[Dilaver]

Goran Svilanovic, ish Ministër i Jashtëm i SMZ, ka deklaruar se kundërshton ndarjen territoriale të Kosovës, duke pohuar se një model i tillë më vonë do të mund të paraqitet si një mënyrë legjitime për zgjidhjen e konteseteve ndëretnike dhe problemeve brenda Serbisë.
Këto deklarata ai i ka bërë të premten, në një tryezë të organizuar në Beograd, që ka pasur për temë çështjen e statusit të Kosovës dhe pozitën e pakicave në Serbi.
Sipas tij, nëse ndodh ndarja e Kosovës, atëherë askush nuk mund t'ua mohojë të drejtën shqiptarëve në jug të Serbisë, hungarezëve në Vojvodinë dhe boshnjakëve në Sanxhak, që të kërkojnë status të njëjtë me atë që do të fitonin serbët në Kosovë.
Svilanovic ka kritikuar autoritetet në Serbi -- pse tash kur negociatat po zhvillohen - nuk hapin çështje, të cilat, sipas tij, janë themelore për statusin e ardhshëm të Kosovës, duke thënë se gabime të tilla tashmë kanë ndodhur.
Ai ka përmendur një rast kur ishte aprovuar Korniza Kushtetuese e Kosovës, me ç'rast, sipas tij, Qeveria ishte kujtuar vonë për të shkruar amendamentet për propozimin që kishin marrë gjashtë muaj më parë.