[beku]

Letër e hapur intelektualëve të Kosovës


Hashim Thaçi *

Duke njohur rolin tuaj shumë të rëndësishëm në shoqëri e institucione. Duke çmuar kontributin tuaj në krijimin dhe zhvillimin e mendimit shkencor e kritik, si dhe ndërtimin, kultivimin dhe mbrotjen e vlerave kulturore, kombëtare e qytetare; Duke respektuar lart gjykimin tuaj për dallimin midis betejës së partive politike për pushtet dhe përkushtimit për ndërtimin e shtetit të Kosovës; Duke çmuar lart dijet dhe vizionet tuaja për ndërtimin e shtetit dhe demokracisë qytetare në Kosovë; Mbështetur në rolin tuaj misionar të humanizimit të vlerave individuale e universale, kam nderin dhe përgjegjësinë që në këto momente të rëndësishme për vendin tonë, t’u drejtohem me këtë letër.
Të nderuar intelektualë! Kosova po hyn në proceset e finalizimit të aspiratave, mundit dhe flijimit të saj të gjatë shpirtëror, njerëzor e material. Ju ishit pjesë e pandashme e të gjitha këtyre përpjekjeve. Para nesh janë çastet vendimtare të kurorëzimit të investimit të madh të popullit të Kosovës për liri, është përgjegjësi dhe obligim i të gjithëve, që së bashku ta bëjmë hapin e madh për jetësimin, institucionalizimin dhe funksionalizimin e Kosovës - shtet i pavarur dhe sovran. Ju e dini më mirë se gjithkush tjetër se janë këto çaste që kërkojnë mobilizim të gjithanshëm të të gjithëve në shërbim të përgatitjes sa më të mirë dhe të plotë për procesin e negociatave me Bashkësinë Ndërkombëtare, për njohjen ndërkombëtare të shtetit të Kosovës. Të gjithë ne, pavarësisht nga diversiteti i mendimeve dhe koncepteve politike, duhet të veprojmë me të tjerët, të diskutojmë, të nxisim përgjegjësitë që të veprojmë në mënyrë afirmative, t’i bashkojmë energjitë tona në shërbim të unitetit për ardhmërinë e vendit tonë. Unë besoj fuqishëm në forcën tuaj intelektuale dhe përgatitjen profesionale për dhënien e mendimeve me peshë, të bazuara në argumente dhe në të drejtën për jetë të lirë dhe të pavarur. Asnjëherë më shumë se sot, mendimi dhe angazhimi Juaj konkret nuk kane pasur rëndësinë dhe vlerën e vete politike dhe nacionale.
Intelektualë të nderuar, Autoriteti i Juaj është me ndikim në shoqëri. Ju ftoj ta ushtroni atë. Qytetarët e Kosovës me të drejtë presin kontributin tuaj të domosdoshëm për ndërtimin e shtetit, i cili në mënyrë dinjitoze do të bëhet pjesë e botës demokratike, ku udhëheq e drejta dhe e vërteta. Kosova do të jetë shtet i pavarur dhe sovran, i integruar në strukturat evro-atlantike, ku do t’i gëzojnë të drejtat e barabarta të gjithë qytetarët. Të gjithë duhet të punojmë për këtë. Përgjegjësitë dhe meritat duhet të na takojnë të gjithëve, ashtu siç na përket edhe e ardhmja jetësore në shtetin e ri të Kosovës. Pushteti i institucioneve është i kufizuar, pushteti i juaj moral mbi opinionin publik dhe përgjegjësitë tuaja profesionale dhe qytetare, janë të veçanta dhe të pakufizuara. Prandaj, ju ftoj, ashtu siç kam kërkuar vazhdimisht në të gjitha instancat e larta të institucionve të Kosovës, që të jeni pjesë aktive e përfundimit të statusit politik të Kosovës. Mendimi, puna dhe kreativiteti juaj, siç ka qenë gjithmonë, edhe sot, është i domosdoshëm, duke zënë vend nëpër grupe të ndryshme punuese të ekspertëve, në kuadër të partive, inciativave të pavarura apo institucioneve ku ju e konsideroni më të qëlluar dhe të vlerësuar kontributin tuaj.
Mendimi juaj duhet të dëgjohet që nga Akademia e Shkencave, universiteti, institutet e ndryshme, Shoqata e Shkrimtarëve, shoqëria civile e deri te debatet publike, tryezat dhe mediumet e lira. Pa idetë dhe mendimet tuaja të hapura, debati demokratik mbi të ardhmen e shoqërisë së Kosovës mund të jetë i varfër dhe joproduktiv. Kosova vazhdimisht ka investuar në inteligjencen e saj, është krenuar me të dhe i ka besuar gjithmonë. Falë juve, intelektualë të nderuar, qytetarët e Kosovës kanë krijuar ndjenjën e sigurisë në rrugën për zgjidhjen e problemeve jetike. Politika e Kosovës, për të qenë funksionale dhe efektive në detyrat dhe përgjegjësitë e saj ndaj qytetarëve, ka nevojë që në vazhdimësi të dëgjojë pikëpamjet dhe ekspertizën tuaj. Pa kontributin tuaj, Kosova nuk mund të zërë ritmin e zhvillimeve bashkëkohore politike, kulturore dhe teknologjike. Prandaj përkushtimi juaj është esencial që edhe Kosova me hapa të shpejtë të bëhet pjesë aktive e botës perëndimore. Me lejoni të kërkoj nga ju që dijen tuaj të çmuar ta bartni në institucione dhe shoqëri, në mënyrë që ajo të fitojë peshën e vendimeve institucionale, në shërbim të zhvillimit të vendit dhe përmirësimit të standardeve jetësore të qytetarëve të Kosovës.
Pavarësisht se jam i vetëdijshëm për pozicionin tuaj aspak të lakmueshëm në institucione a në vendet ku ju punoni, e them me plot bindje se filozofia e mendimit dhe kontributi juaj i tejkalon kornizat e kufizimeve materiale, pengesat procedurale, partiake e institucionale. Atdheu ynë është i përbashkët. Populli i Kosovës ishte me fat që gjatë gjithë historisë pati njerëz me dije dhe guxim, që shpërthyen fuqishëm duke shënuar epoka të lavdishme në historinë tonë moderne. Kjo dije dhe ky guxim krijuan lëvizjet e vitit 1968, 1974, 1981, 1989, 1990, 1998, 1999. E vlerësoj lart vendosmërinë tuaj që në momentet më të vështira për popullin tonë, Ju qëndruat dhe vepruat në Kosovë.
Me krenari mund të konstatojmë se për herë të parë në historinë e popullit shqiptar, plot ankthe dhe vuajtje, elita kombëtare, edhe pse jo çdo herë e trajtuar denjësisht, qëndroi unike bashkë me popullin, duke shtuar dhe forcuar shpresat për një të ardhme më të lumtur. Sot, është koha ta ndërtojmë Kosovën. Intelektualë të nderuar të Kosovës! Unë, njëri nga ju, ju ofroj publikisht garancinë time personale shumë të sinqertë, të partisë që unë drejtoj dhe institucioneve ku bëj pjesë, se do të angazhohem maksimalisht për vlerësimin dhe respektimin e mendimit dhe vizioneve tuaja. Ju do të keni pozicion të rëndësishëm dhe të merituar në angazhimet e të gjithëve, që zgjidhja e statusit të Kosovës të jetë e drejtë dhe në përputhje të plotë me vullnetin e qytetarëve të Kosovës. Kosova gjithmonë ka mbijetuar dhe fituar në saje të mbështetjes suaj morale, njerëzore e shkencore, prandaj, ju do ta keni fjalën e madhe në këtë akt përmbyllës për shtetndërtimin e Kosovës, për të ardhmen e sigurt të fëmijëve tanë dhe të brezave që do të vijnë. Përzemërsisht, Hashim Thaçi, kryetar i Partisë Demokratike të Kosovës