[Gentiani]

Kryetarja e Parlamentit dënon aktet e dhunshme të disa deputetëve të opozitës


Topalli: Axhenda e Kuvendit nuk do të bllokohet


Kryetarja e Kuvendit dënoi ashpër dje aktet vandale dhe të dhunshme të disa deputetëve të Kuvendit, të cilët siç tha ajo, kërkuan t`i imponojnë me dhunë vullnetin e tyre shumicës parlamentare, duke cënuar sovranitetin kombëtar. Topalli tha se, këta deputetë u shndërruan në pushtues të Parlamentit dhe i cilësoi deklaratat e tyre për vendosjen e gjakut mes parlamentarizmit dhe interesit të tyre partiak si të papranueshme. Kreu i legjislativit tha se, zotimet e deputetëve të opozitës për të përsëritur ngjarjet e `97 janë antikombëtare dhe u bëri thirrje atyre t'i rikthehen arsyes, të vendosin racionalitetin mbi aktet revolucionare. Ligjin mbi dhunën dhe Kushtetutën mbi çdo interes të përkohshëm të tyre politik. "Sot, disa deputetë me në krye Ilir Metën u shndërruan në pushtues të Kuvendit me akte vandale, duke kërkuar t'i imponojnë shumicës me dhunë vullnetin e tyre, duke cënuar rëndë sovranitetin kombëtar. Mesa duket, cikli i dorëzimit paqësor të pushtetit nuk është mbyllur. Ata deklaruan sot se vendosin gjakun mes parlamentarizmit dhe interesit të tyre partiak. Ata u zotuan se do të përsërisin '97-tën. Si kryetare e Kuvendit, i bëj thirrje deputetëve të opozitës, të vënë racionalitetin mbi aktet revolucionare, ligjin mbi dhunën, Kushtetutën mbi çdo interes të përkohshëm", deklaroi Topalli, pas ndërprerjes së seancës parlamentare për shkak të rrëmujës dhe dhunës që shkaktuan deputetët e opozitës në sallën e Kuvendit. Duke folur në emër të Kuvendit, Topalli deklaroi se, nuk do të lejoj që Parlamenti të mbahet i pushtuar dhe se axhenda e tij nuk mund të bllokohet, dhe shprehu bindjen se ajo do të përfundojë sipas programit të miratuar.