[Kalt]

Mustafaj në Bruksel: Shqipëria është kundër ndarjes së Kosovës

Gazeta Shekulli
22 Mars 2006


“Ka një keqkuptim dhe keqinterpretim të deklaratave të mia lidhur me kufijtë”, - u shpreh në Bruksel ministri i Jashtëm i Shqipërisë, Besnik Mustafaj, duke iu referuar shprehjes së shumëdiskutuar se, “nëse Kosova ndahet, Shqipëria nuk mund të garantojë për kufijtë në territoret ku banojnë shqiptarët”. Duke hedhur poshtë komentet dhe interpretimet transformuese që i janë bëre deklaratës së tij, Mustafaj theksoi në Bruksel se Shqipëria mbështet politikën e Grupit të Kontaktit dhe Marti Ahtisarin për çështjen e Kosovës. Ai sqaroi se është kundër ndarjes së Kosovës, kundër bashkimit të saj me një shtet tjetër, ashtu siç është pro mbrojtjes së pakicave në Kosovë.
“Jemi të kënaqur për të këtë sqarim që bëri Mustafaj, sipas të cilit, bëhet fjalë për një keqkuptim”, - është shprehur përfaqësuesi i Komisionit Evropian në Bruksel. Mustafaj sqaroi se, “Menjëherë pas reagimeve për deklaratën time, unë u lidha në telefon me ministrin e Jashtëm të Maqedonisë, të cilit i shpjegova se bëhej fjalë për një keqkuptim dhe keqinterpretim të kësaj deklarate”. Kurse në lidhje me situatën e brendshme në vendin tonë, nga Bashkimi Evropian vjen thirrja për të “përmirësuar situatën politike”, ndërsa nga Brukseli vjen edhe garancia se procesi i anëtarësimit në BE është në rrugë të mbarë, ndonëse për nënshkrimin dhe ratifikimin e marrëveshjes së asociim-stabilizimit duhen edhe dy vjet të tjerë.