[Zana_ch]

Koordinatori i grupeve të punës të delegacionit të Kosovës për bisedimet për statusin, Blerim Shala, i ka thënë BBC-së se nuk ka nevojë për ndryshimin e strukturës së tanishme organizative në Kosovë.
Ai është shprehur i bindur se klasa politike në Kosovë është e bashkuar dhe se do ta rrumbullakësojë procesin e filluar politik.

Me zotin Shala bisedoi Arbër Vllahiu.

BBC: Sa në fakt vdekja e Presidentit Rugova ka lënë boshllëk në skenën politike kosovare?
Zoti Shala: Mendoj se respektin ndaj Presidentit Rugova do ta shprehim më së miri nëse në një periudhë shumë të shkurtër kohore vendosim të ecim përpara si delegacion i Kosovës. E dimë se njëri nga anëtarët e delegacionit të Kosovës nuk është më në mesin tonë, dhe ai ka qenë kryesues i Delegacionit, pra Presidenti Rugova. Prandaj është e qartë që sa më parë që është e mundur duhet të zgjedhet kryetari i ri i Kosovës, që të vazhdojë puna e delegacionit të Kosovës. Porositë që i kemi marrë nga diplomatët më të rëndësishëm ndërkombëtarë që e kanë vizituar Kosovën gjatë javës së shprehjes së ngushëllimeve për Presidentin Rugova, kanë qenë që ne duhet të jemi të vetëdijshëm që procesi duhet të ecën sa më parë, që kemi të bëjmë me ardhmërinë e Kosovës, që në të kaluarën, në muajt kur delegacioni ka funksionuar nën kryesimin e Presidentit Rugova, kemi ecur mjaft mirë përpara por që na pret një punë e madhe e cila nuk pret kohë.


"Kjo strukturë ka funksionuar mjaft mirë dhe ndërkohë janë krijuar edhe grupet punuese dhe mendoj se kjo trashëgimi e Presidentit Rugova duhet të respektohet nga të gjithë ne.Blerim Shala "




BBC: Zoti Shala, por delegacioni i Kosovës për një kohë të gjatë, për shkak të rrethanave të krijuara, nuk qe takuar. A mendoni ju se vdekja e Presidentit Rugova do të mund ta destabilizojë brenda për brenda vetë Grupin Negociator të Kosovës?
Zoti Shala: Ne duhet të kthehemi në deklaratën e Presidentit Rugova të 13 shtatorit të vitit të kaluar, sepse ajo përmbanë çelësin e funksionimit të delegacionit të Kosovës. Të mos harrojmë se të gjithë politikanët relevantë të vendit në deklarimet e tyre që nga pranvera e vitit të kaluar kanë deklaruar se ideja e unitetit është bazike për funksionimin e çfarëdo trupi të përbashkët dhe kjo ide ka qenë në krye të axhendës së Presidentit Rugova. Është krijuar një strukturë e cila është gjithëpërfshirëse dhe në të cilën ka përfshirje edhe të institucioneve edhe të përfaqësuesve të opozitës. Kjo strukturë ka funksionuar mjaft mirë dhe ndërkohë janë krijuar edhe grupet punuese dhe mendoj se kjo trashëgimi e Presidentit Rugova duhet të respektohet nga të gjithë ne.


" jam i bindur se klasa politike e vendit asnjëherë nuk do të arrijë një formulë të re e cila është më e mirë se sa kjo që na ka lënë në trashëgimi Presidenti Rugova."Blerim Shala





BBC: Por zoti Shala ditëve të fundit ka patur deklarime se Grupi Negociator nuk ekziston më, meqë nuk është më njeriu që ka qenë forcë unifikuese brenda skenës politike shqiptare?
Zoti Shala: Ka vdekur njeriu që ka qenë faktor i konsensusit, pa dilemë, por nuk ka vdekur ideja që udhëhequr Presidentin Rugova ta propozojë këtë solucion. Të mos harrojmë se kjo është formula e vetme për funksionimin e një delegacioni gjithëpërfshirës dhe poashtu duhet rikujtuar faktin që propozimi i Presidentit Rugova ka pasur një mbështetje të plotë të SHBA-së dhe BE-së dhe së fundi të rikujtojmë që propozimi i Presidentit Rugova ka marrë edhe miratimin e Kuvendit të Kosovës. Çfarëdo ndryshimi të strukturës organizative të delegacionit të Kosovës, në rrethanat e sotme, nënkuptohet që të shkohet prapë në Kuvend, të debatohet për të dhe të merret pëlqimi. Nuk mendoj që në rrethanat e sotme, klasa politike kosovare ka nevojë fare ta ndryshojë strukturën organizative të vendit, dhe poashtu jam i bindur se klasa politike e vendit asnjëherë nuk do të arrijë një formulë të re e cila është më e mirë se sa kjo që na ka lënë në trashëgimi Presidenti Rugova.

BBC: Dhe ju besoni se pasardhësi i Presidentit Rugova do të mund të zgjidhet së shpejti në këto ditë të ardhshme?
Zoti Shala: Varet se si do të ecë vetë procedura. Ju e dini se presidenti i Kosovës duhet të propozohet nga partia më e madhe që i ka fituar zgjedhjet, kjo është LDK-ja. Kemi të bëjmë me një procedurë të rregullt e cila nga pak ndërlikohet edhe për shkak të ditëve të zisë. Po supozoj se qëndrimi i të gjithë faktorëve politik është që në ditët e ardhshme të diskutohet për këtë çështje, por vendimi të merret në javën tjetër. Por kryesorja është që zgjedhja e një kryetari të ri është një domosdoshmëri, një urgjencë, pikësëpari për shkak të vakuumit që ka lënë Presidenti Rugova në të dyja postet edhe si kryetar i vendit edhe si kryesues i delegacionit.

BBC: Kjo do të thotë se me vdekjen e Presidentit Rugova po i kthehemi skenës politike kosovare në një lojë, siç e kanë quajtur, të të barabartëve, dhe se tani nuk do të ketë brenda për brenda Grupit Negociator një njeri që do të jetë faktor unifikimi?
Zoti Shala: Mendoj se prapë duhet t'i kthehemi idesë së unitetit dhe strukturës organizative e cila e siguroi këtë konsensus. T'iu them hapur se në mblehdjet e delegacionit të Kosovës, të cilat i kemi mbajtur deri tani, asnjëherë nuk ka ardhur deri te momenti i votimit. Të gjitha vendimet për të gjitha çështjet relelvante janë marrë me konsensus, në pajtim të plotë. Nuk ka pasur asnjë nevojë që vetëm Presidenti Rugova të ngrit një çështje dhe të thotë se ky është qëndrimi im e ai duhet patjetër të respektohet prej jush. Ideja e unitetit është e organizuar mirë përmes strukturës së delegacionit të Kosovës. Përndryshe në këtë mënyrë ne kemi funksionuar edhe në kuadër të grupit politik, prandaj nuk shoh ndonjë problem sa i përket vazhdimësisë së strukturës organizative që është në fuqi sepse ajo është treguar mjaft efiçente dhe e suksesshme në pesë muajt e fundit.

BBC: Zoti Shala, një takimi Vjenës që ishte paraparë të mbahej para vdekjes së presidentit Rugova u shty. Mendoni ju se procesi i negociatave për zgjidhjen e statusit politik të Kosovës ka hyrë në një fazë, ta quaj, të krizës…
Zoti Shala: … Nuk do ta quaja krizë, por do ta quaja më shumë si një ngecie, më shumë objektive për shkak të presidentit Rugova, ngecie objektive sepse duhet të zgjedhet kryetari i Kosovës i cili pastaj duhet të bëhet pjesë e delegacionit të Kosovës. Ju e dini se Grupi Politik i Delegacionit të Kosovës ka arritur të përpilojë materialin përfundimtar për reformën e pushtetit lokal, që pritet që ky material të marr përkrahjen e anëtarëve të Delegacionit të Kosovës dhe pastaj që ky Delegacion të vendos edhe për përbërjen e ekipit që do të shkojë në Vjenë. Të gjitha këto pengesa janë objektive, opinioni ndërkombëtar është i vetëdijshëm për këto dhe është i gatshëm për një periudhë racionale të kohës. Por jo me disa javë, dhe mendoj se e tëra duhet të kryhet brenda 7 e deri në 14 ditë ashtu që Delegacioni i Kosovës të marr vendimin se si të reagohet ndaj iniciativës së Vjenës.

BBC: Zoti Shala, nëse nuk zgjidhet në një afat të caktuar kohor presidenti i ri i Kosovës a ka vend për ndërhyrje të faktorit ndërkombëtar në këtë çështje?
Zoti Shala: Mendoj se kjo çështje pikësëpari ndërlidhet me vendimarrjen e Lidhjes Demokratike të Kosovës, e cila duhet të propozojë kandidatin e saj për kryetar të Kosovës, ndërsa faktori politik i cili funksionon në kuadër të Kuvendit të Kosovës jam i bindur se do ta peshojë, kësaj radhe, në mënyrë të veçantë zgjedhjen e presidentit të Kosovës. Kjo për faktin se dihet që ai ka një rol shumë të rëndësishëm në Delegacionin e Kosovës, dhe shpresoj se do të arrihet një lloj pajtimi që ky kandidat të përkrahet nga të gjitha subjektet politike në Kuvendin eKosovës. Ky është një moment vërtet i ri dhe moment dramatik pas vdekjes së Presidentit Rugova. Të gjithë politikanët e vendit kanë thënë se do ta respektojnë trashëgiminë politike të Presdentit Rugova dhe do të ecin sa më parë që është e mundur që ta kompletojnë procesin me pavarësimin e Kosovës