[Artisti]

Ekipi Negociator tejkaloi mosmarrëveshjet... AktualeAnëtarët e Ekipit Negociator të Kosovës i kanë tejkaluar mosmarrëveshjet e shfaqura dje pas raportimit të presidentit Fatmir Sejdiu në Kuvendin e Kosovës. Zëdhënësi i Ekipit Negociator, Skënder Hyseni i ka quajtur të rastit mosmarrëveshjet e shfaqura të enjten ndërmjet anëtarëve të Ekipit Negociator Të Kosovës. Pas takimit të sotëm Hyseni tha se të gjitha këto mosmarrëveshje janë tejkaluar, ndërsa Ekipi Negociator ka diskutuar për takimet e radhës me palën serbe që do të mbahen në Vjenë me 7 dhe 8 gusht. Anëtarët e Ekipit Negociator të Kosovës i kanë tejkaluar mosmarrëveshjet e shfaqura dje pas raportimit të presidentit Fatmir Sejdiu në Kuvendin e Kosovës. Kështu ka njoftuar sot zëdhënësi, Skënder Hyseni, pas takimit të Ekipit Negociator ku është diskutuar për takimin e radhës që do të mbahet në Vjenë me 7 dhe 8 gusht. “Mund t’ju siguroj se atmosfera në Ekipin Negociator ka qenë shumë e mirë dhe këto mosmarrëveshje që me siguri kanë qenë totalisht të rastit janë tejkaluar”, ka thënë z. Hyseni. Sidoqoftë, para mbledhjes së Ekipit Negociator, përfaqësuesi i opozitës Hashim Thaçi tha se persona të caktuar po e shfrytëzojnë Ekipin e Unitetit për qëllime partiake. Këto pohime i mohoi menjëherë udhëheqësi i Ekipit Negociator, kryetari Fatmir Sejdiu, i cili tha se paraqitja e tij në kuvend ishte në marrëveshje me anëtarët tjerë të Ekipit Negociator. Ndryshe, anëtarët e Ekipit Negociator në takimin e sotëm kanë shqyrtuar agjendën e takimeve të 7 dhe 8 gushtit që do të mbahen në Vjenë. Siç ka njoftuar zyra e UNOSEK-ut, me 7 gusht do të diskutohet për decentralizimin, ndërsa me 8 gusht për herë të parë do të diskutohet për pakon e të drejtave të komuniteteve në Kosovë. Zëdhënësi Hyseni tha se të gjitha çështjet teknike që po diskutohen në Vjenë, në fund të procesit do të marrin trajtën e kategorive kushtetuese. “Ne po përpiqemi që të gjejmë gjuhë të përbashkët dhe zgjidhjet më të mira të mundshme me zyrën e Ahtisarit”, tha Hyseni. Takimi i 7 gushtit do të jetë i gjashti me radhë, ndërmjet Prishtinës dhe Beogradit për decentralizimin. Në asnjërin prej takimeve të deritashme, palët nuk i kanë përafruar qëndrimet lidhur me këtë çështje.

RTK28/07/200616:39:17.