[Dilaver]

Një muaj paraburgim këshilltarit për siguri të ish kryeparlamentarit Nexhat Daci.

Besnik KRASNIQI

PRISHTINË, 27 QERSHOR- Ahmet Alishanit, këshilltarit për siguri të ishkryeparlamentarit, Nexhat Daci, i është vazhduar masa e arrestit për 30 ditë, ndërkohë që po vazhdojnë hetimet ndaj tij për mashtrim dhe mitmarrje, bënë të ditur të marten burime të gazetës.
“Prokuroria e ka parë të arsyeshme që të akuzuarit t’ia zgjasë paraburgimin për 30 ditë, por kjo nuk do të thotë se në rast se vërtetohet pafajësia ai nuk do të lëshohet ose edhe të mbahet në arrest shtëpiak”, tha burimi ynë që nuk deshi të identifikohet.
Shërbimi Policor i Kosovës zyrtarisht as nuk e ka pohuar, as mohuar këtë të dhënë, por ka bërë të ditur se policia ia ka dorëzuar prokurorisë së Gjykatës Komunale në Prishtinë të gjithë dosjen e Alishanit.
“Sot në orën 12, ashtu siç parashihet me ligj, policia i ka dërguar të gjitha rezultatet e hetimeve dhe dosjen e Ahmet Alishanit në prokurorinë e Gjykatës Komunale të Prishtinës dhe mbetet te gjykata të vendosë për hapat e mëtejmë”, tha për “Iliria Post” zëdhënësi i SHPK-së, Veton Elshani, duke shtuar se me këtë SHPK- ja e ka përfunduar punën përkitazi me rastin. Megjithatë, Elshani tha se në momentin kur prokuroria kërkon diçka më shumë, SHPK-ja është e gatshme të marrë masa të tjera.
Alishani është prangosur pak ditë pas kthimit të tij nga Shtetet e Bashkuara të Amerikës, ku e kishte shoqëruar në vizitë Nexhat Dacin.
Arrestimi ka pasuar pas dyshimeve ndaj Alishanit për mashtrim dhe marrje të mitos. Ky arrestim duket se do të jetë një çështje e nxehtë, jo vetëm për palët në konflikt. Si çështje ajo ka prodhuar edhe idenë e një lufte politike kundër autoritetit të Nexhat Dacit, në prag të zgjedhjeve brenda Lidhjes Demokratike të Kosovës.
Pavarësisht kësaj, edhe pse e ka konsideruar montim politik, Daci ka deklaruar se nuk do të jetë kjo pengesë për kandidaturën e tij për postin e kryetarit të LDK-së, ndërsa me rastin e Alishanit ai ka thënë se do të merren institucionet dhe organet e drejtësisë.
“Unë kam thënë gjithmonë, në të gjitha takimet ndërkombëtare, se Kosova ka kapacitet të ofrojë drejtësi më të mirë dhe siguri më të mirë për qytetarët e saj”, është shprehur Daci.
Ndërkaq, një ditë më parë, Ramush Tahiri, këshilltari tjetër i ish-kryeparlamentarit, prerazi është shprehur se lufta kundër autoritetit të Dacit ka filluar dhe se emri i Ahmet Alishanit tani nuk është më në shënjestër.
“Janë të arsyeshme dyshimet tona se nuk është objekt Ahmet Alishani, por është pikërisht Nexhat Daci dhe veprimtaria e tij politike”, ka vlerësuar Tahiri.
Në anën tjetër, hezitimi për një kohë të gjatë i Nevzat Halilit, ish-kryetar i Partisë për Prosperitet Demokratik në Maqedoni, për ta paraqitur rastin në organet e drejtësisë lejon po ashtu hapësirë për dyshime. Halili ka deklaruar se më 20 janar të vitit 2003 familja e tij ia ka dhënë Ahmet Alishanit 20 mijë euro për ta liruar atë nga burgu.