[Dilaver]

Fatmira Hajdari: Të rihapet dosja e Azemit

Nevila Perndoj


Në foto: Kryeministri Berisha, dje me djalin e vogël të Azem Hajdarit

TIRANË - Pas fitores së Partisë Demokratike, bashkëshortja e heroit të demokracisë, Fatmira Hajdari, kërkon rihapjen e dosjes për vrasjen e Azem Hajdarit. Dje në 7-vjetorin e vrasjes së tij, Fatmira Hajdari, është shprehur se dosja duhet rihapur, kur të rivendoset shteti ligjor. ”E kam thënë dhe jam për rihapjen e dosjes së Azemit. Berisha sapo është dekretuar kryeministër dhe sapo e ka krijuar stafin e tij ministor dhe nuk është momenti. Në një moment që të rivendoset shteti ligjor, atëherë jam për hapjen e dosjes së Azemit, në mënyrë që rivendoset drejtësia mbi atë ngjarje të rëndë për të gjithë shqiptarët”, - tha dje Fatmira Hajdari. Ndërsa kryeministri Sali Berisha, pas vendosjes se luleve në memoralin e Azem Hajdarit, nuk ka dhënë asnjë përgjigje pyetjes për çështjen në fjalë. Ndërkohë që ka theksuar se, ”Azemi hyri në jetën politike shqiptare si një yll që kurrë nuk do të shuhet, që do të shndërisë gjithmonë e më shumë. Ai sot nuk është më sepse e ekzekutoi regjimi me fallangat e tij, por prehet i qetë, se askush në historinë e këtij kombi nuk ka bërë më shumë se ai për lirinë e tij, prehet i qetë sepse sërish partia që ai themeloi, idealet për të cilat ai luftoi dhe u ekzekutua, u rivendosën dhe po rivendosen. Fitorja e tre korrikut ishte një detyrim i madh madhor i të gjithë demokratëve shqiptarë, i të gjithë opozitës shqiptare ndaj tribunit të lirisë ndaj edhe njëherë shpreh nderimin tim më të thellë, angazhimin tim më të madh për të punuar me përkushtim për ato ideale për të cilat Azem Hajdari së bashku me bashkëmoshatarët e tij mbushën rrugët e Tiranës, u përballën me diktaturën më të egër dhe morën titullin e lartë të liberatorëve”. Kryeministri Berisha, i shoqëruar edhe nga zyrtarë të lartë të PD-së dhe kryetarja e Kuvendit, Jozefina Topalli, kanë zhvilluar një vizitë edhe në shtëpinë e Azem Hajdarit, ku, si çdo vit, ata kanë kujtuar pjesëza të vogla të jetës dhe veprimtarisë së tij.