[Dilaver]

Takimi i ardhshëm i Grupit të Kontaktit me Emisarin e OKB'së për Statusin e Kosovës është caktuar të mbahet me 10 nëntor.
Në këtë takim - pritet të dilet me vendim nëse ndryshon ose jo orari aktual për statusin e Kosovës, pasi që Serbia të deklarohet për datën eventuale të zgjedhjeve.
Nëse zgjedhjet në Serbi mbahen para përfundimit të këtij viti, atëherë është e mundshme që Ahtisaari të marrë rekomandimin nga Grupi i Kontaktit për të shtyrë afatin kohor për prezantimin e pakos në Këshillin e Sigurimit.

Por, kur do ta marrin palët në negociata pakon?
"Nëse nuk ndryshon orari actual për zgjidhjen e statusit, Martti Ahtisaari do të raportojë në Këshillin e Sigurimit diku në muajin dhjetor, ose edhe më herët. Takimi i ardhshëm i GK është me 10 nëntor. Mendoj se deri në këtë kohë, 10 nëntor, të dyja delegacionet - Kosova dhe Serbia, do të marrin propozimet për status. Rusët duan që propozimi së pari t'u jepet delegacioneve, pastaj të zhvillohen negociata lidhur me pakon për status, e pastaj pakoja të kalojë në Këshillin e Sigurimit të OKB'së".
Serbia ka dalë të shtunën dhe të dielën në referendum, për ta votuar Kushtetutën e re, e cila parasheh Kosovën si pjesë të saj.
Liderët serbë janë shprehur se Kushtetuta paraqet diskontinuitet me kohën e Sllobodan Millosevic dhe se është më e mirë se e kaluara.
Suksesi i mundshëm i këtij referendumi - sjell mbajtjen e zgjedhjeve në Serbi, përcaktuesi kryesor për orarin e zgjidhjes së statusit të Kosovës.
Nëse Serbia mban zgjedhje parlamentare para përfundimit të vitit 2006, Martti Ahtisaari do të raportojë në janar në Këshillin e Sigurimit.
"Kështu e ka në plan. Megjithatë, në janar, kryesues I radhës në Këshillin e Sigurimit është Rusia, prandaj kjo çështje mund të shtyhet për muajin shkurt, kur Sllovakia është kryesuese e radhës", ka pohuar zyrtaringa GK.
Martti Ahtisaarit i është vazhduar kontrata e punës deri në qershor.
Sidoqoftë, ai nuk planifikon të qëndrojë si Emisari i OKB'së pas çerekut të parë të vitit 2007.
"Pra, Ahtisaari qëndron në këtë post më së largu deri më 31 mars të vitit 2007".
Finlandezi, në misionin e tij më sfidues, në zgjidhjen e konfliktit shumëvjeçar mes shqiptarëve dhe serbëve, nuk do të arrijë një kompromis mes tyre.
Por, zgjidhja e tij do të jetë - kompromis.
Këtë fundjavë, serbët tentojnë të aprovojnë Kushtetutën e re, duke riafirmuar Kosovën si pjesë e Serbisë, përderisa shumica shqiptare e Kosovës aspiron fuqimisht dhe pret me besim një pavarësi të plotë.
Grupi Negociator i Kosovës e ka parë Emisarin e OKB'së si njeri që do t'i japë fund asaj që ka mbetur e papërfunduar më 1999.
Në vizitën e tij të parë në Kosovë, sapo kishte marrë mbi supe një detyrë të rëndë, me të cilën do t'i vë majë karrierës, finlandezi ka pranuar se pikëpamja e tij e pasluftës në Kosovë – se pavarësia nuk ishte zgjidhje e duhur, duhet të shikohet në kontekstin e atëhershëm.