[Dilaver]

Dëshmia e Izetit mund të rihapë dosjen “Hajdari”

Ened Janina

TIRANË- Arrestimi i Izet Haxhisë në Turqi mund të rihapë edhe një herë hetimet për çështjen e vrasjes së deputetit të Partisë Demokratike Azem Hajdari, më 12 shtator të vitit 1998. Shteti shqiptar ka filluar menjëherë procedurat për ekstradimin e ish- truprojës së Sali Berishës, nga Turqia. Pas ardhjes në vendin tonë ai do të pyetet me hollësi në lidhje me ngjarjen e 12 shtatorit 1998 si dhe për disa ngjarje të tjera. Ai është konsideruar nga prokuroria shqiptare si një nga dëshmitarët kyç të kësaj ngjarjeje dhe nëse ai pranon që të flasë, dëshmia e tij mund të rihapë dosjen. Haxhia ishte i vetmi ndër personat që kishin marrë pjesë në vrasjen e Azem Hajdarit, i cili nuk ishte arrestuar ose nuk ishte vrarë. Ai ishte dënuar me vendim të formës së prerë me 25 vjet burgim dhe ka pasur një rol shumë të rëndësishëm në këtë vrasje. Lajmi është pohuar dje nga burimet zyrtare të Prokurorisë së Përgjithshme. Sipas tyre, nuk ka asnjë pengesë për ekstradimin e Izet Haxhisë nga Turqia për në vendin tonë.

Haxhiaj në vrasje

Izet Haxhia, ish- truproja i kryetarit të PD-së Sali Berisha gjatë qeverisjes së parë të tij ka qenë një njeri me shumë influencë në selinë blu. Nga shqyrtimi gjyqësor i çështjes “Hajdari”, Haxhia është takuar me miqtë e tij tropojanë të kryesuar nga Fatmir Haklaj dhe kanë planifikuar vrasjen e deputetit. Grupi i tropojanëve i përbërë nga Fatmir Haklaj, Jaho Mulosmani, Feriz Kërnaja, vëllezërit Ismet dhe Izet Haxhia dhe krutani Naim Çangu kanë planifikuar atë që më pas do të quhej vrasja e shekullit. Nga hetimi ka rezultuar se roli i Izet Haxhisë në këtë vrasje ka qenë jo i vogël. Asnjë nga personat e tjerë nuk ka pasur mundësi që të hyjë lirshëm në selinë blu dhe këtë mundësi ia ka dhënë Izet Haxhia. Natën e 12 shtatorit ai ka hyrë në selinë e PD-së dhe ka shkuar në zyrën e deputetit Azem Hajdari. Pasi është takuar me të i ka thënë se jashtë selisë ndodhej një makinë e zezë me targa të Vlorës. Në këtë makinë ndodheshin disa tropojanë, të cilët donin që ta takonin. Bazuar në fjalën e Haxhisë, Azem Hajdari ka dalë nga zyra e tij dhe pas tij kanë shkuar truprojat Zenel Neza dhe Besim Çera. Sipas hetimeve, Izet Haxhia ka qenë në dijeni edhe të shumë detajeve të tjera lidhur me këtë ngjarje të rëndë. Për të gjitha këto Haxhia është dënuar nga gjykata me 25 vjet burgim.

Rihapja e dosjes

“Izet Haxhia është një nga personat që kanë marrë pjesë fizikisht në vrasjen e Azem Hajdarit. Ai është një nga pjesëmarrësit dhe për pasojë një nga dëshmitarët kryesorë të kësaj çështjeje. Dëshmia e tij mund të jetë shumë e rëndësishme. Gjatë hetimit në prokurori dhe shqyrtimit gjyqësor të çështjes ne nuk kemi pasur mundësi që ta pyesim vetë Izet Haxhinë. Ai është gjykuar në mungesë dhe është përfaqësuar nga një avokat”,- thanë dje burimet e prokurorisë. Sipas tyre, shteti shqiptar ka filluar në mënyrë urgjente procedurat për ekstradimin e tij nga Turqia. Burimet shpjeguan se në momentin e parë që ai do të vijë në Tiranë do t’i komunikohet vendimi i gjykatës si dhe do t’i kërkohen shpjegime në lidhje me këtë çështje. “Sapo të vijë ne do ta takojmë dhe do ta marrim në pyetje. Roli i tij në këtë ngjarje është i madh. Po ashtu edhe dijenitë e tij në lidhje me çështjen. Nëse ai tregon detaje të reja mund të kthejë përmbys të gjithë hetimin dhe mund të rihapë dosjen. Dëshmia e Izet Haxhisë është aq e rëndësishme sa mund të rihapë hetimet”,- thanë dje burimet zyrtare të Prokurorisë së Përgjithshme. Sipas tyre, ekstradimi i tij nga Turqia nuk duhet të jetë ndonjë problem pasi gjithçka është përpiluar në mënyrë shumë të rregullt. Mbi të ekziston një vendim i formës së prerë i dhënë nga gjykata shqiptare ku dënohet me 25 vjet burgim. Edhe arrestimi i tij është kryer në bazë të materialeve dhe informacioneve të dërguara nga policia shqiptare.

KRONOLOGJIA

12 shtator 1998
Vritet me breshëri automatiku deputeti i Partisë Demokratike, Azem Hajdari, dhe shoqëruesi i tij, Besim Çerja, ndërsa mbeti i plagosur Zenel Neza. Vrasje kjo e ndodhur vetëm pak metra nga selia blu në kryeqytet.

6 maj 2001
Forca speciale të Ministrisë së Rendit arrestojnë në një banesë të Bajram Currit, të kërkuarin kryesor për vrasjen e deputetit demokrat, Azem Hajdari. Jaho Salihi u kap ndërkohë që flinte dhe u soll me një helikopter në Tiranë.

20 prill 2002
Jaho Salihi në deklarimet e tij përfundimtare rrëfen ngjarjen, ku thotë se autori i vrasjes së Azem Hajdarit është Fatmir Haklaj, tashmë i vrarë. Sipas tij, ish-shefi i komisariatit ka qenë njeriu që ka qëlluar mbi deputetin për hakmarrje.

29 prill 2002
Gjykata e Tiranës jep vendimin e saj përfundimtar, duke shpallur fajtor dhe dënuar Jaho Salihin (Mulosmanin) me burgim të përjetshëm; 25 vjet burg për Ismet Haxhinë dhe 20 vjet burg për Izet Haxhinë

Vrasja e “shekullit”
Si u vra deputeti i PD-së, Azem Hajdari

TIRANË- Deputeti i Partisë Demokratike, Azem Hajdari, është ekzekutuar mbrëmjen e 12 shtatorit të vitit 1999 vetëm pak metra larg selisë blu. Një grup i organizuar tropojanësh, të kryesuar nga Fatmir Haklaj kishin ardhur në Tiranë më datë 10 shtator të atij viti. Për dy ditë me radhë grupi i përbërë nga Fatmir Haklaj, Jaho Mulosmani, Feriz Kërnaja, vëllezërit Ismet dhe Izet Haxhia si dhe Naim Çangu kanë lëvizuar lirshëm nëpër kryeqytet. Edhe pse Fatmir Haklaj ishte person në kërkim ai nuk është penguar nga askush. Duke i kërkuar ndihmë shtetasve Fatmir Meta, ish- shefi i komisariatit të Topojës, Astrit Muldaka si dhe disa personave të tjerë, Fatmir Haklaj ka mundur që të gjejë të gjitha gjërat që i nevojiteshin për të kryer vrasjen. Pasi ka siguruar gjithçka Haklaj ka vënë në zbatim planin e tij. Tre makina të pozicionuara në vende të ndryshme rreth selisë së PD-së kanë qenë gati për çdo të papritur të rastit. Pas dhënies së sinjalit nga Fatmir Haklaj, Izet Haxhia ka hyrë në selinë e PD-së dhe ka takuar Azem Hajdarin. Ai i ka thënë deputetit se një grup tropojanësh kishte ardhur për ta takuar. Duke i besuar fjalës së Izet Haxhisë, deputeti Hajdari doli nga zyra e tij dhe iu drejtua makinës. Pas tij dolën edhe truprojat Besim Çera dhe Zenel Neza. Duke qenë se ishte errësuar, për më tepër edhe koha e vrenjtur me shi e kishte bërë edhe më shumë errësirë, Azem Hajdari është afruar tek makina me targa të Vlorës, e cila po e priste vetëm pak metra larg selisë blu. Nga kjo makinë ka dalë fillimisht Fatmir Haklaj dhe më pas Jaho Mulosmani dhe Naim Çangu. Hajdari dhe ekzekutorët e tij kanë shkëmbyer disa batura. Menjëherë pas kësaj Fatmir Haklaj ka nxjerrë një automatik dhe ka hapur zjarr në drejtim të Hajdarit dhe truprojave të tij. Të njëjtën gjë ka bërë edhe Jaho Mulosmani. Si pasojë e plumbave është plagosur dhe ka vdekur disa orë më pas deputeti Azem Hajdari. Ndërkohë ka mbetur i vdekur truproja Besim Çera ndërsa Zenel Neza është plagosur rëndë. Plumbat e Haklajt kanë qëlluar pa dashje edhe mikun e tij Naim Çangu, i cili është dërguar disa orë më pas në spital nga Jano Mulosmani por nuk ka mundur që të jetojë. Pas kësaj Haklaj i ka bërë thirrje bashkëpunëtorëve të tjerë që të largohen nga pozicionet e tyre dhe grupi është drejtuar sërish për në Tropojë ku ka mbërritur në orët e para të mëngjesit. Në datën 13 shtator Jaho Salihi ka folur që nga zyra e tij si shef rendi i Bajram Currit me përfaësuesit e Ministrisë së Rendit duke mohuar se kishte marrë pjesë në vrasje.

05/06/2006

Shekulli