[Psikologu]

Qytetarët vazhdojnë homazhe pranë kryetarit Rugova


Prishtinë, 24 janar 2006 (Kosovapress)

Qytetarë të shumtë nga e gjithë Kosova, të martën në ditën e dytë të homazheve, kanë vazhduar t’i shprehin respektin kryetarit të ndjerë të Kosovës Ibrahim Rugova, trupi i të cilit është vendosur që nga dita e djeshme në hollin e Kuvendit të Kosovës.Në mes të hollit të Kuvendit të Kosovës i rrethuar me lule, po qëndron arkivoli i kryetarit të ndjerë Ibrahim Rugova, i cili vdiq të shtunën në moshën 61 vjeçare pas një sëmundje të rëndë. Roje nderi vazhdojnë të bëjnë Garda e Trupave Mbrojtëse të Kosovës, kurse në krahun e djathë të arkivolit edhe sot qëndronin ulur familja e kryetarit Rugova, të cilët kanë pritur për ngushëllime mijëra veta që me radhë kalonin afër trupit të pajetë të kryetarit të Kosovës në shenjë nderimi. Në mesin e qytetarëve kishte edhe të atillë që shkonin dhe iu shtrëngonin duart familjes Rugova për t’iu shprehur ngushëllimet e tyre.Ditën e dytë të homazheve e hapi kryeparlamentari dhe u.d. i kryetarit të Kosovës, Nexhat Daci, i shoqëruar nga anëtarë të kryesisë së Kuvendit. Paradite ndërkaq, nderime bënë pjesëtarë të TMK-së, një delegacion i Partisë Demokratike të Kosovës në krye me liderin Hashim Thaçi, zyrtarë të lartë të partisë reformiste ORA, kryetari i PreK-ut Bujar Bukoshi, delegacione nga kuvendet e komunave të ndryshme, përfaqësues të bashkësisë islame, pjesëtarë të Shërbimit Policor të Kosovës, të sistemit shëndetësor, arsimit, minatorët, sportistët, Shoqata e të Verbërve, estrada kosovare, Kryqi i Kuq, etj.