[Dilaver]

- Kush janë realizuesit e këtij projekti?


ASG Power SA është një kompani e ndërtuar posaçëm, që zotërohet nga AET-një kompani publike zvicerane e specializuar në fushën e energjisë si dhe investitorë të tjerë europianë dhe amerikanë.
Themeluesit kanë shumë vite që e studiojnë pellgun e Adriatikut për realizimin e projektit. Ata kanë bërë analizat e tyre më herët edhe në vende si Kroacia apo Mali i Zi. Por, Shqipëria ofron distancën më të përshtatshme dhe njëkohësisht edhe një territor gjithnjë e më solid në nivelin politik, gjithnjë e më të mbështetur në nivelin ndërkombëtar. "Nuk është rastësi që afrimi ynë me momentin e realizimit të projektit përkon edhe me çastin e pranimit të Shqipërisë në NATO", thotë buzagaz Agim Gjinali. Investitorët në tërësi e pranojnë se Shqipëria gjithnjë e më tepër përfaqëson një terren strategjik për korridoret e energjisë.
Ambasadorja amerikane në Tiranë, Marsi Ries, tha gjatë ceremonisë së prezantimit zyrtar të projektit, se realizimi i këtij projekti do të nënkuptojë një mbështetje të fuqishme për të gjithë investimet e huaja në Shqipëri. Komponentja amerikane e këtij investimi është po ashtu një mbështetje e mëtejshme sidomos për investimet amerikane që pritet të vijojnë. US EXIM Bank ka angazhuar në mbështetje të këtij projekti një total prej 600 milion dollarësh, kredia më e madhe e kësaj banke e dhënë deri më tani në Europë. ASG Power SA ka nënshkruar ndërkaq marrëveshje për ndërtimin e stacionit të ri-gazifikimit të LNG-së, TEC-in dhe tubacionin nëndetar me kompaninë (joint-venture) italo-amerikane "SAIPEM and Black and Veatch". Një marrëveshje është arritur edhe me ABB-në, gjigandin botëror të përcjellësave elektrikë, për të gjithë inter-konjeksionet elektrike dhe ndërtimin e linjave të tensionit të lartë.


- Pse tani?


Disa muaj më herët Banka Botërore bëri me dije se në tërësi Europa Juglindore do të përballet me një krizë të theksuar të energjisë dhe mungesë të saj për shkak të shpejtësisë së lartë të rritjes së investimeve në këto vende. Fenomeni megjithatë nuk është as i ri, as i panjohur edhe tani. Vitet e fundit furnizimi i pamjaftueshëm me energji elektrike ka sjellë mungesa të shpeshta të energjisë në shtetet e Ballkanit dhe Itali. Në të njëjtën kohë, Italia është kthyer në tregun më të shtrenjtë të energjisë elektrike në Europë, e ndjekur ngushtë nga shtetet e Ballkanit.
"Nevoja në rritje për burime të reja energjie në Shqipëri, Greqi, Kosovë dhe veçanërisht Itali, ka nxitur ASG Power SA të zhvillojë Kompleksin e Termocentralit të Adriatikut që do të përfshijë Terminalin LNG, Impiantin e Ri-gazifikimit dhe Tubacionin e Eksportit si dhe Termocentralin me Cikël të Kombinuar me Kabllin e Eksportit HVDC", tha gjatë eventit Agim Gjinali, CEO i kompanisë. "Falë pozitës së favorshme gjeografike midis Italisë dhe Ballkanit, termocentrali i ri do të plotësojë kërkesën për energji elektrike në Italinë Jugore, Greqi dhe Kosovë. Gjithashtu, ai do të sigurojë energji shtesë për tregun shqiptar dhe do të prodhojë të ardhura të rëndësishme nga shkëmbimi i huaj për qeverinë shqiptare".
ASG Power SA ka analizuar mundësi të ndryshme për termocentralin, duke përfshirë impiantet me ndezje me qymyr, me cikël të thjeshtë si dhe me cikël të kombinuar me ndezje me gaz. Ndërkohë, që lënda djegëse më e lirë dhe më e bollshme është qymyri, impianti me ndezje me qymyr do të kërkonte më shumë kapital, dhe për më tepër do të donte të paktën tre vjet për t'u përfunduar. Këtu sigurisht është llogaritur edhe impakti mjedisor, që për mentalitetin e biznesit të kompanive perëndimore renditet i pari. Impianti me cikël të thjeshtë dhe ndezje me gaz do të ishte më i liri, por edhe më inefiçenti. Kjo bën që impianti me cikël të kombinuar të ndezur me gaz të jetë zgjidhja më praktike, sqarojnë ekspertët e kompanisë.