[Dilaver]

Kryetari i PS-së ka dhënë dje shenja se nuk ka ndërmend të largohet nga PS-ja, ashtu si premtoi

Nano: Bota, e preokupuar për Berishën kryeministër

Vladimir Muçaj

LUSHNJË – Kryetari i PS-së, Fatos Nano, i ndodhur dje në zonën nr. 64 të Lushnjës, ku pritet që të zhvillohen sërish zgjedhjet, ka përsëritur deklaratën e tij për një humbje aksidentale të socialistëve më 3 korrik, ka kërkuar, sipas burimeve që të mbahen larg zgjedhjeve të 21 gushtit ish-aleatët e PS-së që e tradhtuan atë. Pa përmendur emra, Nano ka lënë të kuptohet se i drejtohej kryetarit të PAA-së, Lufter Xhuveli. Nano është shprehur se, “Është dhe bota e preukupuar sa edhe ne, edhe ju, për aksidentin e madh të 3 korrikut, të rrezikut të kthimit mbrapa të Shqipërisë, për shkak të manipulimit të votës. Ne do të jemi edhe në të ardhmen ashtu si sot, ashtu si dje, përkrahës dhe interpretues të vullnetit dhe interesave tuaja, ka thënë Fatos Nano në takimin me banorë të fshatit Ngurras i Madh në Krutje të Lushnjës, ku ka konfirmuar solidaritetin e tij për kandidatin e PS-së Ethem Ruka, për fitoren më 21 gusht kundrejt rivalit të PD-së, Ilir Bano. Kreu i socialistëve, Nano, i cili është takuar me banorë të këtij fshati dhe drejtues të PS-së së zonës, është shoqëruar në këtë vizitë në fshatin e largët të Lushnjës nga deputetja Arta Dade dhe Valentina Leskaj, deputeti Andis Harasani, Taulant Dede si dhe kandidati për deputet Ethem Ruka. Nano edhe njëherë në Lushnjë e ka konsideruar rezultatin zgjedhor të 3 korrikut një aksident të madh, por që sipas tij, të tillë ndodhin në shtetet demokratike. “Ne jemi shumë seriozë dhe të vendosur për të bashkuar të gjitha votat tona më 21 gusht në zonën 64, në këtë hambar të zhvillimit dhe të energjive për të arritur nivelet që ju dëshironi. Unë erdha t’ju rikonfirmoj solidaritetin dhe të ndërtojmë së bashku atë qëndresë dhe iniciativë, pavarësisht nga aksidenti i madh i 3 korrikut”, - tha Nano. Nano tha se PS-ja më 3 korrik kishte 15 mijë vota më shumë se në vitin 2001. “Kështu që duke njohur edhe plagët që i kemi hapur vetvetes dhe plagët që na kanë hapur tanët, të dehur apo të majmur nga pushteti apo nga aleatët tanë që asgjë nuk i ka lidhur me ju, përveçse një emri falso, unë do t’ju bëja të gjithëve thirrje, do t’ju ofroja të gjithë mbështetjen time që më 21 gusht të mos lejojmë askënd të vërë dorë mbi votën tuaj, rrjedhën e qartë dhe të drejtë”, - tha Nano. “Kam besim se lidhjet tona të forta, të pakorruptueshme, si forcë vitale në këtë formacion të harmonizuar moshash dhe brezash, janë garancia më e madhe për ju. Kam besim te ju dhe te një kombinim i veprimeve që edhe sot po bëjmë së bashku”, - u shpreh ai. “Nëse ndodhi ky aksident, në demokraci ka edhe aksidente të tilla, duhet rikuperuar sa më parë. Ka ardhur koha për një operacion, në mënyrë që liria dhe institucionet demokratike që i ngritëm me kaq sakrifica në 8 vjet së bashku, të mos bien kollaj në duar të keqbërësve, të abuzuesve , të njerëzve që nuk e duan zhvillimin dhe integrimin, të njerëzve që mezi presin të ketë mjegull për të vënë dorë mbi votën dhe punën e bërë”, - ka thënë Nano. Kryetari i PSSH-së e ka quajtur provë të madhe votën e 21 gushtit, veçanërisht administrimin e saj. “Ne duhet të nxjerrim të gjithë mësimet nga ky pësim i madh”, - tha ai. Në një moment Nano i është drejtuar kandidatit Ruka me një shaka për mërzitjen që i ka shkaktuar rezultati i 3 korrikut, duke i thënë: “Mos u mërzit Ethem, takimet e shumta me këta njerëz të mrekullueshëm shërbejnë për pastrimin e tubave“. Ndërsa Ruka është shprehur se më 3 korrik ai së bashku me PS-në kanë fituar, por ky rezultat nuk arriti të publikohej nga prania e strukturave manipulative të PD-së që ushtruan ndikimin e tyre në shumë qendra votimi”.