[MemphiSx]

AKT KUNDËR PAVARËSISË SË KOSOVËS DHE SIMBOLEVE SHTETËRORE TË SAJ

Prishtinë, më 29 nëntor 2005 - Forumi i Gruas i LDK-së reagon ashpër ndaj aktit të shëmtuar dhe qëllimkeq të disa të ashtuquajturëve përfaqësues të veteranëve të luftës së UÇK-së të cilët në mënyrë primitive, në ditën e madhe të festës kombëtare të shqiptarëve heqin Flamujt e Presidentit të Kosovës dr. Ibrahim Rugova që është njëherësh edhe propozim për flamur shtetëror të Kosovës.

Flamuri i Presidentit të Kosovës është simbol i lirisë, pavarësisë dhe demokracisë i bazuar në vlerat shumëshekullore të të parëve tanë që kanë jetuar në trojet e Dardanisë Antike, Kosovës së sotme.

Akti i heqjes së flamujve të Presidentit të Kosovës dhe djegies së tyre, është përveç akt vandal dhe jomoral edhe shkelje e rëndë e ligjit që është i dënueshëm në çdo vend demokratik.

Forumi i Gruas i LDK-së kërkon nga institucionet e Kosovës që të marrin masa ligjore ndaj bartësve të këtij akti dhe ata të përgjigjen përpara drejtësisë.

Akti i heqjes së flamujve të Institucionit më të lartë të shtetit, dëshmon qartë se njerëz të cilët thirren gjoja në emër të vlerave të luftës, është akt kundër këtyre vlerave të fituara me sakrificës të madhe të popullit të Kosovës. Ky akt është i drejtuar edhe kundër pavarësisë së Kosovës, kundër institucioneve të saj dhe kundër vlerave demokratike e civilizuese.

Heqja e këtyre flamujve në këtë kohë kur po finalizohet procesi i pavarësisë së Kosovës, është një dëshmi se këta të ashtuquajtur përfaqësues të luftës i pengon procesi i pavarësisë së Kosovës, iu pengon realizimi i aspiratave të popullit të Kosovës, iu pengon sundimi i ligjit për të cilin angazhohen institucionet e Kosovës në krye me presidentin e Kosovës dr. Ibrahim Rugova.

Kryesia e Forumit të Gruas së LDK-së
Prishtinë, më 29 nëntor 2005