklaratë është e pavërtetë, qëllimkeqe dhe e papërgjegjësi.

KQFK, komunës së Skënderajt për arsimtarë i ka dhënë këstet e rregullta përfundimisht me muajin shkurt 1998 dhe ka avancuar edhe për muajin mars. Gjithashtu, ka ndarë edhe 50.000 DM të derdhura nga Qeveria e Kosovës për këtë destinim.

Dëshmi: - kësti i janarit 42.500 DM, dëftesa nr.073559, datë 27 shkurt 1998, kësti i shkurtit 42.500 DM "0141630", 23 mars 1998

- avansi për muajin mars 22.000 DM, dëft.nr.0141631, dt.3 mars 1998.

- mjetet e destinuara nga Qeveria e Kosovës 50.000 DM, dëftesa nr.075560, datë 27 shkurt 1998.

Ekziston edhe marrëveshje me kryetarët e KKF të Kosovës, që Skënderaj, por jo vetëm Skënderaj, të trajtohet në mënyrë të veçantë dhe me prioritet nga KQFK-ja.

KQFK këtë marrëveshje do ta sendërtojë me kompetencë. Qeveria e Kosovës ka derdhur mjete 500.000 DM për nevojat emergjente të cilat mjete ende nuk janë shfrytëzuar pasi që mjetet e grumbulluara brenda në Kosovë tash për tash i mbulojnë kërkesat emergjente, thuhet në sqarimin e KQFK, që e nënshkroi Ismajl Kastrati, kryetar.

Dr. Rrahmani: Prezentova në opinion qëndrimet e strukturave të Skënderajt



Prishtinë, 1 prill (QIK)

Duke komentuar pohimet se Këshillit Qendror për Financim të Kosovës se janë dhënë me rregull pagat për mësimdhënësit e Drenicës QFK-së, Këshilltari për Arsim i Kryetarit Rugova, prof. dr. Zejnullah Rrahmani i tha QIK-ut se deklaratat e tij për mungesën e pagave janë mbështetur në pohimet e përgjegjësve të arsimit dhe të financimit në Skënderaj.

Z. Rrahmani tha se Këshilli Komunal i Arsimit i Skenderajt, bashkë me Këshillin Komunal të Financimit do ta thonë fjalën e tyre në lidhje me konstatimet që ai i ka bërë publike.

Këto konstatime, tha ai, kanë qenë të mbledhjes së përbashkët të strukturave komunale, Kryesisë së LDK-së, KKA-së, KKF-së, Këshillit të Emergjencës të Skënderajt dhe ato u bënë publike për ta alarmuar opinionin lidhur me nevojën urgjente të dërgimit të ndihmave popullatës së rrezikuar të Drenicës.

Fakti se KQFK e shihka të panevojshme ndihmën më të madhe shkon direkt ndesh qëndrimit të asaj mbledhjeje dhe strukturave të Skënderajt të cilët apelojnë për ndihma, tha dr. Rrahmani.

Sa u përket gënjeshtrave të Kastratit dhe kinse dëftesave të tij, po i japim shënimet e sakta për të ardhurat që i kanë marrë shkollat e komunës së Skenderajt: disa shkolla të komunës së Skenderajt nuk e kanë marrë gjysmën e rrogës e korrikut të vitit 1997, gjysmën e rrogës së gushtit e ka marrë vetëm shkolla "2 Korriku" në Ticë. Kur këtyre u shtohen rrogat e këtij viti, del se në tërësi nuk i kanë marrë rrogat e tetë muajve. Disa shkolla të kësaj komune,psh. shkolla fillore "P.Marko" e Skënderajt, pastaj "Emin Duraku" e fshatit Likofc, ose shkollat e Aqarevës e Llaushës (pikërisht këto fshatrat e rrethuara me tanke e snajperistë!), pastaj shkolla fillore "Azem Bejta" e Prekazit, shkolla fillore e Klinës, e Kllodernicës, e Turiqefcit, e Makermalit, E Vojnikut etj, nuk e kanë marrë rrogën e plotë as për muajin qershor 1997! - tha dr. Zejnullah Rrahmani.



Në Brojë më nuk ndodhet askush, pos policisë e ushtrisë



Prishtinë, 1 prill (QIK)

Se situata në Drenicë edhe më tej vazhdon të mbetet tepër e rëndë dëshmon edhe deklarata e Bahtir Krasniqit, kryetar i Degës së LDK-së, në Brojë, dhënë gazetës "Bujku", në të cilën ai thotë se pardje, policia serbe ka urdhëruar që të largohen nga fshati Brojë edhe ata pak pleq e plaka që kanë mbetur nëpër shtëpitë e veta si dhe kanë urdhëruar që bagëtia të lëshohet në fushë.

"33 shtëpi të Brojës janë mbushur policë e ushtarë. Janë forcuar fortifikatat e tyre. Numri i forcave rritet çdo çast. Dhe, në Brojë, prej dje më nuk gjendet asnjë banor. Popullata ikur në drejtim të Izbicës dhe të Kllodernicës. Në Izbicë kanë arritur ndihma shumë të vogla, ndërsa në Kllodernicë tash e 26 ditë nuk ka arritur asnjë ndihmë. I tërë rajoni është çdo çast nën plumba e herë-herë edhe nën granata. Shumë shtëpi janë të demoluara. Gjendja shëndetësore e banorëve të këtij rajoni është shumë e rëndë dhe me sakrifica të mëdha po ua dërgojmë edhe këto pak informacione të rralla", tha në deklaratë z. Krasniqi.



Ora e mësimit pas masakrës



Prishtinë, 1 prill (QIK)

Dje në mesin e nxënësve dhe asrimtarëve të shkollës fillore "Petro Marko" të Skënderajt mbretëroi një atmosferë dhembjeje e pikëllimi të thellë. Të gjithë nxënësit dhe arsimtarët qanin pandërprerë për dhjetë nxënësit e kësaj shkolle të lagjes së Jasharajve në Prekaz, që u vranë para 27 ditësh nga okupatori serb. Në bankat ku ndodheshin të ulur nxënësit e vrarë sot u vunë lule të kuqe. Ndër nxënësit e vrarë janë: Valdete Rifat Jashari (14), nxënëse e klasës VIII, Lirie Hamëz Jashari (14), nxënëse e klasës VIII, Kushtrim Adem Jashari (13), nxënës i klasës VII, Igball Rifat Jashari (11), nxënës i klasës VI, Blerim Hamëz Jashari (11), nxënës i klasës V, Igballe Rifat Jashari (13), nxënëse e klasës VI, Fatime Hamëz Jashari (8), nxënëse e klasës II, Blerim Hamëz Jayshari (7), nxënës i klasës I, Bujar Zenë Jashari (12), nxënës i klasës VI dhe Makfirete Bajram Gashi (3), nxënëse e klasës VII, thuhet në një raport të korrespondentit të "Bujkut" nga Skënderaj.



Skënderaj: Deri tash 19 të zhdukur



Prishtinë, 1 prill (QIK)

Nënkëshilli për Liritë dhe të Drejtat e Njeriut në Skënderaj shpalli dje listën e 19 të zhdukurve, shumica nga lagja e Jasharajve të Prekazit të Poshtëm, e këta janë: Sadik Hysni Jashari (65), Hafie Jashari (60), Hamdi Sadik Jashari (33), Elfie Sadik Jashari (28), e martuar në Qirez, Fatime Sadik Jashari (26), Ramiz Sadik Jashari (24), Mihrie Jashari (53), Sabrie Zymer Jashari (20), Hanife Zymer Jashari (16, Smajl Asllan Jashari (48), Shaban Qerim Jashari (25), Ukshin Qerim Jashari (21), Hajrie Jashari, Ajvaz Kajtaz Jashari (18), të gjithë nga Prekazi i Poshtëm, si dhe Fatime Bazaj (21) e Smajl Bazaj (18) motër e vëlla nga Tërsteniku, Bashkim Ali Sadiku (22), Tushilë, Ilmi Kastrati (28), Brojë, dhe Idriz Rexhep Idrizi (46), Prekaz. Këshilli i lut të gjithë ata që për personat e shënuar kanë ndonjë dijeni të lajmërojnë NKMDLNJ-në në Skënderaj në tel.028/82-330 ose në NKMDLNJ-në më të afërt.



M. Robinson: Do të bëjmë gjithçka që ta evitojmë dhunën dhe konfliktin në Kosovë



Prishtinë, 1 prill (QIK)

Komisionerja e lartë e OKB-së Meri Robinson mbajti dje në Kombet e Bashkuara në Gjenevë një konferencë shtypi me përfaqësuesit e mediave botërore, në të cilën prezentoi preokupimet e kësaj organizate ndërkombtare. Në pyetjen rreth zhvillimeve të fundit në Kosovë, Meri Robinson u përgjegj se situata në Kosovë vazhdon të jetë alarmante dhe dramatike. Për Kosovën, ditëve të fundit janë të angazhuar edhe Grupi i Kontaktit, ku vendet anëtare të këtij grupi nga takimi i Londrës më 9 mars kërkuan në deklaratën e tyre dërgimin e një raportuesi special në Kosovë për të mbledhur faktet e dhunës serbe. Çështja e Kosovës tashmë ka tejkaluar preokupimet e OKB-së për shkak të shkeljeve flagrante dhe sistematike të të drejtave të popullit shqiptar nga regjimi serb. Dhe, tash e tutje, çështja e Kosovës mbetet një problem politik i cili pret një zgjidhje adekuate nga bashkësia ndërkombtare.

- Ditë më parë i kam shkruar personalisht Milosheviqit që të pranojë vëzhgues të OKB-së në zyrën tonë në Beograd, dhe se vëzhguesit e Kombeve të Bashkuara javë të fundit gjendjen në Kosovë e kanë përcjellë me mjaft vëmendje, tha Robinson në Gjenevë.

Nga Grupi i Kontaktit gjatë një takimi të këtyre ditëve në Gjenevë kërkova po ashtu hapjen e zyrës së OKB-së në Prishtinë, të cilën ofertë anëtarët e Grupit të Kontaktit e mbështetën fuqimisht duke premtuar se do të realizohet. Vëzhguesve ndërkombëtarë që dëshirojnë të vizitojnë Kosovën, Milosheviqi po u jep viza të kufizuara vetëm deri në dy javë, pohoi Robinson.

Këtyre ditëve, nga raportuesi i porsaemëruar për "Jugosllavinë’ Dinzvir kërkova urgjent të vizitojë Kosovën për të mbledhur fakte të dhunës serbe ndaj shqiptarëve etnikë në Kosovë, dëshmi këto për komisionin e Kombeve të Bashkuara. Ky raportues do të gjendet pas një jave në Prishtinë, theksoi zyrtarja e lartë e OKB-së në Gjenevë, dhe shtoi:

- Kosova edhe për sekretarin e OKB-së Anan është një çështje tejet preokupuese, të cilën gjë e tha edhe në punimet e komisionit të OKB-së se Kosova vazhdon të jetë shpicë kryesore në agjendën e OKB-së. Kosova gjendet para një preventive të zgjeruar, vazhdoi Robinson dhe theksoi: "Për Kosovën do të bëjmë gjithçka çfarë është e mundur vetëm e vetëm për ta evituar dhunën dhe konfliktin sa nuk është bërë vonë.



Papulias: "Greqia kërkon një rol më të madh të Evropës në zgjidhjen e krizës së Kosovës"



Prishtinë, 1 prill (QIK)

Kryetari i delegacionit të Komisionit Parlamentar grek për Marrëdhënie me Jashtë dhe Mbrojtje, Karolos Papulias, paralajmëroi dje në një konferencë për shtyp në Tiranë se në Kosovë mund të shpërthejë "një tragjedi e re, e cila mund të jetë më e thellë se ajo e Bosnjë-Hercegovinës".

Papulias e kundërshtoi kategorikisht idenë e zgjidhjes së konfliktit në mënyrë të armatosur dhe kritikoi qëndrimin amerikan ndaj situatës në Kosovë.

"Nuk mund ta mohoj rolin e SHBA-ve në përpjekjet për zgjidhjen e krizës, por Evropa është më e interesuar për zgjidhjen paqësore të saj se sa SHBA që përdor gjuhën e forcës", tha Papulias.

"Palët e interesuara për zgjidhjen e konfliktit duhet të ulen në një tryezë bisedimesh, ndërkohë që roli i BE-së duhet të jetë më rezultativ se sa në krizën e Bosnjë-Hercegovinës", shtoi ai.

Papulias theksoi se "shmangia e konfliktit është në interes të të gjitha vendeve ballkanike", thuhet në njoiftimin e ATSSH-së.



Presidenti Mejdani çmoi projekt-platformën për zgjidhjen e çështjes kombëtare



Prishtinë, 1 prill (QIK)

Presidenti i Republikës së Shqipërisë, Rexhep Mejdani, priti dje drejtuesit e Akademisë së Shkencave që punuan në hartimin e projektplatformës për zgjidhjen e çështjes kombëtare shqiptare, njofton ATSH.

Presidenti Mejdani çmoi hartimin e kësaj projektplaforme nga institucioni më i lartë shkencor në SShqipëri dhe shtoi se ajo është hartuar me synimin që të përafrojë qëndrimet mbarëshqiptare rreth çështjes kombëtare.

Anëtarët e delegacionit të Akademisë thanë se në këtë dokument shkencor janë sintetizuar zhvillimet historike, aktualiteti dhe perspektiva e çështjes kombëtare shqiptare në sfondin e zhvillimeve të brendshme dhe ndërkombëtare.

Në takim u vlerësua se hap i domosdoshëm për të ecur drejt një takimi të gjerë të intelektualëve e politikanëve si edhe drejt një Kuvendi Kombëtar është kontakti sa më i shpejtë me Akademinë e Shkencave dhe të Arteve të Kosovës.



Nano: "Qeveria shqiptare është për autonomi të zgjeruar për Kosovën"



Prishtinë, 1 prill (QIK)

Kryeministri i Shqipërisë, Fatos Nano, shprehu dje opcionin e qeverisë që e kryeson "për autonomi të zgjeruar të Kosovës".

I ftuar nga Komisioni Parlamentar për Politikë të Jashtme të Parlamentit që të informojë për takimet në Bon dhe për qëndrimin e qeverisë rreth çështjes së Kosovës, z. Nano çmoi se deklarata e Bonit "ishte e avancuar në krahasim me atë të Grupit të Kontaktit në Londër" dhe theksoi se "në të shprehet mbështetja për politikën e drejtuesve shqiptarë në Kosovë, kërkohet respektimi i Marrëveshjes së Arsimit, përcaktohet vendosja e sanksioneve për armët dhe shprehet për ndryshimin e statusit të Kosovës".

Ai tha se të gjitha forcat politike në Shqipëri duhet të bëjnë maksimumin për të evituar konfliktin në Kosovë si dhe rikujtoi takimin me Millosheviqin nq Kretë, të cilin e cilësoi si një veprim me të cilin "Shqipëria tentoi të thyente akujt e historisë"

Kryetari i Komisionit për Politikë të Jashtme të Parlamentit të Shqipërisë, Sabri Godo, shprehu pakënaqësi që qëndrimi i qeverisë shqiptare rreth çështjes së Kosovës ende nuk është i artikuluar qartë.

NATO është e gatshme të ndihmojë rimëkëmbjen e ushtrisë shqiptare

Prishtinë, 1 prill (QIK)



Drejtori i Qendrës së Komunikimit të Partneritetit për Paqe, gjeneral-majori Tony Kolesteren, gjendet në një vizitë pune në Shqipëri, njofton ATSH.

Gjate kësaj vizite, z. Kolesteren zhvilloi takime me Ministrin e Mbrojtjes, Sabit Brokaj dhe me Shefin e Shtabit të Përgjithshëm, Gjeneral Brigade Aleks Andoni.

Në këto takime u theksua se ardhja e ekipeve të NATO-s në Shqipëri ka qenë një shkollë e vërtetë për ushtrinë e Shqipërsisë, e cila ka trashëguar një boshllëk të madh ligjor. U vlerësua se do të ishte shumë e nevojshme ndihma e ekspertëve të NATO-s për hartimin e këtyre ligjeve që do t’i hapin rrugë krijimit sa më të shpejtë të strukturave funksionale të ushtrisë. Shefi i Shtabit të Përgjithshëm, Aleks Andoni, theksoi se programi i bashkëpunimit për vitin 1998 duhet të jetë i gjerë dhe të përfshijë edhe fusha të tjera të aktivitetit të ushtrisë.

Ndërkaq, z. Kolesteren shprehu gatishmërinë e NATO-s dhe të Qendrës së Kordinimit për të thelluar më tej angazhimet e përbashkëta për rimëkëmbjen e ushtrisë shqiptare.



Shaqirbej: "Nga Bosnja mund të nxirret përvojë për Kosovën"



Prishtinë, 1 prill (QIK)

Ambasadori i Bosnjës e Hercëgovinës në OKB, Muhamet Shaqirbej vlerësoi se situata aktuale në Kosovë ka shumë ngjashmëri me situatën në Bosnjë para fillimit të konfliktit dhe çmoi të nevojshme që nga krahasimi të nxirret ndonjë përvojë për Kosovën. "Frikësohem se shumë nga ajo që është dashur të mësohej ende nuk është mësuar", u shpreh ai.



Londra akuzon Italinë për shkak të refugjatëve nga Kosova



Prishtinë, 1 prill (QIK)

Pesëdhjetë e gjashtë refugjatë nga Kosova, që mbërritën në Britaninë e Madhe, pa dokumente, do të dërgohen në Itali, pasi Londra akuzoi Romën se i ka transferuar ata në Britaninë e Madhe "për t’i hequr qafe".

Refugjatët kishin mbërritur javën e kaluar në Itali nga Amani, me bileta për në Londër, ndërsa një funksionar i policisë kufitare kishte urdhëruar transferimin e tyre për në destinacionin përfundimtar.

Në bazë të një konvente të Dublinit, azilkërkuesit janë në ngarkim të shtetit të parë të Bashkimit Evropian ku ata arrijnë të futen.

UPS i FSHMN-së reagon ndaj UPSUP-së



Prishtinë, 1 prill (QIK)

UPS i FSHMN-së ka reguar sot kundër një shkrimi të botuar dje në gazetën "Bujku" me titull "Fushatë dezinformatash kundër UPSUP-së".

Shkrimi i botuar në gazetën "Bujku" të datës 31.3.1998 nuk është fushatë dezinformimi kundër UPS-UP, por një reagim ndaj parregullsive në organizatën studentore. Peticioni kundër zgjedhjeve të 22 marsit është një realitet, për të cilin ekzistojnë dëshmitarë të cilët dëshmojnë se peticioni në fjalë është shtypur pikërisht në kompjuterët e UPS-UP-së dhe pikërisht zyrtarët e UPS-UP-së iu ofrojnë studentëve të Drenicës atë peticion.

E vërteta është se ne kemi dërguar sqarimin tonë në QIK, për të cilën gjë di edhe vetë UPS-UP.

Ndërsa sa i përket deklarimit të UPS të UP-së është fjala për "prononcime individujale", u bëjmë me dije se kjo nuk qëndron pasi që një prononcim i tillë është i Kryesisë së UPS të FSHMN-së, thuhet në reagimin e UPS të FSAMN të Universitetit të Prishtinës, thuhet në reagimin e botuar në numrin e sotëm të "Bujkut".



Muhamet Spahiu ka nevojë për ilaçe



Prishtinë, 1 prill (QIK)

Që nga shtetrrethimi dhe rrethi i snajperëve serbë, Muhamet Spahiu nga Llausha, shtëpia e të cilit është shumë afër vendit ku janë vendosur forcat serbe, ka mbetur me të shoqen mbyllur në shtëpinë e tij pa pasur mundësi që ta kalojë oborrin e shtëpisë. Ai deri tash ishte disa herë cak i sulmit të snajperistëve serbë. Z. Spahiu ka nevojë për ilaçe dhe kontroll të vazhdueshëm mjekësor pasi që vuan nga sëmundja e rëndë e sheqerit, andaj luten organizatat humanitare dhe ato shëndetësore ndërkombëtare që ta ndihmojnë këtë.



Nga shtypi zviceran: Kosova e dërgon Milosheviqin në Hagë?



Prishtinë, 1 prill (QIK)

A do të jenë shkas masakrat në Kosovë që Slobodan Milosheviqi të dalë para gjyqit? Lidhur me këtë çështje gazeta zvicerane "Nojer cyrherqyrje cajtung" komenton:

"Është një fakt i çuditshëm që ata njerëz që janë përgjegjës për luftën në Kroaci dhe në Bosnjë, nuk janë akuzuar akoma nga Gjykata Nërkombëtare e Hagës. Ekziston dyshimi se presidenti "jugosllav" Milosheviq me kompani duhet të ruhen, sepse nevojiten për qëllime politike. Drejtësia e Hagës ka dy përgjigje për këtë fenomen - se ajo punon në bazë të parimeve juridike dhe prokurorët duhet të lihen të punojnë në qetësi. Dhe, se krahas listës së zyrtarve të të akuzuarve ekziston edhe një e fshehtë. Ajo mbahet e fshehtë me qëllim që të akuzuarit të mos paralajmërohen dhe të fshihen. Ajo mund të shkaktojë që edhe kriminelët e luftës të mos largohen nga jeta politike.

Akuzat e qëllimshme kundër funksionarëve të regjimit do të shkaktojnë pasiguri në aparatin shtetëror dhe policor. Me kërcënimin me procese dihet një barrierë ndaj shkeljeve të ligjit në të ardhmen. Njerëzit do ta mendojnë mirë nëse duan të ushtrojnë masakra kur t’ju bëhen kërcënime juridike dhe publicistike. Në këtë mënyrë favorizohet qetësimi i situatës në Kosovë. Dhe, ndonjë tjetër do ta vrasë mendjen se a ia vlenë të ketë post drejtues në një regjim të tillë. Zgjedhjet e fundit në Serbi kanë dëshmuar se baza e personelit rrallohet gjithnjë e më shumë. Trajtimi juridik i masakrave në Kosovë duhet të fillojë shpejt. Në fillim, duhet të pyeten dëshmitarët, të sigurohen gjurmët. Pastaj, duhet të përgatiten paditë. Në fund puna e organeve shtetërore-juridike duhet të kontrollohet mirë.

Shumë organizata për të drejtat e njeriut ka në Serbi dhe Kosovë. Ato duhet të jenë në gjendje të krijojnë një organizatë të fuqishme që të zhvillojnë luftë juridike kundër regjimit të Milosheviqit. Nevojitetn juristë serbë dhe shqiptarë në Kosovë që e njohin lëndën e tyre dhe që janë të aftë e kanë dëshirë të bashkëpunojnë, njerëz me kurajo civile duhet të ketë" përfundon artikullin gazeta zvicerane "Nojer cyrherqyrje cajtung".



Demokristianët shkëputen nga KK i DPP të Prishtinës



Prishtinë, 1 prill (QIK)

Bashkësia e Degëve të PSHDK të Prishtinës, që përbëhet nga katër degë, më nuk do të jetë anëtare e Këshillit Koordinues të Degëve të Partive Politike të Prishtinës. Kështu kjo Bashkësi vendosi në mbledhjen e parmbrëmshme, që e kryesoi Frrok Kristaj, kryetar. Në fakt, në kohën e zgjedhjeve të 22 marsit Isa Kastrati, kryetar i Këshillit Koordinues të Degëve të Partive Politike të Prsihtinës, pa e konsultuar asnjërin nga anëtarët e Këshillit, lëshoi kumtesë se ky Këshill nuk i përkrah zgjedhjet dhe ftoi qytetarët që ato (zgjedhje) të bojkotohen. Lidhur me këtë menjëherë u tubuan shumica e degëve të partive politike të Prishtinës dhe përgënjeshtruan kumtesën e Isa Kastratit. Megjithatë, Isa Kastrati nuk u ndal vetëm me kaq. Ai, pas zgjedhjeve, doli me vlerësimin tjetër se zgjedhjet nuk kishin sukses dhe se ato ishin një farsë. Shumica e degëve të partive politike të Prishtinës edhe këtë e përgënjeshtruan dhe kështu u krijua një huti. Më pastaj Isa Kastrati e thirri mbledhjen e KKDPPP-së, ku tentoi të fusë në rend dite vlerësimin se zgjedhjet ishin një manipulim me masën dhe se ato nuk patën sukses. Për këtë reaguan shumë nga kryetarët e degëve të partive politike, kurse degët e PSHDK-së kërkuan që Isa Kastrati të kërkojë falje publike, apo të paraqesë dorëheqje, përkatësisht që Këshilli ta shkarkojë. Më në fund, Isa Kastrati kërkoi falje, por ai dëshiroi që këtë të mos e bëjë publike. Për këtë Bashkësia e Degëve të PSHDK-së njoftoi Kryesinë qendrore të PSHDK-së dhe më pastaj në mbledhjen e parmbrëmshme vendosi njëzërit që të tërhiqet nga Këshilli Koordinues i Degëve të Partive poiltike të Prishitnës. Njëherësh, kjo Bashkësi e degëve të PSHDK-së tërheq të gjithë anëtarët e vet nga çdo asociacin i KKDPP të Prishtinës përderisa të krijohen kushtet për punë normale dhe bashkëpunim të sinqertë.

Në të vërtetë, Bashkësia e Degëve të PSHDK-së do të bashkëpunojë sikurse edhe deri më tash me të gjitha degët e partive politike shqiptare që veprojnë në Prishtinë, por jo në kuadër të KKDPP.

Do përmendur se Bashkësia e Degëve të PSHDK-së me kohë ka përkrahur zgjedhjet e 22 marsit, si dhe në to ka marrë pjesë me 16 kandidatët për deputetë, prej tyre 12 në Prishtinë, dy në Fushë-Kosovë, një në Lipjan dhe një në Novobërdë. Nga këta kandidatë dy kanë kaluar me votë, përkatësisht për njërin janë anuluar zgjedhjet por jo për shkak të kandidatit tonë, por për shkak të malverzimeve që kanë bërë anëtarët e LDK-së. Pra, për 16 kandidatët e propozuar nga Bashkësia e Degëve të PSHDK të Prishtinës, kanë fituar mbi 10 mijë vota, që do të thotë se po aq anëtarë, përkatësisht dashamirë i ka kjo bashkësi në këto anë të Republikës së Kosovës, thuhet në një kumtesë të Bashkësisë së Degëve të PSHDK të Prishtinës.



Gjakovë: Një tetëvjeçare, e dhunuar dhe e mbytur në rrethana të pasqaruara



Prishtinë, 1 prill (QIK)

Mbrëmë në morgun e spitalit të Gjakovës, policia serbe solli trupin e vdekur të fëmijës 8 vjeçar Drane Gjergj Perlaskaj nga fshati Smaq afër Bishtazhinit, njofton KI i Degës së LDK-së në Gjakovë.

Sipas pohimeve të anëtarëve të familjes, Dranja, pasditen e datës 30 mars, së bashku me të vëllanë, kishte dalur me bagëti dhe më vonë, në kërim të një lope të humbur ajo hyri në malin e fshatit.

Anëtarët e familjes e kërkuar ata tërë ditën, por arritën ta gjejnë vetëm dje, në mes të malit, të vdekur dhe të dhunuar, në rrethana tani për tani të panjohura.

Në spitalin e Gjakovës sot u bë obduksi