[Arb]

Këshilli i Sigurimit rekomandon fillimin e bisedimeve për statusin e Kosovës

Nju Jork, 25 tetor - Këshilli i Sigurimit të Kombeve të Bashkuara në mbledhjen e mbrëmshme ka rekomanduar fillimin e bisedimeve për statusin e Kosovës. Deklaratën për fillimin e bisedimeve e ka bërë të ditur ambasadori rumun, Mihnea Motoc, i cili ka thënë se "Këshilli mbështet synimin e Sekretarit të Përgjithshëm të OKB së për të filluar procesin politik për të vendosur statusin e ardhshëm të Kosovës, ashtu siç parashihet edhe në rezolutën 1244 të vitit 1999".

Fillmisht Këshilli i Sigurimit ka diskutuar për Kosovën, duke u përqëndruar tek hapja e bisedimeve për statusin. Takimi, i cili u zhvillua në dy pjesë, ka pasur pjesën e parë të hapur për publikun dhe pjesa e dytë, ajo e vendimmarrjes, ka qenë e mbyllur.

Në hapje të seancës foli i dërguari i Kofi Ananit për vlerësimin e gjendjes në Kosovë, ambasadori Kai Eide, i cili përsëriti se duhen hapur bisedimet për statusin e Kosovës.

"Sinqerisht besoj se ka ardhur koha të fillojmë proçesin e statusit të ardhshëm. Që nga viti i kaluar një proçes politik po zhvillohet në Kosovë, i nxitur nga një angazhim ndërkombëtar dinamik. Ky proçes nuk mund të ndërpritet apo të pengohet. Duke qenë se kemi lëvizur nga vendnumërimi nuk mund të lejojmë të kthehemi sërish atje", ka theksuar ambasadori Eide.

Të njëjtin qëndrim si ambasadori Eide ka pasur dhe shefi i UNMIK ut Soren Jessen Petersen.

"Pa qartësi në çështjen e statusit përparimi do jetë i kufizuar", tha Jessen Petersen. Më tej ai ka shtuar se mungesa e statusit ka ndikuar negativisht në zhvillimin ekonomik e veçanërisht në tërheqjen e investimeve.

Mungesa e zhvillimit ekonomik, sipas shefit të UNMIK ut, pengon dhe proçesin e pajtimit ndëretnik në Kosovë. Më tej kreu i administratës ndërkombëtare në Kosovë ka folur për përparësitë e misionit që drejton, si dhe reformat që planifikohen të bëhen në UNMIK. Në këtë linjë duke folur për çështjet e sigurisë Petersen tha:
"Ne do vazhdojmë të kemi një agjendë gjithpërfshirëse në fushën e sigurisë, përfshi dhe kalimin e përgjegjësive nga UNMIK u tek dy ministritë e reja, atë të rendit publik dhe ministrinë e drejtësisë, deri në fund të vitit", tha shefi i UNMIK ut, duke nënvizuar se do merren të gjitha masat që ministritë përkatëse të mos politizohen. Njëherësh Jessen Petersen ka bërë të ditur se po punohet në hartimin e një raporti të përgjithshëm për të gjitha sektorët e sigurisë.

Duke folur për të ardhmen e pranisë ndërkombëtare në Kosovë Jessen Petersen ka veçuar: "Në të njëjtën kohë ne po bashkëpunojmë me partnerët tanë ndërkombëtarë siç është Bashkimi Evropian, OSBE ja dhe NATO ja që të zhvillojmë një tranzicion me faza dhe të menaxhuar mirë pas përcaktimit të statusit, por pa e paragjykuar atë", tha Jessen Petersen.
Kryeministri serb Vojisllav Koshtunica ka theksuar se vendi i tij merr të gjitha përgjegjësitë për t'i dhënë Kosovës autonomi.

"Ne jemi të angazhuar për një zgjidhje kompromisi dhe të vullnetshëm për t'i dhënë një autonomi substanciale Kosovës dhe Metohisë, si pjesë e Bashkësisë Shtetërore Serbi e Mal i Zi", ka thënë Koshtunica, i cili qe në këtë takim në cilësinë e të ftuarit, pas kërkesës së tij, kur dihet se Unioni Serbi Mali i Zi nuk është anëtar i Këshillit të Sigurimit Sekretari i Përgjithshëm Kofi Anan bëri të ditur se do të emërojë së shpejti një negociator me përvojë, ish presidentin e Finlandës, Marti Ahtisari, për të ndërmjetësuar.

Ndërkaq bisedimet për të ardhmen e Kosovës pritet të fillojnë muajin e ardhshëm. Shtetet e Bashkuara kanë thënë se do të emërojnë një të dërguar të posaçëm për bisedimet, mu sikur edhe Bashkimi Evropian.