[GASHI75]

Që në fillim, duhet të mbajmë parasysh faktin se të gjitha “dosjet penale”, të cilat i ka përpiluar Kisha Ortodokse Serbe me në krye peshkopët e saj famëkeq serbomëdhenj, siç janë patriarku Pavle, dhe vladika Artemije me “engjujt e dalluar” të tyre në bashkëpunim të ngushtë me regjimin paramilitar, militar dhe policor gjenocidal të Serbisë së Slobodan Milosheviqit, të Vojislav Koshtunicës, të Vladan Batiqit, të Nebojsha Çoviqit dhe të Boris Tadiqit kundër udhëheqësve dhe luftëtarëve të shquar të UÇK-së, siç janë Ramush Haradinaj, Fatmir Limaj, Hashim Thaçi, Agim Çeku, Naim Maloku e të tjerë, në asnjë aspekt të tyre nuk kanë të bëjnë me cenimin e normave dhe të rregullave të së drejtës humanitare ndërkombëtare dhe të së drejtës së luftës, por, para së gjithash bazohen në akuzat e fabrikuara dhe të montuara monstruoze të gjykatave politike dhe të politikës propagandistike terroriste dhe kolonialiste të Serbisë, që për qëllim kryesor, dhe të fundit kanë njëjtësimin e luftës së drejtë çlirimitare kombëtare dhe antikoloniale të UÇK-së me luftën kriminale pushtuese dhe gjenocidale të Serbisë kundër Kosovës në periudhën e viteve 1989-1999. Pikërisht, në këtë segment vlerësues të gabueshëm (që nuk ka kurrfarë baze, as parimi të së drejtës ndërkombëtare) dhe fatal të drejtuesve të Tribunalit Ndërkombëtar të Hagës, sheshit shihet se ky paradoks politko-propagandistik i këtij institucioni të drejtësisë ndërkombëtare, në asnjë mënyrë nuk është i pranueshëm, as i justifikueshëm për Gjykatën Ndërkombëtare, as për kriteret dhe standardet juridike të së drejtës ndërkombëtare, sepse si pikësynim themelor ka jo vetëm barazimin e luftës së drejtë mbrojtëse të UÇK-së me luftën pushtuese gjenocidale të Serbisë së Madhe, por edhe mohimin e tërësishëm të karakterit dhe të vlerave të saj të ligjshme historike, luftarake, kombëtare dhe ndërkombëtare. Po qe se, kështu do të vazhdojë provokimi dhe ndëshkimi i luftës çlirimtare kombëtare të UÇK-së, luftë kjo që ishte antitezë e luftës pushtuese gjenocidale të Serbisë, atëherë nuk ka dyshim se, patjetër do të vijë në pikëpyetje legjitimiteti dhe objektivat e themelimit të Gjykatës Ndërkombëtare të Hagës.