[Dilaver]

Kush do ta gjejë Nanon?

Artur Kopani


Dyshime të mëdha po shfaqen kohët e fundit mbi vendndodhjen e Fatos Nanos, kryeministrit në detyrë. Zërat e fundit që kanë si burim njerëz të afërt të tij thonë se ai ka lënë plazhet e Mesdheut dhe pushimet e tij janë zhvendosur në kazinotë e Amerikës së Veriut. Gjithçka është e mundur, sikurse edhe hamendja se ai mund të jetë kthyer në Turqi ose në Greqi, apo në Emiratet e Bashkuara Arabe.

Nano mund të jetë kudo, sepse ai ka pasaportë diplomatike, ka ende bileta dhe dieta të paguara nga buxheti i shtetit, ka edhe heqësa shpenzimesh - biznesmenë hallexhinj ose pa halle, - ka edhe pasionin për të bredhur, por edhe papërgjegjshmërinë që i duhet një njeriu si ai. Por një gjë është e sigurt ai nuk është në Tiranë. Këtë gjë mund të ta thonë në kryeministri, në Presidencë, në Gardën e Republikës, në selinë e Partisë Socialiste. Të gjithë e dinë se nuk është në Shqipëri, por pak ose aspak vetë e dinë se ku është kryetari i PS ose kryeministri në detyrë.

Kushtetuta e Shqipërisë përcakton se kryeministri dhe qeveria e tij duhet të qëndrojë në detyrë derisa të zgjidhet kryeministri i ri dhe qeveria pasuese. Pak kush mund të gjejë në kushtetutë, apo në ligjet e shumta të këtij vendi, një argument që mund ta mbajë kryeministrin Fatos Nano në detyrë, pasi është njësoj si t'i dërgosh me SMS thirrjet që lexon Petro Koçi në selinë e zbrazët të Partisë Socialiste. Nano e ka bezdi edhe ligjin, edhe Petro Koçin, pavarësisht se i përdor ndonjëherë kur i duhen për punët e tija.

Pelegrinazhi i fundit i Nanos-kryeministër në detyrë, krijon vetëm njëlloj shqetësimi për publikun. Vërtet shumica nuk duan t'ia dinë s'e nga bredh ky njeri, pasi nuk ndryshon shumëçka në jetën e tyre të përditshme. Shumica e shqiptarëve e kanë zgjidhur mbijetesën jo vetëm duke mos e pasur atë dhe qeverinë e tij pranë, por edhe duke i patur edhe atë, edhe qeverinë e tij kundër. Shqetësimi qëndron tek fakti se Fatos Nano është një pijanec me probleme, edhe kur pi nga qejfi, edhe kur pi nga halli. Media ka zbuluar kohët e fundit informacione të tjera mbi një aksident që ai kreu vite të shkuara në Shkallnuer, duke sjellë vdekjen e një qytetari të pafajshëm. Ai deri tani nuk e ka pranuar se ka qenë i përfshirë në këtë krim, por edhe drejtësia nuk ka hetuar dhe zbuluar autorin dhe rrethanat sesi u krye ai krim. Kjo ka ndodhur në Shqipëri, pasi Nano ka kontroll absolut mbi drejtësinë.

Por, ky njeri që e ka pijen me probleme, nuk mund të gjejë trajtim të njëjtë si në Shqipëri, nëse thyen ligjet në Perëndim, pavarësisht imunitetit të tij diplomatik. Një vit më parë ai u dëbua me forcë nga një bar nate në Manhatan të Nju Jorkut, pasi nuk iu bind ligjit të shtetit për të mos pirë duhan në ambjentet e brendshme. Tani, çështja është nëse Nano është i përfshirë në situata të tilla të ngjashme, ku ai mund të ketë rënë edhe viktimë e mosnjohjes së ligjeve që rregullojnë ndryshe jo vetëm jetën e qytetarëve nga një shtet në tjetrin, por edhe nga një qytet në tjetrin.

Që pas tre korrikut, kur partia e tij humbi ndjeshëm kontrollin e shumicës në parlament, Nano ka shpenzuar jashtë Shqipëri më shumë se tre javë. Ndryshe nga herët e shkuara, kur ai autorizon zëdhënësat e tij të thonë ndonjë deklaratë, apo thjeshtë të lëshojnë ndonjë thashethem, kësaj radhe asgjë e tillë nuk po ndodh, pavarësisht se zhvillimet politike kanë qenë tepër të vrullshme. Deri tani nuk ka asnjë informacion të saktë mbi vendondodhejn e tij dhe kjo e bën të mistershme fatin e kryeministrit në detyrë. Një burim i besueshëm i Partisë Socialiste tha se edhe vetë zv.kryeministri në detyrë, Namik Dokle nuk është në dijeni të vendndodhjes së Nanos. Shqipëria ka shumë institucione që janë të ngarkuara nga ligji që të merren me mbrojtjen e kryeministrit në detyrë. Eshtë mirë që ata të informojnë zyrtarisht opinionin se ku ndodhet kryeministri në detyrë i Shqipërisë. Eshtë përgjegjësia e tyre kushtetuese.