[Guri i madh]

Postimi origjinal është bërë nga panta_rhei

Në ditën e parë të fushatës për liderin e LDK’së, Nexhat Daci i ka garantuar humbjen Fatmir Sejdiut. Në Klinë, ku ka premtuar se LDK’së do t’ia kthejë dinjitetin, Daci është pritur pothuajse sikur Ibrahim Rugova.

- Klinë, 7 shtator - Nexhat Daci u është drejtuar si Ibrahim Rugova, të enjten, simpatizantëve të tij në Klinë, kur ka përshëndetur me duart e bashkuara dhe të ngritura lart, në ditën e parë të garës për ta marrë nën udhëheqje Lidhjen Demokratike të Kosovës.
Dëshpërimin që ka ndjerë kur Kryesia e LDK’së e kishe shkarkuar nga posti i Kryetarit të Kuvendit të Kosovës - kanë mundur t’ia fashisin mijëra qytetarë dhe t’ia forcojnë besimin për betejën e fronit.
I qetë, ka konstatuar edhe fitoren përball Fatmir Sejdiut.
“Kundër-kandidatin e kam koleg shumë gjatë, do të kem respekt, por e ka humbjen e sigurt”.
Nexhat Daci ka zgjedhur të shprehet i bindur në fitoren e tij, edhe pse dita që do ta vendosë trashëgimtarin e Ibrahim Rugovës mund të jetë ndër më të mirat për Fatmir Sejdiun, i cili me përkrahjen ndërkombëtare ka përjetuar ngritjen më të lartë në karrierën e tij politike – si President i Kosovës.
Lidhja Demokratike e Kosovës, pas gjashtëmbëdhjetë vjetësh, për herë të parë, ka hapur të enjten fushatën për zgjedhjet e brendshme, pasi që lideri i saj humbi betejën me kancerin në mushkëri, në janar të këtij viti, ndërsa partia u përfshi si me një komandë në tensione.
Zyrtarët e saj kanë pohuar përçarjet.
Nexhat Daci, ndërkaq, ka premtuar se ai do t’ia kthejë dinjitetin LDK’së, të cilën e ka ndarë në dy periudha - para dhe pas vdekjes së Ibrahim Rugovës.
“LDK deri në janar të vitit 2006 - ishte bërthama, udhëheqëse e botës së lirë shqiptare, ishte forca politike që Ballkanit i premtonte qetësi të përhershme. Ndërsa, në 2006, fatkeqësisht, përnjëherë pushoi ajo forcë dhe gjithë kjo makineri progresive e botës shqiptare ngadalë rrëshqiste në një satelit të dobët të partive të vogla”.
Ai është duartrokitur në një manifestim të organizuar nga Forumi Rinor i LDK’së në Klinë për 16 vjetorin e Kushtetutës së Kaçanikut, i përfolur si tentim për ta përçarë partinë.
Debate të ashpra, deri në orët e vona të natës, janë zhvilluar mes përkrahësve të Nexhat Dacit dhe Kryesisë së LDK’së në Klinë – të rreshtuar përkrah Fatmir Sejdiut, për mundësinë e një organizimi të përbashkët, i cili, megjithatë, ka dështuar.
“Presionet, tensionet dhe kërcënimet nga ata që nuk përfillin, nuk respektojnë vendimet legale të organeve kompetente të LDK’së që ky tubim të keqpërdoret edhe për fushatë elektorale të një grupimi joformal - sollën deri te domosdoshmëria e një vendimi të këtillë për anulimin e këtij takimi”, është thënë në një komunikatë të Kryesisë së LDK’së në Klinë.
Mirëpo, Daci është përgjigjur.
Ka thënë se projekti i tij është paqësor dhe ka nivel të lartë të kulturës, prandaj asnjë adhurues i tij nuk do të sillte probleme.
“Kurrë. Ekipi im nuk sjell probleme, përkundrazi – i zgjidh problemet”.
Ai ka rikujtuar se koncepti për një LDK unike është krijuar me shumë mund, në të cilin ka investuar e gjithë bota shqiptare për 16 vjet.
“Nuk ka njeri normal që do të insistonte ta fragmentojë LDK”, ka thënë ai.
Fushatën e ka nisur me homazhet që ka bërë pranë varrit të Presidentit Rugova, ndërsa atë e ka hapur, po ashtu, me himnin e propozuar të tij, por jo edhe me atë kombëtar.
Tha se ka marrë “përkrahjen” edhe nga atje.
“Është respekt shumë i madh për mua dhe ekipin që do ta udhëheqë projektin në zgjedhjet e LDK’së, ekip i cili sot, në një mënyrë, sjell edhe përkrahjet që na vijnë nga parajsa e gjithësisë, sepse ishim për nderime dhe nga respekti e filluam nga varri i Presidentit tonë legjendar, Ibrahim Rugova”.
Palestra sportive e qytetit është mbushur me Flamuj të Dardanisë, ndërsa elektorati është ngritur në këmbë sa herë që është përmendur emri i liderit të tyre që e konsiderojnë historik.
E kjo – ka ndodhur shpesh, të enjten.
Klina është vendlindja e Kolë Berishës, i cili ka zëvendësuar Nexhat Dacin në postin e Kryeparlamentarit.
Por, Daci e ka quajtur këtë qytezë – të dashur.
“Më lejoni t’ju them, në Klinën time të dashur, në zemër të Dukagjinit, se motoja e projektit tonë për LDK është – luftë demokratike dhe politike për LDK të dinjitetshme, për LDK të respektueshme nga elektorati i vet, për LDK që Kosovës i garanton qetësi dhe stabilitet ekonomik dhe Ballkanin e kthen në vend të paqes”.
Këtë projekt ai ka siguruar se do ta realizojë në bashkëpunim me vendet e bashkësisë europiane dhe në miqësi të përhershme me SHBA.
Përkrah tij, në Klinë, ka pasur Adem Salihajn, Shefki Gashin, Lulëzim Zenelin dhe Sejdë Tolajn nga Kryesia, deputetët Besa Gaxherrin dhe Fadil Gecin, ish Kryetarin e Prishtinës Sali Gashin dhe ish Kryeshefin e Ekzekutivit Berim Ramosajn, Përfaqësuesin e LDK’së për Amerikë Ilmi Berishën, Përfaqësuesin e LDK’së për Zvicër Hysen Gërvallën, si dhe nipin e Presidentit të ndjerë, Naser Rugovën.
Përveç fitores, Nexhat Daci shprehur besimin edhe në ekipin e tij.
Ka thënë se me LDK’në, Kosova do të udhëhiqet nga njerëz të gjakut dhe mendjes së re e të pasur.
“LDK e këtij projekti nuk do të jetë hakmarrje, përkundrazi të gjithë do t’i bashkojë dhe do të jetë LDK e popullit e para 16 vjetëve, LDK që prin vetëm në suksese, LDK që do ta ketë respektin tuaj”.
Dy ditë më parë, Kryesia e LDK’së ka dalë me kandidatin e saj për lider, Fatmir Sejdiun, i cili ka marrë përkrahjen e 13 kolegëve të partisë, ndërsa shtatë të tjerë nuk kanë pranuar të votojnë – me argumentimin se një mënyrë e tillë vendimi shkel statutin.
Kjo ka bërë përçarjen “zyrtare”.
Degët, po ashtu, janë pozicionuar.
LDK, dikur një lëvizje gjithëpopullore, ka trashëguar një shtrirje të gjerë në gjithë territorin e Kosovës.
Në strukturën e saj organizative ka 36 degë në Kosovë dhe 12 degë në Europë e SHBA, ka 498 nëndegë dhe 1.500-1.600 aktive.
Beteja do të zhvillohet në degë, prej nga do të dalin delegatët që në fund të këtij viti do të zgjedhin udhëheqësin e ri të partisë më të madhe në vend.
Ditën e parë të fushatës, Nexhat Daci e ka përmbyllur duke duartrokitur për këngëtaren Edona Llaloshi, vargjet e së cilës - “para teje i ftoftë është edhe dielli”, i kanë sjellë atij buzëqeshjen.
Pastaj, ka deklaruar fitoren.
“Sot ishte diçka që mund të jetë më e bukura e fillimit. Ishte vërtet një atmosferë ngazëlluese dhe kjo më jep energji të reja. Unë nuk hyj në procese që nuk i fitoj. Jam i sigurt që do t’i fitoj”.

te pershendes edhe ju falemenderoj per kto foto me sa kam kuptue une i ndjeri DR RUGOVA gjithmon kav mendue qe ket forc politike me ja derzue AKADEMIK NEGJAT DACIT esht nji personalitet i dashur i qart qe gjdo her flet me gjuhen e popullit gjdo her jap pergjigj,je adekuate me pytjen e para shtruar kurr nuk jap pergjigj,je politike ose me ju ik pytjeve me fjal te tjera shumica e popuullit e perkrahin gjdo zgjedhje tjeter do te jet e gabuar se nji dit do te vjen dita ku do te votohet me kutia te hapura mbasi do te shkoj unmiku e ather do te binden te gjith se e kan pas gabim