[Urata]

Me nderime të larta ushtarake u varros kryetari Ibrahim Rugova


Prishtinë, 26 janar 2006 (Kosovapress) Time: 15 : 02

Me nderime të larta ushtarake dhe rite kombëtare, por jo edhe fetare, të enjten në varrezat e dëshmorëve në Prishtinë, në prani të dhjetëra- mijëra qytetarëve nga e gjithë Kosova, u varros kryetari i Kosovës Ibrahim Rugova, i cili ndërroi jetë të shtunën e kaluar në moshën 61-vjeçare pas një sëmundje të rëndë. Fillimisht kortezhi me arkivolin me trupin e pajetë të kryetarit Rugova është bartur nga salla “1 Tetori” në shoqëri të togut të nderit të TMK-së për t’u vendosur në varrin e bardhë. Anëtarët e këtij togu në shenjë nderimi ka shtënë tri herë në ajër. Më pastaj nën muzikën funerale ata kanë vendosur arkivolin me trupin e pajetë të kryetarit Rugova në varrin e bardhë. Të gjitha delegacionet pjesëmarrëse në ceremoninë e varrimit, vendore dhe ndërkombëtare, për herë të fundit kanë bërë nderim duke vendosur kurora me lule.