[Dilaver]

Biografia e Kolë Berishës

Kolë Berisha është i lindur më 26 tetor të vitit 1947 në fshatin Dobërdol të Komunës së Klinës. Shkollën fillore e kryen në Ujmirë. Pas kryerjes së shkollës së mesme (normalës) në Gjakovë, dy vjet punon mësues në Ujmirë dhe Gllarevë të Klinës, kurse nga tetë marsi i vitit 1973 punon si sekretar i gjimnazit "Luigj Gurakuqi" në Klinë. Ka të kryer edhe fakultetin Juridik në Prishtinë. Më 28 mars të vitit 1989, arrestohet dhe dërgohet në burgjet serbe në Leskoc, Beograd dhe në Pejë. Pas tre muajve, lirohet, por përjashtohet nga puna. Me themelimin e Lidhjes Demokratike të Kosovës, anëtarësohet në të dhe për dy mandate me radhë ishte anëtar i Kryesisë së Degës së LDK-së në Klinë dhe kryetar i Komisionit për pajtimin e familjeve të hasmëruara.. Nga 15 marsi i vitit 1998 është nënkryetar i Lidhjes Demokratike të Kosovës. Ishte anëtar i Këshillit Tranzitor të Kosovës së pasluftës; anëtar i Forumit politik të Kosovës të formuar nga z. Petersen. Tani është anëtar i Grupit Politik Strategjik për zgjidhjen e statusit përfundimtar të Kosovës. Ky është mandati i tij i dytë si deputet i Kuvendit të Kosovës. Ka të botuar dy libra: "Ditari i një izolanti" dhe "Kosova plagë që pikon". Shkruan prozë dhe poezi. Në vitin 1983, në konkursin letrar të revistës letrare "Koha" të Podgoricës, i ndahet shpërblimi i dytë për tregimin "Rrëfimi i thjeshtë". Herë pas herë paraqitet me shkrime nga aktualiteti politik. Është i martuar dhe ka dy fëmijë. Bashkë me bashkëshortën, me djalin e martuar dhe me vajzën, jeton në një banesë tridhomëshe në Prishtinë.