[Dilaver]

Rebelimi politik i deputeteve të opozitës

Sjelljet e opozitës, përkatësisht të deputetëve opozitarë në seancën e fundit të Kuvendit të Kosovës u ngjajnë fëmijëve të lazdruar të cilët e kanë buzën në vaj, sa herë t’u hiqet shishja e qumështit prej goje.


Shkruan: Bajrush MORINA

Seanca e datës 13 e Kuvendit të Kosovës, filloi ashtu siç nuk pritej. Deputetët e opozitës u larguan nga kjo seancë dhe kështu ministrave të Qeverisë së Kosovës u mbeti që t’u përgjigjen vetëm pyetjeve të deputetëve që ishin të pranishëm në sallë, pra atyre të opozitës. Kryetari i Kuvendit të Kosovës, Kolë Berisha, duke tentuar që të tejkalohet kjo “mosmarrëveshje” ndërpreu seancën dhe i ftoi anëtarët e Kryesisë dhe shefat e grupeve parlamentare, që edhe njëherë t’i bind që të opozita të kthehet në Kuvend. Por duket se as kjo “lutje” e kryetarit të Kuvendit të Kosovës nuk u pranua nga opozita.
Pra, partitë politike opozitare, përkatësisht deputetët e opozitës në Kuvendin e Kosovës u larguan nga punimet e seancës së fundit të Kuvendit të Kosovës me arsyetimin banal se nuk po u lejohet të flasin sa kanë dëshirë e sa kanë aftësi gojore. Dhe që absurdi të jetë edhe më i madh, këta deputetë ranë në kundërshtim edhe me qëndrimet e anëtarëve të Kryesisë së Kuvendit dhe të shefave të grupeve parlamentare, që janë nga radhët e opozitës. Pra, për rendin e ditë dhe për kohën e debatit për raportin 100-ditësh të Qeverisë së Kosovës, Kryesia e Kuvendit të Kosovës në dy mbledhjet e fundit në të cilat kanë marrë pjesë edhe anëtarët e Kryesisë dhe shefat e Grupeve parlamentare opozitarë, janë pajtuar të gjithë së bashku për rëndin e ditës dhe për kohën e debatimit, ndërkaq në seancën e 13 korrikut, atyre u “doli gjumi” dhe ranë në kundërshtim jo vetëm me shumicën e deputetëve të Kuvendit të Kosovës, por edhe me vetë përfaqësuesit e tyre në Kryesinë e Kuvendit të Kosovës. Me një fjalë, këta deputetë të opozitës, me largimin e tyre nga punimet e Kuvendit të Kosovës, edhe njëherë treguan janë fëmijë të lazdruar tej mase dhe se ata e kanë buzën në vaj sa herë t’u hiqet “cuclla” prej goje.
Në fakt, një nga arsyet e këtij rebelimi në plotë kuptimin e fjalës, të deputetëve të opozitës ishte se ata kërkonin që debate për raportin e 100-ditështit ë Qeverisë së Kosovës të zgjaste pa kufi dhe pa ndërprerje kohore. Sipas disa deputetëve të opozitës, ata, pavarësisht nga forca e tyre politike në Kuvend, të kishin të drejtë të flitnin, jo 10 minuta por edhe nga 20 minuta pa u ndërprerë. Pra, të flitnin, të flitnin, të flitnin derisa të lodhen duke folur, derisa t’u lodhen fulqitë, derisa t’u lodhet goja, derisa t’u trashet gjuha. Ata donin që të flitnin ditë e natë, që debatonin pa u ndalë, që t’i merrte gjumi pranë foltores, apo që të mrizonin nën hije të Kuvendit të Kosovës, si “Qeveria e tyre në hije”.
Duke u larguar nga seanca e fundit e Kuvendit të Kosovës, deputetët e opozitës treguan se ata nuk e kanë vendin në Kuvendin e Kosovës, por në rrugë, në rrugë ku një ditë më parë ishte edhe opozita e Shqipërisë në krye me Edi Ramën, Ilir Metën e Paskal Milon. Në fakt, duket se opozita e Kosovës është nën dirigjimin e opozitës së Shqipërisë. Në këtë “komunikim” të tyre politik ka vetëm një ndryshim të vogël: opozita e Shqipërisë po proteston në rrugë, ndërkaq opozita në Kosovë po mrizon në hije. Duket se të parët kanë nevojë për “dush të ftohtë” ndërkaq të dytët për një “rrezatim në diell”.