[MemphiSx]

Njerëzit në fshatrat e Dukagjinit kanë filluar t'i dërgojnë nga dy bajraktarë me krushq. Njëri prej tyre duhet të mbajë flamurin shqiptar e tjetri flamurin e presidentit të ndjerë Ibrahim Rugova. Por, këtë herë në fshatin Korishë ishte dasma e anëtarit të AAK-së që e filloi këtë traditë.

Prizren, 28.7.2006 — Sezoni i dasmave ka një muaj që ka filluar në Rrafshin e Dukagjinit. Kolona të gjata krushqive me vetura të përcjella nga tinguj të paakorduar burive çdo vikend zhurmojnë nëpër këto anë. Por, për dallim nga vitet e kaluara, disa krushq kanë filluar t'i mbajnë nga dy flamuj. Një të Dardanisë së Ibrahim Rugovës dhe një shqiptar. Kjo për herë të fundit ka ndodhur javën e shkuar në rrethin e Prizrenit, në fshatin Korishë, të mbahet një dasmë me dy flamuj, njëri kombëtar dhe tjetri i presidentit të ndjerë Rugova. Një gjë shumë e pazakontë në këtë anë. Por, ajo që më shumë i jep peshë kësaj ngjarjeje është se dhëndëri që po martohej është një zyrtar i lartë i kryesisë së AAK-së në Prizren dhe njëherë edhe koordinator në ministrinë e Dugollit.
Në fytyrat e krushqve vërehej një buzëqeshje, por me pak dashamirësi. Disa prej dasmorëve në momentin kur vërejtën intonimin e flamurit të Rugovës, vendosën të largohen nga radha e krushqve. Flamurin e vendosi një kush i zotit të dasmës në kohën kur po niseshin për te nusja dhe kështu dasmorët disa nga keqardhja për të mos e prishur dasmën e disa nga dëshira, u detyruan të vazhdonin rrugën me dy flamuj për te miqtë e ri. Edhe pse njihet si një rajon mjaft i acaruar politikisht, kjo dasmë u zhvillua si më së miri me përjashtim të të sharave ndër dhëmbë që i hëngrën krushqit nga disa kalimtarë dhe disa prijës të krushqve. Dasma me dy flamuj nuk është e zakonshme në këto anë. Por, ajo që më së shumti i çuditi të pranishmit, ishte se dasma e anëtarit të AAK-së e filloi këtë traditë në këto anë e jo e atyre të LDK.