[Dilaver]

Hagë: Prokuroria kërkon 20 vjet burg për Fatmir Limajn, 18 për Balajn dhe 15 për Musliun...

Edhe në seancën e sotme, prokurori Uajting, në parashtrimin e tij përfundimtar ka theksuar se Limaj, Balaj e Musliu janë fajtorë për funksionimin e të ashtuquajturit kamp-burg në Llapushnik, torturimin dhe vrasjen e dhjetra civilëve serbë e shqiptarë në qershor e korrik të vitit 1998. Prokurori Uajting ka kërkuar dënimet më të rënda për Fatmir Limajn, Haradin Balajn dhe Isak Musliun, madje që ata të dënohen sipas nenit 142, 148 dhe 38 të Kodit penal të ish-Jugosllavisë.


Uajting kërkoi nga trupi gjykues që Fatmir Limaj të dënohet me 20 vjet burg, Haradin Balaj me 18, kurse Isak Musliu me 15 vjet burg. Si rrethana rënduese për këtë, ai tha është përgjegjësia komanduese e Limajt dhe e Musliut për funksionimin e të ashtuquajturit kamp burg në Llapushnik, kurse Balaj për shkak të pjesëmarrjes së drejtpërdrejtë të tij në torturimin dhe vrasjen e viktimave në malet e Berishës. Për Limajn ai tha se ndonëse nuk ka marrë pjesë në mënyrë të drejtpërdrejtë në torturime e vrasje, sipas tij, ai ka ditur për funskionimin e kamp-burgut në Llapushnik dhe kishte përgjegjësi komanduese lidhur me të. Për dënimin e propozuar ndaj Isak Muslut, prokurori tha se ai është më i ulët, për shkak se është i akuzuar për më pak pika se Limaj e Balaj. Sipas prokurorit, faktorë rëndues për të tre të akuzuarit ishte edhe qëllimi diskriminues ndaj viktimave, kohëzgjatja, pjesëmarrja dhe paramendimi i krimit, si dhe dhuna e mosmbrojtja e viktimave. Prokurori Uajting, pohoi se të tre të akuzuarit kanë mohuar ekzistimin e kamp-burgut në Llapushnik dhe sipas tij kjo ka qenë edhe rrethanë rënduese për ta. Ata, sipas tij kanë mundur ta zgjidhnin heshtjen, por vetë deshën që ta qojnë gjykatën në drejtim të kundërt. Menjëherë pas kësaj kërkese të Prokurorit Uajting, e mori fjalën Avokati i Fatmir Limajt, Majkëll Mensfild. Ai që në fillim, paraqiti një kërkesë të vecantë për trupin gjykues: që pasi ai të mbarojë parashtrimet e tij përfundimtare lidhur me këtë proces, klienti i tij - Fatmir Limaj dëshiron që t’i drejtohet trupit gjykues dhe opinionit me një fjalë të shkurtër deri 30 minuta. Pastaj Mensflid kontestoi fuqishëm parashtrimet përfundimtare të Prokurorisë, sidomos ato që kanë të bëjnë me Fatmir Limajn, e sidomos propozimin për dënimin e Limajt dhe të shokëve të tij. Ai tha se Limaj luftoi për lirinë e popullit të Kosovës dhe ai kurrsesi nuk mund të shpallet kriminel. Sipas Mensfildit, Limaj ishte një lider i ri dhe burrshteti që pas luftës është angazhuar për demokratizimin e shoqërisë kosovare dhe për të drejtat e të gjithë qytetarëve të Kosovës pa marrë parasysh përkatësinë nacionale. Mensfild kërkoi nga trupi gjykues që të rishqyrtojë disa dëshmi të dëshmitarëve të Prokurorisë, sidomos atyre të mbrojtur, të cilët sipas tij, kanë pasur për qëllim të atakojnë dhe të mohojnë vlerat e luftës së Ushtrisë Çlirimtare të Kosovës.


RTK 30/08/2005 16:45:26