[Arb]

Komandanti i KFOR-it thotë se grupet e armatosura nuk mund të ndikojnë në procesin e bisedimeve për Kosovën

Pejë, 7 nëntor - Komandanti i forcës paqeruajtëse të NATO-s në Kosovë, gjenerali italian Xhuzepe Valoto është shprehur se grupet e armatosura që janë paraqitur kohëve të fundit në zonën e Dukagjinit nuk mund të ndikojnë në procesin e bisedimeve për statusin politik të Kosovës.

Njërerit Valoto beson se anëtarët kosovarë të Grupit Negociator e kuptojnë rëndësinë e momentit historik nëpër të cilin po kalon vendi. Valoto këto komente i bëri dje në bazën ushtarake italiane në Bellopojë të Pejës pas një ceremonie për nder të Ditës kombëtare të bashkimit dhe ushtrisë italiane, në të cilën morën pjesë autoritetet më të larta të Kosovës.

Gjenerali Valoto ka thënë se grupet e armatosura, që fshihen pas deklarimeve për patriotizëm, nuk janë asgjë tjetër, veçse "grupe kriminelësh" dhe ata nuk veprojnë në dobi të popullit të Kosovës.

"KFOR-i dhe SHPK po i zhvillojnë hetimet lidhur me paraqitjen e grupeve të tilla dhe në rast se ata persona do të kapen, do t'i dorëzohen Shërbimit Policor të Kosovës", ka theksaur gjenerali Valoto. Kosova po përjeton momentin e saj më të rëndësishëm në histori, ka thënë Valoto, duke shfaqur besimin se njerëzit do ta kuptojnë se personat e armatosur janë kriminelë dhe jo patriotë pasi po të ishin patriotë do të silleshin ndryshe sidomos me popullatën.

Pavarësisht nga këto zhvillime gjenerali Valoto thotë se situata e sigurisë në Kosovë është shumë e mirë dhe se nuk ka shenja të rrezikimit, duke nënvizuar se trupat paqeruajtëse në Kosovë janë të gatshme për t'u përgjigjur ndaj çfarëdo sfide që do të rrezikonte paqen dhe qetësinë në vend.

QIK-u